Nooyeziringa Kwijuza Kaada Erikwetwa DPA (durable power of attorney)?
Kaada egi neijuzibwa ababuurizi ababatiziibwe. Obu ‘otarikumanya ekiraakubeho nyencakare,’ ni kikuru kucwamu bukiri kare kandi okooreka omu buhandiikye oku orikwenda kujanjabwa. (Yak. 4:14; Byak. 15:28, 29) Okukuhwera kucwamu gye, hariho vidiyo erikwetwa Transfusion-Alternative Health Care—Meeting Patient Needs and Rights. Gireebe, na bwanyima oshabe Ruhanga okukubaasisa kwijuka ebi oyegiremu, orikukoresa ebibuuzo ebiri ahaifo.—Eky’okwetegyerezibwa: Ahabw’okugira ngu omuri vidiyo egi harimu ebishushani by’abarikushemezibwa, abazaire bashemereire kucwamu yaaba baraagireebe n’abaana baabo.
(1) Ahabw’enki abashaho abamwe batandikire kushemba eky’okutata eshagama omu bantu? (2) Ha eby’okureeberaho bishatu eby’okushemeza kw’amaani okw’abarwaire, abataratairwemu shagama. (3) N’abashaho bangahi omu nsi yoona aboorekire ngu beteekateekire kujanjaba nari kushemeza abarwaire batabatairemu shagama? Ahabw’enki beteekateekire kukora ekyo? (4) Okucondooza okukozirwe omu marwariro kworekire ki aha bikwatiraine n’okukoresa eshagama? (5) Ni kabi ki akari omu kuteebwamu eshagama? (6) Abashaho baingi bagambire ki aha birungi ebirikuruga omu bujanjabi obutarimu kukoresa shagama? (7) Niki ekirikureetera omuntu kuhwamu eshagama? Omuntu naabaasa kumaraho obwire burikwingana ki aine eshagama nkye? N’enki ekirikubaasa kukorwa kuhwera omuntu ohweiremu eshagama? (8) Obutafaari bw’eshagama oburikutukura nibubaasa buta kwongyerwa omu mubiri gw’omurwaire? (9) Niki ekirikukorwa okutuubya aha shagama erikushohora omu kushemeza omurwaire? (10) Obujanjabi obutarimu kukoresa shagama nibubaasa kukora gye aha baana bato nari abarwaire abari haihi kufa? (11) Ni kintu ki kimwe aha bikuru ebi abashaho baine kwijuka baaba nibajanjaba abarwaire? (12) Ahabw’enki ni kikuru Abakristaayo kucwamu bukiri kare kuheebwa obujanjabi obutarimu kukoresa shagama? Eki nitubaasa kukikora tuta?
Okwikiriza bumwe aha bujanjabi obworekirwe omu vidiyo egi, n’ekya buri omwe kwecweramu arikwihirira aha mutima gwe ogutendekirwe Baibuli. Waacwiremu omuringo ogw’obujanjabi ogu oyeteekateekire kwikiriza iwe hamwe n’abaana bawe? Okubaasa kumanya ebirikukiraho ebirikukwata aha nshonga ezi, reeba akacweka akaine omutwe “Ebibuuzo Kuruga Omu Bashomi Baitu” omuri The Watchtower eya Gyuni 15, 2004, n’eya Okitoba 15, 2000, hamwe n’akapapura ak’omunda akaine omutwe, “Nintwara Nta Obucweka bw’Eshagama n’Obujanjabi Oburikutwariramu Okukoresa Eshagama Eyangye?” omu Our Kingdom Ministry aka Novemba 2006. Abu otooraine kuba abeema baawe aha by’obujanjabi n’omwe aha banyabuzaare otari Mujurizi wa Yehova bashemereire kumanyisibwa aha bi ocwiremu.