Okugumyana Turi omu Kubuurira
1 Twena nitushemererwa kuhurira ekigambo ekirikutugumya “ekigambirwe omu bunaku bwakyo.” (Enf. 25:11) Twaba nitubuurira n’abandi, nitubaasa kuhamya tuta ngu ebi turikugaaniira nabo nibyombeka?
2 Okugaaniira Okurikwombeka: Ka nikigaruramu amaani kugaaniira aha bintu eby’omwoyo ebirikutuhwera kuhamya enkoragana yaitu na Yehova twaba turi omu kubuurira! (Zab. 37:30) Nitubaasa kugaaniira aha nyanjura zaitu nari aha bitushemeize turikubuurira. (Byak. 15:3) Nitubaasa kugaaniira aha nshonga ezi tushemeize turikweshomesa Baibuli, magaziini nari turi omu nteerane z’ekibiina. Kandi nitubaasa kugaaniira aha nshonga ezi tuherize kuhurira omu rubazo rwa boona omu Kyombeko ky’Obukama.
3 Nikibaasa kutumaramu amaani ou turikubuurira yaatubuuza eki tutarikubaasa kushoboorora aha shaaha egyo. Nikiba kiri kirungi bwanyima y’okuruga aha muntu ogwo, iwe n’ou orikubuurira nawe kugaaniira aha ku murikubaasa kugarukamu omuntu nk’ogwo ogundi murundi, kandi eki nimubaasa kukikora murikukoresa akatabo Reasoning. Kandi twaba twasiima enyanjura y’ou turikubuurira nawe, nitubaasa kumwebaza kandi ekyo nikibaasa kumugaruramu amaani.
4 Shaba Abandi Kubuurira Naiwe: Omu bu turi nabo omu kushoma ekitabo okw’ekibiina, haine abu oherize obwire buraingwa otarikubuurira nabo? Okubashaba kubuuriraho nabo nikibaasa kuturugiramu “okugumyana.” (Rom. 1:12) Baapayoniya nibashemererwa ku barikutunga ab’okubuurira nabo, okukira munonga omu kasheeshe kare nari omu ihangwe, obu ababuurizi bakye nibo barikuba nibabuurira. Nitubaasa kuhwera baapayoniya turikubashaba kubuurira nabo. Hariho omubuurizi otarikubaasa kukora kihango omu kubuurira ahabw’amagara mabi? Okukora entebeekanisa kugyenda naitwe obundi aha beegi ba Baibuli, nikibaasa kutubeera eky’omugasho.—Enf. 27:17.
5 Okwebaza n’okworeka okusiima nibigaruramu amaani, nangwa n’omu buntu bukye. Tushemereire kuguma nitwijuka ekyo twaba nitubuurira n’abandi, ahabw’okugira ngu nitwenda ‘kugumyana, kandi tukombekana.’—1 Tes. 5:11.