Hwera Ou Orikubuurira Nawe
1. Twaba nitubuurira n’ab’eishe-emwe bagyenzi beitu, nitubaasa kutooreza tuta eky’okureeberaho ky’entumwa Paulo?
1 Paulo akakoresa obwire obu yaamazire n’ab’eishe-emwe bagyenzi be kubagumya kandi nabo baamugumya. (Rom. 1:12) Waabuurira n’ow’eishe-emwe, nookoresa omugisha ogwo kumuhwera kandi okamugumya? Omu mwanya gw’okuguma ohunami, nikiba kiri kirungi kugaaniira n’ou orikubuurira nawe aha birikukuhwera kubuurira gye.
2. Nitubaasa kuhwera tuta abu turikubuurira nabo kugira obumanzi, kandi ahabw’enki kiri kikuru?
2 Muhwere Kugira Obumanzi: Ababuurizi abamwe nibatiina, ekyo nikibaasa kureebekyera aha maisho gaabo nari aha iraka ryabo. Nitubaasa kubahwera kugira obumanzi twabasiima twihire aha mutima. Ni miringo ki endiijo ei turikubaasa kukoresa kuhwera abandi kugira obumanzi? Omureeberezi omwe orikutaayaayira ebibiina, we naagambira ou arikubuurira nawe ebirikumureetera kutiina n’oku okushaba kurikumuhwera kugira obumanzi. Ow’eishe-emwe ondiijo naagira ngu ekirikumuhwera kugira obumanzi, “n’okutandika arikumweya. Obumwe nimba nyine kushaba kubaasa kumwenya.” Haine ekikuhwereire kugira obumanzi waaba noobuurira? Ni kirungi kukigaaniiraho n’ou orikubuurira nawe.
3. Nitubaasa kugaaniira ahari ki n’ou turikubuurira nawe kubaasa kumuhwera kwongyera kubuurira gye?
3 Muhaane Obwengye: Noobaasa kugambira ou orikubuurira nawe enyanjura ngufu nari ekibuuzo ekikuhwereire kutandika kubuurira omuntu ekirikukwata aha kintu ekibaireho omu kicweka kyanyu. Waaba oine ebirungi ebi otungire ahabw’okuhindura omu nyanjura erikuba etuhairwe, bigaaniireho n’ou orikubuurira nawe. (Enf. 27:17) Mwaba nimuza ow’omuntu owaayorekire ngu naayenda kumanya ebirikukiraho, noobaasa kugaaniira n’ou orikubuurira nawe, ekigyendererwa ky’okugarukayo n’oku otebeekanise kukihikiiriza. Bwanyima y’okwega Baibuli n’omuntu, noobaasa kugaaniira n’ou orikubuurira nawe ahabw’enki waacwamu kugaaniira aha nshonga egyo, n’ahabw’enki waakoresa ekyahandiikirwe ekyo, nari ahabw’enki waakoresa omuringo ogwo kwegyesa omwegi wa Baibuli kwetegyereza gye.
4. Ahabw’enki tushemereire kuteeraho kuhwera ab’eishe-emwe abu turikubuurira nabo?
4 Ababuurizi ab’omu kyasha ky’okubanza tibaraahwereire abatari mukwikiriza bonka, beitu bakaba nibamanya omugasho gw’okuhiga n’okugaruranamu amaani. (Byak. 11:23; 15:32) Entumwa Paulo akatendeka Timoseo akiri muto kandi yaamuhiga kwegyesa abandi ebi yaayegire. (2 Tim. 2:2) Twaguma nituhwera ab’eishe-emwe abu turikubuurira nabo, nibaija kugira okushemererwa, bongyere kubuurira gye kandi tushemeze na Tataitwe ow’omu iguru.—Heb. 13:15, 16.