‘Ebi Ruhanga Akunda Bikorwe’
1. Omutwe gw’oruteerane oruhango orw’ekiro kimwe orw’omwaka gw’obuheereza 2012 ni guuha, kandi ahabw’enki ni kikuru kugamba aha nshonga egi?
1 Tukahangwa ahabw’okukunda kwa Yehova. (Kush. 4:11) N’ahabw’ekyo, kikaabaire kitarikubaasika kuhikiiriza ekigyendererwa ky’okubaho kwaitu twaba tuteegire kandi tukakora ebi Ruhanga arikukunda. Eki tikyorobi ahabw’okuba twine kurwanisa ekyetengo ky’okukora “ebi emibiri yaitu n’ebiteekateeko byaitu byetenga” nari kukora “ebi abanyamahanga bakunda.” (Efe. 2:3; 1 Pet. 4:3; 2 Pet. 2:10) Twaba tutaine buhwezi bwa Ruhanga, nituba turi omu kabi ‘k’okukwatwa [Omuregi] tuhuriire’ kukora ebi akunda. (2 Tim. 2:26) Oruteerane rwaitu oruhango orw’ekiro kimwe orw’omwaka gw’obuheereza 2012, nirwija kuhwera buri omwe ahariitwe kukora ebirikuhikaana n’ekicweka kya kashatu eky’omu shaara ya Tataitwe. Omutwe gwarwo ni ‘Ebi Ruhanga Akunda Bikorwe.’—Mat. 6:9, 10.
2. Ni bibuuzo ki ebiraagarukwemu omu ruteerane oruhango orw’ekiro kimwe?
2 Ebibuuzo Ebiraagarukwemu: Waaba ori omu ruteerane oru teeraho kuhurikiza gye obaase kutunga eby’okugarukamu by’ebibuuzo ebi: Niki ekindi ekikuru eki twine kukora oyihireho okuhurira Ekigambo kya Ruhanga? Nitubaasa kuguma nitwetegyereza tuta eki ekigyendererwa kya Ruhanga ahabwaitu kiri? Ahabw’enki twine kuhwera abantu b’embeera zoona twekundiire? Nitubaasa kutunga tuta amagara agarimu okumarwa? Eminyeeto, niki eki mwine kuhamiza Yehova? Ni migisha ki erikuruga omu kukora ebi Ruhanga akunda? Ahabw’enki ni kikuru okwombeka n’okugaruramu abandi amaani?
3. Nitubaasa kugasirwa tuta omu bwijwire omu ruteerane oruhango orw’ekiro kimwe?
3 Hamya ngu waaba omu ruteerane oru kandi waahurikiza gye. Ow’eishe-emwe kuruga aha Beseeli nari omureeberezi orikutaayaayira ebibiina naabaasa kuba aha ruteerane orwo kuha embazo. Oruteerane rutakatandikire na bwanyima yaarwo noobaasa kugaaniira nawe nari n’omukazi we yaaba amwine. Mwagaruka omuka, ‘mutakaayebwa ebi mwahurira,’ kwonka buri omwe nari nk’eka mweyijutsye ebi mwayega kandi mugaaniire aha ku murikubaasa kweyongyera kukora ebirikuhikaana n’ebi Ruhanga akunda.—Yak. 1:25.
4. Ahabw’enki kiri kikuru munonga kwebembeza okukora ebi Ruhanga akunda?
4 Juba abo abarikwesherurira ebyabo kandi abarikwanga kukora ebi Ruhanga akunda nibaija kucwekyerezibwa. (1 Yoh. 2:17) N’ahabw’ekyo nitusiima okureeba ngu omu ruteerane oru, Yehova atutebeekanisiize ebiraatuhwere kwebembeza okukora ebi akunda!