Ba Omuhwezi Murungi w’Ogwo Ou Orikubuurira Nawe

1. Ni migasho ki eri omu kubuurira n’omubuurizi mugyenzi waawe?

¹ Eizooba rimwe, Yesu akatuma abeegi be 70 kuza kubuurira, kandi ‘akabatuma babiri babiri.’ (Luk. 10:1) Hatariho kubangaanisa entebeekanisa egyo ekabaasisa abeegi be kuhwerahwerana n’okugaruranamu amaani barikubuurira. Waagyenda n’omubuurizi mugyenzi waawe omu kubuurira, noobaasa kumuhwera ota?

2. Noobaasa kuhurikiza ota ou orikubuurira nawe yaaba naabuurira omuntu, kandi n’ahabw’enki?

² Hurikiza Gye: Hurikiza gye ou ori nawe yaaba ariyo naabuurira omuntu. (Yak. 1:19) Yaaba ariyo naamushomera Ekyahandiikirwe, naiwe kuratira omuri Baibuli yaawe. Guma nooreeba orikuba naagamba, yaaba ou orikubuurira nawe nari ou murikubuurira. Waahurikiza gye, ekyo nikibaasa kuhiga ou murikubuurira nawe kuhurikiza gye.

3. Ni ryari obu ou orikubuurira nawe arikubaasa kukushaba kwongyerera aha bi yaaba naagambaho?

³ Manya obu Oshemereire Kugamba: Ou orikubuurira nawe yaaba ariyo naabuurira omuntu, nooyoreka ngu noomufaho orikumureka akashoboororera omuntu ogwo. (Rom. 12:10) Oshemereire kwetantara kugamba ou orikubuurira nawe yaaba akiriyo naashoboororera ou murikubuurira. Ku yaakwebwa eki yaaba naayenda kugamba nari ou murikubuurira akabuuza ekibuuzo kandi akakushaba kumuhwera, oine kuteeraho kwongyerera aha bi yaaba naagamba omu mwanya gw’okwanjura enshonga endiijo. (Enf. 16:23; Mub. 3:1, 7) Waacwamu kugamba, ebigambo byawe bishemereire kuba nibyongyera kuhwera ou murikubuurira kwetegyereza enshonga.—1 Kor. 14:8.

4. Niki ekirikwija kwongyera kutureetera okushemererwa n’okumarwa twaba turi omu kubuurira?

⁴ Abeegi ba Yesu 70 obwo bari babiri babiri ku baaherize kubuurira, “baagaruka n’okushemererwa.” (Luk. 10:17) Naiwe noija kugira okushemererwa n’okumarwa omu kubuurira, wahurikiza gye kandi okamanya n’obu oine kwongyerera aha ki ou orikubuurira nawe yaaba naabuuriraho.