Mwetebeekanisize Gye Ekiijutsyo
Okwetebeekanisiza gye ekiro eki turikwijukiraho okufa kwa Yesu Kristo, ka nikireeta okushemererwa aha bakuratsi ba Kristo! (Luka 22:19) Tushemereire kukora ki okwetebeekanisiza Ekiijutsyo?
◼ Eshaaha n’Omwanya: Buri omwe ashemereire kumanya gye eshaaha n’omwanya gwenyine ahu Ekiijutsyo kiraabe. Ebibiina birengire ahari kimwe byaba nibiza kukoresa Ekyombeko ky’Obukama kimwe, ni kikuru kwija omu bwire kandi bwanyima y’omukoro tukarahuka kugyenda, obu obwire oburi ahagati y’enteerane ezi burikuba buri bukye. Hashemereire kubaho entebeekanisa kugira ngu hatabaho omwijuro gw’abantu n’ebiiruka aheeru y’ekyombeko.
◼ Obupapura bw’Okweta Abantu: Ababuurizi boona baine obupapura obw’okweta abantu, kandi nibeetegyereza gye ebiriho? Wayegyerizemu oku oraagabe akapapura aka? Ni baahi abu oraahe akapapura aka? Entebeekanisa zishemereire kukorwa kugira ngu obupapura bwona bugabwe.
◼ Eby’Engyenda: Abeegi ba Baibuli hamwe n’ab’eishe-emwe abamwe nibabaasa kuba nibeetenga obuhwezi omu by’engyenda nari obundi buhwezi. Ni ntebeekanisa ki ezikozirwe okubahwera?
◼ Omugaati na Viinyo: Mutarabyamu omugaati na viinyo eizooba ritakarengire. Entebeekanisa zishemereire kukorwa kureeba ngu omugaati na viinyo byatwarirwa owaashukirweho amajuta weena otaabaasa kuhika aha mukoro ogu ahabw’amagara mabi. Omugaati na viinyo ebihikire bishemereire kutungwa kandi bikatebeekanisibwa kare.—Reeba Watchtower eya Febwari 15, 2003, orupapura 14-15, akacweka 14, 17.
◼ Ekyombeko ky’Obukama: Ekyombeko ky’Obukama kishemereire kubonezibwa gye bukiri kare. Amasohaani, ebikopo nari amagiraasi ga viinyo, emeeza eringaniire n’ekitambaara ky’emeeza bishemereire kureetwa omu mwanya gw’Ekiijutsyo kandi bikatebeekanisibwa kare. Ogundi mwanya ku guraabe niguza kukoresibwa, muhamye ngu hariyo ebyoma ebirikutunguura gye amaraka kugira ngu buri omwe abaase kuhuurira omugambi. Ab’okwakiira abantu n’ab’okurabyamu omugaati na viinyo bashemereire kutooranwa kandi bakagambirwa ebi baine kukora bukiri kare, oku ebintu biraagyende, n’oku baine kujwara n’okureebeka.
Aha mukoro ogu omukuru munonga, okwijuka okufa kwa Yesu Kristo, nitwenda kuba twetebeekaniise gye nk’ekibiina kandi na buri muntu okwe. Buzima, emigisha ya Yehova neija kutungwa abo boona abarikworeka okusiima ahabwa Yehova kuhayo Omwana we omukundwa, Yesu Kristo, nk’ekitambo ahabw’abantu.