Puroguramu y’Oruteerane rw’Ekyanga Orwa 2009

Nitubaasa tuta kuguma tuhamire twaba nituhakanisibwa abo abarikwanga okuramya okw’amazima? Nitubaasa tuta kusingura Sitaane orikuteeraho butoosha kutugarura omu nsi? Omu ruteerane rw’ekyanga orw’omwaka gw’obuheereza ogwa 2009, ebibuuzo bikuru ebi nibiija kugarukwamu. Omutwe gw’oruteerane ni ‘Guma Osinguze Ekibi Ekirungi.’ (Rom. 12:21, NW) Teekateeka aha bi turaije kwega omu ruteerane orwo.

Omureeberezi wa disiturikiti naija kuha embazo ezi, “Okugira Ebirikutubaasisa Okusinguza Ekibi Ekirungi,” “Yetantare Okweyesiga Munonga!,” “Obubi bwona Buri Haihi Kuhwaho!,” na “Okugumya Okwikiriza Kwaitu Okubaasa Kusingura Ensi.” Omureeberezi orikutaayaayira ebibiina naija kuha embazo ezi, “Hati Nibwo Bunaku bw’Okuguma Nitureeba!,” orwegami aha Abarooma 13:11-13, na “Reka Kuhwa Amaani omu Bwire bw’Oburemeezi,” orwegami aha Enfumu 24:10. Twine n’ekihika kuhurira Omureeberezi orikutaayaayira ebibiina naagamba aha “Byetengo by’Ekyanga.” Orubazo orundi orurikugaruramu amaani nirwija kuba rwine omutwe “Noobaasa ‘Kwezirika Kuheereza’​—Orikuheereza nka Payoniya?” Orubazo rw’okubanza aha mbazo ibiri ezirikuheebwa omu bicwekacweka rwine omutwe “Mwemerere Muhamire Mutasingurwa Obugobya bwa Sitaane.” Nirwija kutuhwera okumanya n’okwetantara emitego ya Sitaane erikwizira omu by’entunguuka, eby’okweshemeza n’omu by’obwegyese. Orubazo rwa kabiri orwine omutwe “Tunga Amaani Okubaasa Kuguma Ohamire omu Biro Ebi Ebibi” nirwija kutworeka oku turikubaasa kweyongyera kugyendera gye aha buhabuzi oburi omu Abaefeso 6:10-18.

Hariho akakwate ahagati y’okusingura ekibi kurugira kimwe aha ntandikiro yaakyo hamwe n’okubuurira amakuru g’Obukama. (Kush. 12:17) Tikirikutangaaza okureeba ngu Sitaane narwanisiza kimwe Abajurizi ba Yehova! (Isa. 43:10, 12) Kwonka Omuregi buzima naija kuremerwa kimwe ahakuba tumaririire ‘kugumizamu nitusinguza ekibi ekirungi.’ Kora entebeekanisa kubaho omu ruteerane oru obaase kugasirwa ebicweka byona bina.