Entebeekanisa Eyatairweho Ahabw’Abakristaayo Ababuurizi
1 Omu mwaka ogwa 1938, ekibiina kya Yehova kikatandikaho entebeekanisa nsya. Ebibiina bikaba byetwa kuza omu ruteerane oruhango orwa zooni hati orurikwetwa oruteerane rw’ekyanga. Ahabwa kigyendererwa ki? Akapapura Informant aka Jenwari 1939 (hati akarikwetwa Obuheereza Bwaitu obw’Obukama) kakagarukamu kati: “Enteerane ezi ni zimwe aha ntebeekanisa z’Ekibiina kya Yehova eziriho ahabw’omurimo gw’Obukama. Obuhabuzi oburikuheebwa omu nteerane ezi nibuhwera buri omwe kukora gye omurimo ogutuhairwe.” Twateekateeka aha kweyongyera kw’omubaro gw’ababuurizi b’Obukama kuruga aha babuurizi 58,000 bonka omu 1938 okuhika aha babuurizi abarikurenga 7,000,000 omu 2009, nikireebeka butunu ngu enteerane z’ekyanga nizihikiiriza ekigyendererwa ky’okuhwera ababuurizi “kukora omurimo ogubahairwe”!
2 Omutwe gw’Oruteerane orw’Omwaka Ogurikwija: Twine ekihika ky’okuba omu ruteerane rw’ekyanga oruraabeho kutandika na Sebutemba oruratugaruremu amaani. Omutwe gw’oruteerane orwo ogurikugira ngu “Timuri b’Ensi” niguruga omuri Yohaana 15:19. Ni mbazo ki ezimwe eziraagasire Abakristaayo ababuurizi? Aha Rwamukaaga nitwija kuhurikiza orubazo “Obuheereza bw’Obwire Bwona Nibuturinda—Buta?” Kandi nitwija kugasirwa omu mutwe “Otaikiriza Kushiishwa . . .” ogurimu ebicweka bishatu ebi: “Enyamaishwa,” “Maraaya Omukuru,” na “Abashuubuzi b’Ensi.” Aha Sande nitwija kuhurikiza omutwe ogurimu ebicweka ogurikugira ngu “Kunda Yehova, Beitu Etari Nsi.” Zimwe aha mbazo ezindi ni: “Mugumizemu nk’Abashuhuuki Kandi Abatuuzi b’Obwire Bukye,” na “Gira Obumanzi! Noobaasa Kusingura Ensi.”
3 Munyaanyazi-itwe omwe owaabaire atakyejumba munonga omu kubuurira ku yaarugire omu ruteerane rw’ekyanga oruhererukire kubaho, akahandiika arikugira ngu oruteerane orwo rukamureetera kushwijuma embeera ze n’okumariirira “kwejumba munonga omu kubuurira kandi n’okurekyeraho kwekwatsa!” Hatariho kubanganisa oruteerane rw’ekyanga orw’omwaka gw’obuheereza omusya nirwija kutuhwera twena kugumizamu nitukunda Yehova omu mwanya gw’okukunda ensi. (1 Yoh. 2:15-17) Teeraho kureeba ngu waabaho kandi waahurikiza gye, kubaasa kugasirwa munonga omu ntebeekanisa egi eya rukundo y’okuhwera Abaakristayo ababuurizi!
[Ebibuuzo by’obucweka]
1. Ni ntebeekanisa ki nsya eyatandikirweho omuri 1938, kandi ahabwa kigyendererwa ki?
2. Ni mbazo ki eziraaheebwe omu ruteerane rwaitu rw’ekyanga orw’omwaka gw’obuheereza omusya?
3. Nitubaasa kugasirwa tuta twaza omu ruteerane rw’ekyanga?