Noomanya Ebi Orikubaasa Kucwamu

Omu marwariro maingi omu nsi yoona, abantu baingi nibashemezibwa batatairwemu eshagama. Noomanya gye emiringo y’obujanjabi eriho etarimu kukoresa eshagama Nooyetenga kumanya ekyo kugira ngu obaase kucwamu gye emiringo ey’okujanjabwamu hamwe n’okushemezibwa. Reeba vidiyo erikwetwa No Blood—Medicine Meets the Challenge. Bwanyima y’okushaba, yeijutsye ebi waayega orikuhwerwa ebibuuzo ebiri ahaifo.—Eky’okwetegyerezibwa: Ahabw’okugira ngu omuri vidiyo egi harimu abariyo nibashemezibwa, abazaire bashemereire kucwamu yaaba baraagireebe n’abaana baabo abato. Mwaba mutaine vidiyo egi, mukorese ekicweka ekiine omutwe “Ebibuuzo Kuruga omu Bashomi” ekiri omu Watchtower eya Gyuni 15, 2004 n’eya Okitoba 15, 2000, nari ekicweka “Oyeteekateekire Kworekyera Embeera Egumire Erikugyeza Okwikiriza Kwawe omu by’Obujanjabi” kuruga omu Our Kingdom Ministry aka Novemba 1999 reero mugarukyemu ebibuuzo ebiri ahaifo ebirikuhikaana n’ebicweka ebyo.

(1) Ni nshonga ki enkuru erikureetera Abajurizi ba Yehova kwanga kuteebwamu eshagama (2) Aha bikwatiraine n’obujanjabi, n’enki eki Abajurizi ba Yehova barikwenda (3) Abarwaire baine bugabe ki (4) Ahabw’enki n’eky’obwengye kandi eky’obujunaanizibwa okutoorana obujanjabi obutarimu kuteebwamu eshagama (5) Omurwaire ku yaakurugwamu eshagama nyingi, ni bintu ki bibiri ebikuru ebi abashaho barikubaasa kukora (6) Hariho miringo ki ena ey’obujanjabi etarimu kukoresa eshagama (7) Abashaho nibabaasa bata (a) kutuubya aha shagama erikushohora, (b) kurindira omu mubiri obutafaari oburikutukura, (c) kwongyera aha bwingi bw’eshagama, (d) n’okugarura omu mubiri eshagama erikushohora omu kushemezibwa (8) Shoboorora omuringo gw’okushemezibwa ogurikumanywa nka (a) hemodilution na (b) cell salvage. (9) N’enki eki oshemereire kumanya aha bikwatiraine n’okushemezibwa okw’omuringo gwona okutarimu kuteebwamu eshagama (10) Nihabaasa kubaho okushemezibwa okw’amaani omurwaire atataibwemu eshagama (11) Ni mpindahinduka ki enungi eriyo neebaho omu by’obujanjabi

Okwikiriza emwe aha miringo y’obujanjabi erikworekwa omuri vidiyo egi, n’ekya buri omwe kwecweramu arikwihirira aha muntu we ow’omunda otendekirwe Baibuli. Waacwiremu emiringo y’obujanjabi ei iwe orikubaasa kwikiriza hamwe n’abaana baawe, kandi waijwize kaada erikwetwa DPA nari AMD (Advanced Medical Directive) Okubaasa kwetegyereza gye enshonga ezi, shwijuma gye ebiri ahansi y’omutwe “Ebibuuzo Kuruga omu Bashomi” ebiri omu Watchtower eya Gyuni 15, 2004 n’omu ya Okitoba 15, 2000. Bwanyima reeba ebiri aha kapapura k’omunda aka Our Kingdom Ministry Novemba 2006 akariho omutwe “Nintwara Nta Obucweka bw’Eshagama n’Obujanjabi Oburikutwariramu Okukoresa Eshagama Yangye,” obaase kwecweramu obujanjabi obu orikubaasa kwikiriza n’obu orikubaasa kwanga. Eky’aha muheru, hamya ngu ebi waacwamu byona waabihandiika gye aha kaada yaawe erikwetwa DPA nari AMD. Abu otooraine kuba abahwezi baawe omu by’obujanjabi hamwe n’abanyabuzaare baawe abatari Bajurizi ba Yehova bashemereire kumanyisibwa gye ebi ocwiremu.