Kampeyini y’Okubuurira Erikukirayo Obuhango Erabaireho omu Nsi!
Okumara emyaka erikurenga omuri 100, Abajurizi ba Yehova batwire nibabuurira amakuru marungi. (1 Kor. 9:23) Omuri kampeyini egi erikukirayo obuhango erabaireho omu nsi, nitubuurira amakuru aga omu magana g’endimi. Nitugabuurira omu mahanga garikurenga 230. (Mat. 24:14) Kwonka ahabw’enki omurimo ogu gushemereire kukorwa? Kandi nigukorwa guta omu nsi yoona?
Vidiyo erikwetwa Jehovah’s Witnesses—Organized to Share the Good News neegarukamu ebibuuzo ebyo, erikworeka gye ebintu bitari bimwe na bimwe ebi turikukora omu murimo gwaitu ogurikukorwa omu nsi yoona. Ku oraabe noogireeba, yetegyereze ebi: (1) Omurimo gwaitu gutebeekanisiibwe guta kandi nigwebemberwa guta? (2) Abarikukora aha by’Okuhandiika, Okuvunuura, Ebishushani, eby’amaraka nari abarikukora aha bya Vidiyo nibahwera bata omu kubuurira amakuru marungi? (3) Ahabw’enki nituteera ebitabo bingi kandi tukabyohereza? (Yoh. 17:3) (4) N’ebitabo bingahi ebirikuteerwa omu mwaka gumwe? (5) Ebitabo byaitu ebirikukwata ahari Baibuli bibaasize kukora ki? (Heb. 4:12) (6) N’enki ekirikukorwa okuha empumi n’abafiire amatu obuhwezi omu by’omwoyo? (7) Empiiha ezirikukoresibwa omu murimo gwaitu niziruga hi? (8) Nitugasirwa tuta omurimo ogurikukorwa Abarikucondooza aha by’Obujanjabi, abarikukora aha by’Obuheereza, n’aha by’Enteerane Empango ez’Ebiro Bishatu? (9) Nk’omujurizi wa Yehova, vidiyo egi ekuhwereire eta kwongyera kusiima n’okwetegyereza (a) amaani agu ekibiina kya Yehova kirikuta omu kubuurira amakuru marungi? (b) zaabeseeli ezirikurenga omuri 100 omu nsi yoona? (c) okutendeka okurikuheebwa abareeberezi n’abamiishani? (d) omugasho gw’okutandika izooba turikushwijuma ekyahandiikirwe hamwe n’okwetebeekanisiza enteerane buri saabiiti? (e) omugasho gw’okuza omu nteerane zaitu z’Ekikristaayo? (f) eki paradiso omu nsi eraamanyise? (Isa. 11:9) (g) obukuru bw’okwejumba nk’omuntu omu murimo gw’okugyesha ogurikugyenda omu maisho?—Yoh. 4:35.
Ni birungi ki ebirugire omu kworeka vidiyo egi abanyabuzaare baawe, banywani baawe n’abu orikwegyesa Baibuli? Ahabw’enki otarikworeka omuntu ondiijo vidiyo egi kandi okamubuurira n’amakuru marungi omu bwire butari bwa hare?—Mat. 28:19, 20.