Rinda Ebiteekateeko Byawe
1. Omutwe gw’oruteerane orw’ebiro bibiri orw’omwaka gw’obuheereza 2013 ni guuha, kandi rutebeekanisiibwe ahabwa kigyendererwa ki?
1 Yesu akagambira abeegi be kukunda Yehova n’omutima gwabo gwona, n’amagara gaabo goona n’ebiteekateeko byabo byona. (Mat. 22:37, 38, NW) Oruteerane orw’ebiro bishatu, orw’ebiro bibiri n’orw’ekiro kimwe ez’omwaka ogu zitebeekanisiibwe kutuhwera kukora ekyo. Oruteerane orw’ebiro bishatu rwine omutwe, “Rinda Omutima Gwawe!” Oruteerane orw’ekiro kimwe orw’omwaka gw’obuheereza 2013 rwine omutwe, “Rinda Omuntu Waawe w’Omunda.” Kandi orw’ebiro bibiri rwine omutwe, “Rinda Ebiteekateeko Byawe,” kuruga omuri Matayo 22:37, NW. Oruteerane orwo rutebeekanisiibwe kuhwera buri omwe ahariitwe kureeba ngu ebi arikuteekateeka nibishemeza Yehova.
2. Ni bibuuzo ki ebiraagarukwemu omu ruteerane orw’ebiro bibiri?
2 Bimwe aha Biraabe omu Ruteerane Orwo: Omu ruteerane orwo tushemereire kutaho omutima kuhurira oku ebibuuzo ebi ebirikworeka enshonga enkuru biraagarukwemu:
• Nitubaasa kwetantara tuta ‘emiteekateekyere y’abantu’?
• Nitubaasa kwihaho tuta ekishwekire ebiteekateeko by’abatarikwikiriza Ruhanga?
• Ni miteekateekyere ki ei tushemereire kugira?
• Okuteekateeka munonga okurungi nikurugamu ki?
• Nitubaasa kwikiriza tuta Ruhanga kubumba emiteekateekyere yaitu?
• Abashaija n’abakazi baabo, abazaire hamwe n’abaana nibabaasa kureeta bata okushemererwa omu ka?
• Nitubaasa kwetebeekanisiza tuta ekiro kya Yehova?
• Nikimanyisa ki okwezirika kurinda ebiteekateeko byaitu ahabw’obuheereza?
• Abo abarikugyendera aha bi barikwega nibagasirwa bata?
3. Ahabw’enki ni kikuru ngu tube aha ruteerane orwo ebiro byombi, tuhurikize gye kandi tugyendere n’aha bi turaayege?
3 Sitaane naateeraho munonga kushiisha ebiteekateeko byaitu. (2 Kor. 11:3) N’ahabw’ekyo, twine kuteeraho munonga kurinda ebiteekateeko byaitu kugira ngu tushemeze Yehova. Twine kugumizamu nituteeraho kugira emiteekateekyere nk’eya Kristo kandi tukateeraho munonga kwetantara emiteekateekyere mibi y’ensi egi. (1 Kor. 2:16) Teeraho kubaho ebiro byombi eby’oruteerane orwo kandi ohurikize gye. Ku turaagyendere aha buhabuzi oburaheebwe omu ruteerane orwo, nikiija kutuhwera kurinda ebiteekateeko byaitu reero tukabuurira amakuru g’Obukama n’obweziriki.—1 Pet. 1:13.