Ekigambo kya Ruhanga Kiine Omugasho gw’Okwegyesa

1. Omutwe gw’oruteerane orw’ebiro bibiri omu mwaka gw’obuheereza 2014 niguuha kandi ni kibuuzo ki ekiraije kugarukwamu?

¹ Yehova ‘Orikutwegyesa,’ niwe mwegyesa omukuru omu nsi yoona. (Isa. 30:20, 21) Mbwenu shi Yehova naatwegyesa ata? Atuhaire ekitabo ekirikukira ebindi byona—Ekigambo kye Baibuli. Ebi turikwega kuruga ahari Ruhanga nibitugasira bita omu by’omubiri, omu biteekateeko, omu nyehurira n’omu by’omwoyo? Nitwija kutunga eky’okugarukamu ky’ekibuuzo eki aha ruteerane orw’ebiro bibiri omu mwaka gw’obuheereza 2014. Oruteerane orwo nirwija kugira omutwe, “Ekigambo kya Ruhanga kiine Omugasho gw’Okwegyesa,” kuruga omu 2 Timoseo 3:16.

2. Enshonga enkuru omu ruteerane oru niziija kuruga omu by’okugarukamu bya bibuuzo ki?

² Sherura Enshonga Enkuru Ezi: Enshonga enkuru omu ruteerane oru niziija kugambwaho omu by’okugarukamu by’ebibuuzo ebiri ahaifo:

• Nitukwatwaho tuta ebi turikwega kuruga ahari Ruhanga? (Isa. 48:17, 18)

• Twateeraho kukora empindahinduka kubaasa kuheereza Yehova omu buheereza obw’obutwire, twine kugira buhame ki? (Mal. 3:10)

• Tushemereire kukora ki twahurira ‘enyegyesa ezirikubaasa kutuhabisa’? (Heb. 13:9)

• Nitubaasa kutooreza tuta Yesu omu ‘muringo ogu yaabaire naayegyesamu’? (Mat. 7:28, 29)

• Ahabw’enki abarikwegyesa omu kibiina baine kweyegyesa? (Rom. 2:21)

• Ekigambo kya Ruhanga kiine mugasho ki? (2 Tim. 3:16)

• Abantu nibakwatwaho bata ‘okutengyetsibwa’ kw’amahanga? (Hag. 2:6, 7)

• Yehova atwinemu bwesigye ki? (Efe. 5:1)

• Ahabw’enki twine kuteeraho kuguma omu kwegyesa kwa Yehova? (Luk. 13:24)

3. Ahabw’enki ni kikuru kubaho aha ruteerane orwo kandi tukahurikiza gye?

³ Omu 2 Timoseo eshuura 3, entumwa Paulo atakahandiikire ebigambo ebiri omu mutwe gw’oruteerane oru, akagamba aha biro by’akabi kingi ebyabaire nibiija kubaho omu biro by’emperu. Akahandiika ati: “abantu babi, abarikwegira oku batari, baryayeyongyera kuba babi nibabeihabeiha, kandi nibabeihwabeihwa.” (2 Tim. 3:13) Okwenda ngu tutahabisibwa, ka ni kikuru kuhurikiza kandi tukagyendera aha bi Yehova ari kutwegyesa! N’ahabw’ekyo, twine kuteeraho kuba omu ruteerane orwo kandi tukahurikiza gye.