Muramye Yehova nk’Eka
1 Omu bwire obu Baibuli yaabaire neehandiikwa, abantu omu maka bakaba baakorera hamwe ebintu bingi. Bakaba bakorera hamwe emirimo y’aha ka kandi ekikuru munonga, baramiza hamwe Yehova nk’eka. (Lev. 10:12-14; Bir. 31:12) Omu myanya mingi omu bunaku obu, n’ebintu bikye ebi abantu omu maka barikukorera hamwe. Kwonka, Abakristaayo nibamanya obukuru bw’okukorera hamwe ebintu nk’eka, okukira munonga ebikwatiraine n’okuramya. Ka nikishemeza Owaatandikireho amaka okureeba amaka nigamuramiza hamwe!
2 Mubuurire Hamwe nk’Eka: Okubuurira hamwe amakuru marungi nk’eka nikihamya amaka. N’ahabw’ekyo, oyihireho okubuurira n’abandi omu kibiina, omureeberezi naija kandi kubuurira n’omukazi we n’abaana be butoosha. (1 Tim. 3:4, 5) N’obu abareeberezi abarikutaayaayira ebibiina baraabe baine bingi eby’okukora, nabo nibataho obwire okukora n’abakazi baabo omu kubuurira.
3 Abazaire abarikubuurira n’abaana baabo nibabahwera kukora gye nk’ababuurizi. Abaana tibarikwija kureeba okushemererwa n’okumarwa oku abazaire baabo barikutunga omu kubuurira kwonka, beitu nibaija n’okureeba oku abazaire baabo barikworeka rukundo ei bainiire Yehova n’abantu bataahi baabo. (Bir. 6:5-7) Abazaire bashemereire kuguma nibabuurira n’abaana baabo, abaana baaba bakiri bato na bakuru. Abazaire bamwe abaine aboojo bashatu abari ahagati y’emyaka 15 na 21 nibakibuurira nabo butoosha. Ishebo naagira ati: “Buri kugyenda nabo, haine eki turikubeegyesa. Kandi nituteeraho kureeba ngu okubuurira okwo kwabashemeza kandi ngu kwabagaruramu amaani.”
4 Mutebeekanisize Hamwe: Amaka maingi gashangire ngu ni kirungi okwetebeekanisiza hamwe nk’eka okuza kubuurira. Abaana nibakira kukunda okubanza baayoreka ab’omu ka yaabo nk’oku barikuza kwanjura amakuru marungi, buri omwe arikukora nk’orikubuurira nari nk’ou baashanga omu ka. Abazaire abamwe nibakoresa edakiika nkye ahanyima y’okushoma kw’eka okukora eki.
5 Okushemererwa kwaitu nikweyongyera ku turikwejumba omu murimo mukuru kandi ogurikureeta okumarwa turi n’abo abu turikukunda. Ka nikishemeza ab’omu eka emwe okukorera hamwe omu kubuurira enju aha ndiijo otaireho n’okugarukayo okwegyesa abantu Baibuli! Omu kuramya Yehova n’eka yaawe, n’okushemererwa noobaasa kugira oti: “Nyowe n’eka yangye nitwija kuguma nituheereza [Yehova].”—Yos. 24:15.