Puroguramu y’Oruteerane rw’Ekyanga Orwa 2008

Yehova ashemereire kuhimbisibwa. Yehova nitumuhimbisa tuta? Ahabw’enki abamwe nibagumirwa kuhimbisa Yehova? Ni migisha ki ei abarikuhimbisa Yehova barikutunga omu bunaku obu? Puroguramu y’oruteerane rw’ekyanga ey’omwaka gw’obuheereza ogwa 2008 neija kugarukamu gye ebibuuzo ebi. Rwine omutwe, “Mukore Byona Okuhimbisisa Ruhanga.” (1 Kor. 10:31) Teekateeka aha bi turaije kwega omu ruteerane orwo orw’ebiro bibiri.

Omureeberezi wa disiturikiti naija kugamba aha bintu nka, “Ahabw’enki Tushemereire Kuhimbisa Ruhanga?” na “Ba eky’Okureeberaho Kirungi omu Kuhikiiriza Ebi Ruhanga Arikutwenza.” Naija kuha orubazo rwa boona orwine omutwe, “Ni baahi Abarikuhimbisa Ruhanga?,” n’orurihendera, “Nibahimbisa Yehova Hamwe Omu Nsi Yoona.” Naija n’okwebembera Eishomero ry’Obuheereza. Omureeberezi orikutaayaayira ebibiina naija kugamba aha mitwe egi: “Shemerererwa Okworeka Ekitiinisa kya Ruhanga,” “Ebyetengo by’Ekyanga,” na “Guma Ohamiire omu Mazima,” orwegami ahari 2 Petero 1:12. Oyihireho ebyo, nitwija kwega oku “Okuheereza nka Payoniya Kurikuhimbisa Ruhanga.” “Okuhimbisa Ruhanga Omuri Byona Ebi Turikukora,” orubazo rw’okubanza aha mbazo ibiri eziriheebwa abagambi batari bamwe omu bicweka, nirwija kworeka gye amakuru agari omu bigambo ebiri omu 1 Abakorinso 10:31. Orubazo rwa kabiri orwine omutwe, “Obuheereza Oburikuhimbisa Yehova” nirwija kushoboorora ebintu bingi ebirikukwata aha kuramya kwaitu. Nitwija kugira Watchtower omu bugufu kandi tushwijume ekyahandiikirwe ekya buri izooba aha Sande. Nihaija kubaho n’okubatizibwa.

Abantu abarikukira obwingi nibanga kwikiriza Ruhanga. Baingi bahugiibwe entebeekanisa z’abantu bataahi baabo, batyo baremwa kucumitiriza aha by’okutangaaza ebi Ruhanga akozire. (Yoh. 5:44) Kwonka itwe nitumanya obukuru bw’okutwara obwire tukateekateeka aha ku “Twakukora Ebintu Byona Okuhimbisisa Ruhanga.” Tebeekanisa kubayo n’okugasirwa ebicweka byona bina.