Yegyesa omu Muringo Gworobi
1. Ni muringo ki ogumwe omukuru ogw’okwegyesa gye?
1 Okwegyesa omu muringo gworobi ni kikuru omu kuhwera abantu kwega. Okuta omutima aha ku Yesu, Omwegyesa Omukuru yaayegyeise, nikibaasa kutuhwera kwongyera kuboneza omu ku ‘turikwegyesa.’—2 Tim. 4:2, NW; Yoh. 13:13.
2. Niki ekirikutwarirwa omu kwegyesa omu muringo gworobi, kandi okwegyesa nk’okwo nikukwata kuta aha bantu?
2 Koresa Ebigambo Byorobi: Orubazo rwa Yesu orw’aha rushozi orurimu amazima agarikukira agu abantu baraagambire, rukaheebwa omu muringo gworobi. (Mat., eshu. 5-7) Abantu baingi abaabaire bahurikiize Yesu ‘bakatangaarira okwegyesa kwe.’ Abakuru b’abaserukare abaayohereziibwe kumukwata bakahika n’aha kugira bati: “Tihakabahoga muntu orikugamba nk’ogu mushaija!” (Mat. 7:28, 29; Yoh. 7:46) Titurikwetenga kukoresa ebigambo bigumire, nari eby’okureeberaho ebiraingwa kubaasa kureetera abandi kwikiriza amazima. Nitubaasa kushoboorora gye amazima turikukoresa ebigambo ebirikumanywa gye.
3. Ahabw’enki abamwe nibateeraho kwegyesa ababahurikiize ebintu bingi omurundi gumwe, kandi eki nikibaasa kwetantarwa kita?
3 Oteegyesa Bingi Omurundi Gumwe: Yesu akaba abanza kuteekateeka aha bu yaabaire aba naaza kwegyesa reero abona kucwamu obwingi bw’ebi araabeegyese. (Yoh. 16:12) Twine kwetegyereza abo abu turikubuurira, na munonga twaba nitubuurira abanyabuzaare, abaana, nari abarikwenda kumanya ebirikukiraho. Titushemereire kubeegyesa bingi omurundi gumwe n’obu baakuba nibafayo kuhurikiza gye. Abo ab’emitima mirungi nibaija kweyongyera kutunga okumanya okuhikire okurikukwata ahari Yehova, Ruhanga ow’amazima.—Yoh. 17:3; 1 Kor. 3:6.
4. Ahabw’enki ni kikuru kuta omutima aha nshonga enkuru okukira okugamba ahari bingi?
4 Ta Omutima aha Nshonga Enkuru: Yesu akaba atagamba aha bintu bingi kugumisa ebi yaabaire aba naayegyesa. Obu yaagira ngu: “Abari omu bituuro boona [abarikwijukwa] . . . baryarugamu,” bukaba butari bwire bw’okushoboorora aha bantu b’emiringo ebiri abaakuzookire. (Yoh. 5:28, 29) Twaba nitwegyesa abantu Baibuli, tushemereire kuta omutima aha nshonga enkuru kandi twerinde omuze gw’okureetamu enshonga ezindi ez’aheeru y’eishomo.
5. Ni birungi ki ebi turaatungye ku turaayegyese omu muringo gworobi?
5 Ka twine okushemererwa ahabwa Yehova okutwegyesa ebi twine kumanya byona omu muringo gworobi! (Mat. 11:25) Twena ka tumariirire kwegyesa omu muringo gworobi reero tutungye okushemererwa okurikuruga omu kubuurira.