‘Eby’Okurya omu Bunaku Obuhikire’
1 Bwanyima y’okuruga omu ruteerane oruhango orw’ekiro kimwe, nitukira kugira tuti: “Ekyo nikyo twaba nitwetenga kyenyine.” Omureeberezi w’ekyanga omwe akagira ngu bamwe omu kyanga kye ku baarugire omu ruteerane oruhweire, bakagira ekyetengo ky’okwenda kwongyera kwejumba omu kubuurira. Omureeberezi w’ekyanga ondiijo akagira ati: “Rukatuhwera kuteekateeka munonga aha bwire obu turimu turikuteeraho kureeba n’ebi twine kwebembeza omu magara gaitu.” Kandi n’ondiijo akagira ati: “Ababuurizi baingi bakagira ngu oku kwaba kuri okubaijutsya ngu baine kwemarira aha kirikukirayo obukuru, nigwo murimo gw’okubuurira.” Oruteerane oruhango orw’ekiro kimwe rukakuhwera ruta?
2 Oruteerane oruhango orw’ekiro kimwe orw’omwaka gw’obuheereza ogurikwija narwo nirwija kuba rurimu byenyine ebi turikwetenga. Rwine omutwe ‘Yesigye Yehova,’ kuruga omu Zaaburi 118:8, 9. Ezi ni zimwe aha mbazo eziraaheebwe omu ruteerane orwo: “Oku Yehova Ari Obuhungiro Bwaitu omu Bwire bw’Oburemeezi,” “Hwera Abandi Kuhungira Ahansi y’Amapapa ga Yehova,” “Tooreza Yehova omu Kuha Abandi Obuhungiro,” “Abaana, Muhindure Yehova Obwesigye Bwanyu!” na “Paradiso Yaitu y’Eby’Omwoyo—n’Obuhungiro obu Yehova Arikutuha.”
3 Oku Turikubaasa Kugasirwa omu Ruteerane Orwo: Ku oraamanye ebiro obu oruteerane orwo ruraabeho, kora entebeekanisa kurubamu kandi oyete n’abeegi baawe ba Baibuli. Okubaasa kuguma ‘nitwana ebyana n’okugumisiriza,’ twine kuguma nitwijuka ebi turikuhurira. (Luk. 8:15) N’ahabw’ekyo hurikiza gye omu ruteerane oru, kandi handiika enshonga eziri nkuru n’ebyo ebi orikwenda kugyenderaho omu magara gaawe n’omu buheereza. Bwanyima y’okuruga omu ruteerane orwo gira obwire iwe n’ab’omu ka yaawe mugaaniire aha bi muraabe mwegire kandi oreebe oku orikubaasa kubigyenderaho n’eka yaawe.
4 Nk’oku eby’okurya ebinuzire kandi ebirikuha amaani birikuba bitebeekanisiibwe gye, n’oruteerane oruhango orw’ekiro kimwe orw’omwaka ogurikwija rutebeekanisiibwe gye na rukundo mpango. Nitushaba ngu Yehova abahe omugisha omu kuteeraho kwanyu kwija kubaho n’okugasirwa omu ruteerane orwo orwine omutwe ‘eby’okurya omu bwire obuhikire’ oruraahwere Abakristaayo ababuurizi omu by’omwoyo.—Mat. 24:45.
[Ebibuuzo by’obucweka]
1. Oruteerane oruhango orw’ekiro kimwe orwahweire rukakuhwera ruta hamwe n’abandi?
2. Ni mbazo ki eziraaheebwe omu ruteerane oruhango orw’ekiro kimwe orw’omwaka gw’obuheereza ogurikwija?
3. Nitubaasa kugasirwa tuta omu bwijwire twabaho omu ruteerane oruhango orw’ekiro kimwe?
4. Ahabw’enki tushemereire kugira ekihika ky’okuba omu ruteerane oruhango orw’ekiro kimwe orw’omwaka ogurikwija?