Nooyeziringa Kwijuza DPA?

Kaada egi neijuzibwa ababuurizi ababatiziibwe. Obu ‘otarikumanya ekiraakubeho nyencakare,’ ni kikuru kucwamu bukiri kare kandi okooreka omu buhandiikye oku orikwenda kujanjabwa. (Yak. 4:14; Byak. 15:28, 29) Okukuhwera kucwamu gye, ekibiina kikashohoza vidiyo erikwetwa Transfusion-Alternative Health Care Meeting—Patient Needs and rights. Gireebe na bwanyima oshabe Ruhanga kukubaasisa kwijuka ebi oyegiremu, orikukoresa ebibuuzo ebiri ahaifo.—Eky’okwetegyerezibwa: Ahabw’okugira ngu omu vidiyo egi harimu ebishushani by’abarikushemezibwa, abazaire bashemereire kucwamu yaaba baraagireebe n’abaana abato. Abaraabe bataine vidiyo egyo bahikaanise ebiteekateeko aha biri ahansi y’omutwe “Ebibuuzo Kuruga omu Bashomi” oguri omuri The Watchtower eya Gyuni 15, 2004 n’eya Okitoba 15, 2000 nari ebiri ahansi y’omutwe “Oyeteekateekire Kworekyera eby’Obujanjabi Ebirikugyeza Okwikiriza Kwawe?” oguri omu Our Kingdom Ministry aka Novemba 1990.

(1) Ahabw’enki abashaho abamwe batandikire kushagika eky’okutata eshagama omu bantu? (2) Ha eby’okureeberaho bishatu eby’okushemeza kw’amaani okw’abarwaire, abataratairwemu shagama. (3) N’abashaho bangahi omu nsi yoona aboorekire ngu beteekatekire kujanjaba nari kushemeza abarwaire batabatairemu shagama? Ahabw’enki beteekateekire kukora ekyo? (4) Okucondooza okukozirwe omu marwariro kworekire ki aha bikwatiraine n’okukoresa eshagama? (5) Ni kabi ki akari omu kuteebwamu eshagama? (6) Abashaho baingi bagambire ki aha birungi ebirikuruga omu bujanjabi obutarimu kukoresa eshagama? (7) Niki ekirikureetera omuntu kuhwamu eshagama? Omuntu naabaasa kumaraho obwire burikwingana ki aine eshagama nkye? Niki ekirikubaasa kukorwa kuhwera omuntu ohweiremu eshagama? (8) Obutafaari bw’eshagama oburikutukura nibubaasa kwongyerwa buta omu mubiri gw’omurwaire? (9) Niki ekirikukorwa okutuubya aha shagama erikushohora omu kushemeza omurwaire? (10) Obujanjabi obutarimu kukoresa eshagama nibubaasa kukora gye aha baana bato nari abarwaire abari haihi kufa? (11) Ni kintu ki kimwe aha bikuru ebi abashaho baine kwijuka baaba nibajanjaba abarwaire? (12) Ahabw’enki ni kikuru Abakristaayo kucwamu bukiri kare kuheebwa obujanjabi obutarimu kukoresa eshagama? Eki nitubaasa kukikora tuta?

Okwikiriza bumwe aha bujanjabi oburikworekwa omu vidiyo egi, n’ekya buri omwe kwecweramu arikwihirira aha muntu we w’omunda otendekirwe Baibuli. Waacwiremu omuringo ogw’obujanjabi ogu oyeteekateekire kwikiriza iwe hamwe n’abaana baawe kandi waijwize kaada erikwetwa DPA nari AMD? Okubaasa kumanya ebirikukiraho ebirikukwata aha nshonga ezi, shwijuma ebiri omu shuura 7 ey’akatabo “Okukunda kwa Ruhanga” n’ebindi ebijuriziibwe omu shuura egyo. Kandi reeba n’akapapura k’omunda akariho omutwe “Nintwara Nta Obucweka bw’Eshagama n’Obujanjabi Oburikutwariramu Okukoresa Eshagama Eyangye?” akari omuri Our Kingdom Ministry eya Novemba 2006. Bwanyima hamya ngu ebi waacwamu waabyijuza gye aha kaada erikwetwa DPA. Abu otooraine kuba abeema baawe omu by’obujanjabi n’omwe aha banyabuzaare otari Mujurizi wa Yehova bashemereire kumanyisibwa aha bi ocwiremu.

[Akabokisi aha rupapura 3]

• Waacwiremu omuringo ogw’obujanjabi ogu oyeteekateekire kwikiriza iwe hamwe n’abaana baawe?

• Noogyenda na kaada yaawe erikwetwa DPA nari AMD eijwize gye?