Ekigambo kya Ruhanga Kiine Amaani
1. Omutwe gw’oruteerane orw’ekiro kimwe omu mwaka gw’obuheereza 2014 niguuha?
1 Oyihireho ebi abantu barikubaasa kukora, Baibuli eine amaani g’okuhindura ebiteekateeko byaitu n’emitwarize yaitu kuhikaana n’ebi Yehova akunda. Ekigambo kya Ruhanga kiine amaani garikwingana ki? Nitubaasa kuhwerwa tuta amaani g’Ekigambo kya Ruhanga? Nitubaasa kukoresa gye tuta Ekigambo kya Ruhanga kuhwera abandi? Twine amatsiko ngu buri omwe naija kwombekwa omu by’omwoyo ebibuuzo ebi byaba nibigarukwamu aha ruteerane orw’ekiro kimwe omu mwaka gw’obuheereza 2014. Oruteerane orwo nirwija kugira omutwe “Ekigambo Kya Ruhanga Kiine Amaani,” kuruga omu Abaheburaayo 4:12.
2. Tushemereire kuhurikiza eby’okugarukamu by’ebibuuzo biiha?
2 Sherura Enshonga Enkuru Ezi: Waaba noohurikiza puroguraamu, handiika eby’okugarukamu by’ebibuuzo ebiri ahaifo.
• Ahabw’enki tushemereire kuta obwesigye omu Kigambo kya Yehova? (Zab. 29:4)
• Nitubaasa kukora ki kureeba ngu amaani g’Ekigambo kya Ruhanga gaakora omu magara gaitu? (Zab. 34:8)
• Noobaasa kukoresa ota amaani g’Ekigambo kya Ruhanga omu kubuurira? (2 Tim. 3:16, 17)
• Nitubaasa tuta kwetantara emitego y’ensi erikutegyekwa Sitaane? (1 Yoh. 5:19)
• Iwe nk’omunyeeto noobaasa ota ow’eby’omwoyo? (Yer. 17:7)
• Nitubaasa tuta kugira amaani n’obu twakuba tutaine maani? (2 Kor. 12:10)
• Nitwetenga ki kuguma nitukora empindahinduka, n’obu twakuba tutwire twine emitwarize n’emiteekateekyere mibi kumara obwire buraingwa? (Efe. 4:23)
3. Ni miringo ki endiijo ei turaije kugasirwamu oyihireho okuhurikiza gye omu ruteerane orw’ekiro kimwe?
3 Ka nitwija kugasirwa munonga twahurikiza eby’okugarukamu by’ebibuuzo ebi! Okwongyera ahari ekyo, aha ruteerane orw’ekiro kimwe nk’oruteerane orw’ebiro bibiri n’orw’ebiro bishatu nitwija kutunga omugisha kugaaniira n’ab’eishe-emwe na banyaanyaziitwe kuruga omu bibiina ebindi. (Zab. 133:1-3; 2 Kor. 6:11-13) N’ahabw’ekyo, teeraho kugaaniira n’ab’eishe-emwe abu orikumanya kandi oteereho kumanya n’abandi. Haaba hariho omureeberezi orikutaayaayira ebibiina nari ow’eishe-emwe kuruga aha Beseeli otoorainwe kwija kuha embazo aha ruteerane orw’ekiro kimwe, ahabw’enki otarikuteeraho kumushemerererwa we n’omukazi we yaaba amwine? Buzima, twine enshonga nyingi ezirikutuhiga kubaho aha ruteerane oru orw’ekiro kimwe!