Ahansi y’obutegyeki bwa Ruhanga, ebihangirwe byona bikaba biine obumwe n’obusingye

Ahabw’enki Nitwetenga Obukama bwa Ruhanga?

Aha kutandika kw’ebyafaayo by’abantu, Omuhangi waitu Yehova, niwe yaabaire ari Omutegyeki wenka. Akaba naategyeka omu muringo gwa rukundo. Akatebeekanisa omusiri murungi ogurikwetwa Edeni yaaguha abantu kutuuramu. Akabaha n’eby’okurya bingi, n’omurimo gurikushemeza. (Okutandika 1:28, 29; 2:8, 15) Abantu kuri baagumire ahansi y’obutegyeki bwa Ruhanga obwa rukundo, bakaba nibaija kuguma baine obusingye.

Haawa yaaha Adamu ekijuma eki baabaire bazibiirwe kurya. — Abantu b’okubanza bakanga Ruhanga kuba Omutegyeki waabo

Baibuli neeyoreka ngu maraika omwe akagoma yaaba Sitaane Omuregi, reero yaahakanisa obushoboorozi bwa Ruhanga obw’okuba ohikire kutegyeka. Akaba ari nk’orikugira ngu abantu nibashemererwa baaba batarikuhaburwa Ruhanga kandi atarikubategyeka. Eky’obusaasi, abazaire baitu ab’okubanza Adamu na Haawa bakakuratira Sitaane baagomera Ruhanga.—Okutandika 3:1-6; Okushuuruurwa 12:9.

Ahabw’okugira ngu Adamu na Haawa bakanga Ruhanga kuba omutegyeki waabo, bakafeerwa eka yaabo eyaabaire eri Paradiso, n’amatsiko g’okutuuraho ebiro byona baine amagara agahikiriire. (Okutandika 3:17-19) Okucwamu kwabo kukakwata n’aha baana baabo abu baazaire bwanyima. Baibuli neegira ngu ahabw’okushiisha kw’Adamu, ‘ekibi kikaija omu nsi kandi kyarugamu okufa.’ (Abarooma 5:12) Ekibi kikarugamu obundi buremeezi obu: “Omuntu naayekuriza ahari mugyenzi we kumukora kubi.” (Omubuurizi 8:9) Ekirikumanyisa ngu, abantu ku barikwetegyeka, nihaba haine kubaho oburemeezi.

OKUTANDIKA KW’OBUTEGYEKI BW’ABANTU

Nimuroodi ayemereire omu muringo gw’amaryo. Enyima ye abantu bariyo nibombeka. — Nimuroodi akagomera Yehova

Omuntu w’okubanza kuba omutegyeki orikugambwaho omu Baibuli ni Nimuroodi. Kandi akagomera obutegyeki bwa Yehova. Kuruga omu bunaku bwa Nimuroodi, abategyeki b’amaani batwire nibakoresa kubi obushoboorozi bwabo. Emyaka nka 3,000 enyima, Omugabe Sulemaani akahandiika ati: ‘Nkareeba okurira okw’abarikuhatwa bataine kihuumuriza, obushoboorozi bwinwe abo abarikubaita kubi.’—Omubuurizi 4:1.

Na hati embeera nikwo ziri. Omu 2009, akatabo k’Amahanga Ageteeraine kakagira ngu obutegyeki bubi nibwo burikukirayo “kureeta ebintu bibi omu nsi hati.”

OBWIRE BW’OKUGIRA EKYAKORWA!

Abantu nibenda gavumenti nungi n’abategyeki barungi. Kandi ekyo nikyo Omuhangi waitu arikuraganisa!

Ebishushani: Ebirikuruga omu butegyeki bw’abantu. 1. Omukazi wa Asia ashutami aha ruguuto rw’orurofa akikiire omwana arikurira. 2. Omugurusi arwaire ari aha kitanda omu irwariro. 3. Abaserukare bariyo nibateera amasasi omu rutaro. 4. Abarikweshariinga bakwaitse ebipande nibayomba. 5. Omukazi n’omuhara beemereire aheeru y’enju yaabo, baashanga ekirahuri ky’orwigi rwabo kyatsirwe. 6. Orurembo rurimu omwika n’ebikondo by’amashanyarazi. — Nangwa na gavumenti z’abantu enungi ziremirwe kwihaho oburemeezi bw’abantu obw’amaani

Ruhanga akataho Obukama, nari gavumenti erikwija kuza omu mwanya gw’obutegyeki bw’abantu, kandi Obukama obwo ‘nibwija kugumaho’ ebiro byona. (Danieli 2:44) Obu nibwo Bukama obu obukaikuru bw’abantu batwire nibashaba ngu bwije. (Matayo 6:9, 10) Kwonka Ruhanga tiwe arikwija kwebembera gavumenti egi. Omu mwanya gw’ekyo, atooraine ogwo owaabaire yaabaireho omuntu kuba Omutegyeki. Mbwenu shi Ruhanga atooraine oha?