Ebintu Bishatu Ebirikutuhwera Kwongyera Kwegyesa Gye
1. Ahabw’enki twine kuteeraho kwongyera kwegyesa gye?
1 Ababuurizi boona baine kuba abeegyesa. Twaba nitubuurira, turikugarukayo aha bu twabuuriire nari turikwegyesa abantu Baibuli, nituba nitwenda kubahwera kwetegyereza gye. Ebi turikwegyesa n’eby’omugasho munonga. Nitubahwera kwetegyereza “Ebyahandiikirwe ebirikwera,” ebirikubabaasisa kutunga ‘obwengye bw’okubahabura omuhanda gw’okujunwa.’ (2 Tim. 3:15) Ogu ka n’omugisha gw’omutaano! Ebi nibyo bintu bishatu ebiraatuhwere kwongyera kwegyesa gye.
2. Nitubaasa kwegyesa tuta omu muringo gworobi?
2 Yegyesa omu Muringo Gworobi: Twaba nitumanya gye ekintu, nitubaasa kutateekateeka ngu kigumire munonga aha ndiijo otakakimanyire. N’ahabw’ekyo waaba nooyegyesa omuntu Baibuli, yetantare kugamba aha nshonga nyingi ezitarikwetengyesa. Beitu gamba aha nshonga enkuru zonka. Okukoresa ebigambo bingi tigwo muringo murungi gw’okwegyesamu. (Enf. 10:19) Ni kirungi kushoma ebyahandiikirwe byonka ebirikushagika enshonga enkuru. Waashoma ekyahandiikirwe, ta omutima aha bigambo byakyo ebirikuhikaana n’ebi murikwegaho. Omu rubazo orw’aha rushozi oruri omuri Matayo eshuura 5 kuhika 7, Yesu akeegyesa amazima omu muringo gworobi, kwonka tarakoreise bigambo bingi.
3. Eby’okureeberaho nibihwera bita, kandi ni biiha ebirungi?
3 Eby’okureeberaho: Eby’okureeberaho nibihwera omuntu kuteekateeka n’okuguma naijuka. Eky’okureeberaho kirungi tikishemereire kuba kiraingwa nk’ekitebyo. Yesu akaba akoresa eby’okureeberaho bigufu kandi ebyorobi. (Mat. 7:3-5; 18:2-4) Noobaasa n’okuteera ebishushani aha rupapura ebyorobi kwetegyereza. Waatebeekanisa gye noobaasa kutunga eby’okureeberaho birungi.
4. Nitubaasa kukoresa tuta ebibuuzo omu muringo murungi?
4 Ebibuuzo: Ekigyendererwa ky’okubuuza omwegi n’okwenda ngu ateekateekye. N’ahabw’ekyo waamubuuza, tegyerezaho kakye. Waaba niiwe waagarukamu ekibuuzo, torikwija kumanya eki omwegi buzima arikwetegyereza. Yaagarukamu ekigwire, noobaasa kumuhwera kwemanyira ekihikire orikumubuuza ebibuuzo ebindi. (Mat. 17:24-27) Twena nitwetenga kwongyera kwegyesa gye. Nikyo Baibuli erikutuhigira kuta omutima aha muringo ogu turikwegyesamu. Twakora tutyo, itwe n’abu turikwegyesa nitwija kutunga amagara agatahwaho.—1 Tim. 4:16.