Oruteerane Oruhango orw’Ekiro Kimwe Orwa 2010
1. (a) Ni mitwe ki kuruga omu Byahandiikirwe ey’enteerane ez’ekiro kimwe eyashobooroirweho omu myaka ehweire? (b) Hariho ebyabaire byagambirweho omu nteerane empango ez’ekiro kimwe ebikuhweraire omu kubuurira?
1 “Manya Ebirikukira Obukuru,” “Okwemerera Tuhamire nk’ab’Ekitsibo Kimwe,” “Guma Noohamya Amazima,” na “Itwe Turi Eibumba—Yehova Niiwe Mubumbi Waitu.” (Fil. 1:9, 10, 27; Yoh. 18:37; Isa. 64:8) Egi n’emwe aha mitwe mingi ey’enteerane empango ez’ekiro kimwe erashobooroirweho. Oine ekihika ky’okuza omu ruteerane oruhango orw’ekiro kimwe orw’omwaka gw’obuheereza ogwa 2010? Nirwija kuba rwine omutwe: “Obwire Obutsigaireyo Ni Bukye,” kuruga omu 1 Abakorinso 7:29.
2. Nitubaasa kwetebeekanisiza tuta oruteerane oru orw’ekiro kimwe twine omuhimbo?
2 Ekiro ky’oruteerane oruhango orw’ekiro kimwe ku kiraarangwe omu kibiina kyanyu, tandikiraho kurwetebeekanisiza n’omuhimbo. Abazaire abamwe nibahwera abaana baabo kwetebeekanisiza oruteerane oru barikubooreka ebiro ebi ruraabeho kandi baahandiika n’ebyo ebi baraije kwetenga aha ruteerane orwo reero baguma nibaijuka n’ebiro ebitsigaireyo. Omu Kuramya kwanyu okw’Eka, nimubaasa kweijutsya bimwe aha by’enteerane empango ez’ekiro kimwe ez’enyima. Kandi iwe n’ab’omu ka yaawe nimubaasa kutebeekanisa emitima yaanyu ahabw’oruteerane oru murikweijutsya ebiri omu kitabo Benefit From Theocratic Ministry School Education, aha rupapura 13-16, kubaasa ‘kuta omutima aha ku murikuhurikiza.’—Luka 8:18, NW.
3. Nitubaasa kugasirwa tuta omu nshonga eziraagambweho omu ruteerane oruhango?
3 Gyendera aha Bi Orikwega: “Oruteerane oru ka rwaba ruri rurungi!” Ebigambo nk’ebi nibikira kugambwa bwanyima y’Oruteerane oruhango. Buzima eki nikiba kihikire obu rurikuba ruri kimwe aha birungi ebi Yehova arikutuha. (Enf. 10:22) Ebi oraayege kubaasa kurugamu ebirungi, oine kubiteekateekaho munonga kandi okaguma nobiijuka. (Luka 8:15) Waaba noogaruka omuka, twara obwire ogaaniire n’eka yaawe nari n’ab’eishe-emwe abu ori nabo omu motoka aha byagambwaho omu ruteerane. Mugaaniire aha bigyendererwa byanyu buri omwe hamwe n’ebyo ebiraabahwere omu kubuurira kwanyu. Okugaaniira aha nshonga ezi nikiija kukugasira omu biro by’omumaisho bwanyima y’oruteerane.—Yak. 1:25.
4. Ahabw’enki oruteerane oru oruhango ruraabe orw’omugasho ahariitwe?
4 Butoosha nituhurira gye ku turikutunga ekiconco kyenyine eki turikuba nitwetenga. Twine ekihika ahabw’ebyo ebi Yehova atutebeekanisiize omu ruteerane oruhango orw’ekiro kimwe orurikwija? Nituhamya ngu nirwija kutugasira omu miringo yoona. Twine amatsiko kutunga bingi kuruga ahari Yehova Tataitwe ow’omu iguru arikutugaruramu amaani kandi akatutendeka ahabw’omurimo ogu atuhaire kukora.—2 Tim. 4:2; Yak. 1:17.