Entebeekanisa Nsya ey’Enteerane z’Ekibiina
1, 2. Ni mpindahinduka ki ez’enteerane ezirikwija kubaho kutandika na Jenwari 2009?
1 Omuri Saabiiti eya Apuri 21-27, 2008 ekirango eki ekirikushemeza kikarangwa omu bibiina byona omu nsi yoona. “Kutandika na Jenwari 1, 2009, Okushoma Ekitabo okw’Ekibiina, Eishomero ry’Obuheereza hamwe n’Oruteerane rw’Obuheereza nibiija kubaho hamwe. Okushoma Ekitabo okw’Ekibiina nikwija kwetwa Okwega Baibuli okw’Ekibiina.”
2 Entebeekanisa y’Oruteerane Oru Orwa Buri Saabiiti: Oruteerane oru, otwariiremu ebyeshongoro n’eshaara, nirwija kutwara eshaaha 1 n’edakiika 45. Oruteerane nirwija kuba nirutandika n’ekyeshongoro hamwe n’eshaara (dak. 5), hakurateho Okwega Baibuli okw’Ekibiina (dak. 25). Bwanyima hakurateho Eishomero ry’Obuheereza (dak.30). Habeho ekyeshongoro (dak. 5) ekirikutandika Oruteerane rw’Obuheereza (dak. 35). Oruteerane ruhendere n’ekyeshongoro n’eshaara (dak. 5). Okubahwera omu kwetebeekanisiza enteerane ezi, entebeekanisa y’Okwega Baibuli okw’Ekibiina, ey’Eishomero ry’Obuheereza, n’ey’Oruteerane rw’Obuheereza neija kuba neeyizira omu Buheereza Bwaitu obw’Obukama buri kwezi.
3. Oruteerane rw’Okwega Baibuli okw’Ekibiina nirwija kwebemberwa ruta?
3 Okwega Baibuli okw’Ekibiina: Oruteerane oru nirwija kwebemberwa nk’oku orw’okwega Watchtower rurikwebemberwa. Nikiija kuba kitarikwetengyesa okutandika murikweyijutsya ebi mwayegire omu saabiiti ehweire. Kureka, oruteerane rushemereire kwanjurwa omu bugufu. Eki nikiija kubaasisa boona abaija kugira eki baagarukamu omu bigufu. Orikwebembera akakiiko k’abareeberezi niwe araatoorane abareeberezi abaraabe nibeebembera oruteerane oru, omureeberezi omwe buri saabiiti.
4. Oruteerane rw’Obuheereza nirwija kubamu mpindahinduka ki?
4 Oruteerane rw’Obuheereza: Oruteerane rw’Obuheereza nirwija kuguma nk’oku rubaire ruri kwonka rurimu ebicweka bigufu. Ebirango nibiija kuba nibitwara edakiika 5. Obwire obu nibuheza ahabw’ebirango ebikuru n’ebaruha ezimwe kuruga aha ofiisi y’eitaagi. Ebirango ebya buriijo, nk’ebirikukwata aha ntebeekanisa z’okuza kubuurira, okuboneza, ripoota y’eby’empiiha z’ekibiina, n’ebaruha ezirikwija butoosha kuruga aha ofiisi y’eitaagi tizirikwetengwa kushomerwa aha puratifoomu, kureka niziija kuba nizihanikwa ahu amabaruha g’ekibiina garikuhanikwakugira ngu ab’eishe-emwe bageshomere. Abo abarikuba bahairwe ebicweka omu ruteerane oru bashemereire kuteebekanisa gye, bakakuratira obuhabuzi obubahairwe kandi bakakwata n’eshaaha zaabyo.
5. Omu saabiiti ey’okutaayaaya kw’omureeberezi orikutaayaayira ebibiina, ni ntebeekanisa ki ey’enteerane z’ekibiina eraabe nekuratirwa?
5 Okutaayaaya kw’Omureeberezi Orikutaayaayira Ebibiina: Entebeekanisa eya saabiiti erimu okutaayaaya kw’omureeberezi orikutaayaayira ebibiina terikwija kuhinduka. Aha rwakabiri, Oruteerane rw’Eishomero ry’Obuheereza hamwe n’Oruteerane rw’Obuheereza niziija kuhendera n’ekyeshongoro. Bwanyima omureeberezi orikutaayaayira ebibiina naija kuha orubazo rw’edakiika 30. Nk’oku kirikukorwa hati omu saabiiti ey’okutaayaaya kwe, omwabazyo ogundi nigwija kuba ogw’Okwega Baibuli okw’Ekibiina hakurateho ekyeshongoro n’orubazo rw’obuheereza orw’omureeberezi orikutaayaayira ebibiina. Oruteerane nirwija kuhendera n’ekyeshongoro hamwe n’eshaara.
6. Orikwebembera guruupu aine bujunaanizibwa ki?
6 Enteerane z’Okwetebeekanisa Kuza Kubuurira: Abaraabe nibeebembera zaaguruupu nibaija kutooranwa akakiiko k’abareeberezi kureeberera buri omwe aha bari omu guruupu ezo omu by’omwoyo hamwe n’omu kubuurira. Kyayetengyesa kuha omuheereza obujunaanizibwa obu, naija kwetwa “omuheereza wa guruupu.”
7. Twine ekihika ky’okugasirwa tuta omu ntebeekanisa nsya ey’enteerane zaitu ez’ekibiina?
7 Nk’oku kyayorekwa, nitwija kugira omugisha gw’okwegyesibwa ebiraatuhwere kugira omukago murungi na Yehova. Eki nikiija kutubaasisa kuba ababuurizi barungi kandi abeegyesa barungi, abatendekirwe kwongyera kukora gye omurimo gw’okubuurira.—Efe. 4:13, 14; 2 Tim. 3:17.
8. Okwetebeekanisiza enteerane kare nikiija kutugasira kita hamwe n’abandi?
8 Okwetebeekanisiza enteerane ezo kare nikiija kutuhwera kuta omutima aha nshonga enkuru eziraagambweho omuri buri ruteerane. Twena nitwija kugira omugisha gw’okugarukamu, ekirikwija kutubaasisa kugumyana n’okwombekana. (Rom. 1:11, 12; Heb. 10:24) Ekigyendererwa kyaitu kishemereire kuba ‘okweyongyera kugyenda omu maisho’ obwo ‘turikushoboorora gye ekigambo ky’amazima.’—1 Tim. 4:15; 2 Tim. 2:15.
9. Tumaririire kukora ki kandi n’ahabw’enki?
9 Twine okushemererwa ahabw’empindahinduka egi ey’enteerane zaitu ez’ekibiina. Twena ka tugume nitugyendera aha buhabuzi obu ‘omwambari ow’okwesigwa kandi ow’obwengye’ arikuha kandi tugume haihi n’Omuriisa waitu Mukuru nk’oku arikututebeekanisa kuraba omu “kubonabona kwingi” okuri haihi kubaho.—Mat. 24:21, 45; Heb. 13:20, 21; Kush. 7:14.