Puroguramu y’Oruteerane Oruhango orw’Ekiro Kimwe Orwa 2009

Oruteerane oruhango orw’ekiro kimwe orw’omwaka gw’obuheereza ogwa 2009 rwine omutwe ‘Ogume Oyezirikye Kuhitsya Obuheereza,’ kuruga omu Abakolosai 4:17. Nk’Abakristaayo nitutwara okwehanangiriza okwo nka kukuru. Ekigyendererwa kyaitu n’okuhikiiriza omurimo gwaitu gw’okubuurira n’obwesigwa, nk’oku Yesu yaakozire. (Yoh. 17:4) Entumwa Paulo nawe akatuteeraho eky’okureeberaho kirungi omu nshonga egi. Akaba amaririire kuhikiiriza omurimo gwe gw’okubuurira.​—Byak. 20:24.

Orubazo rw’omureeberezi orikutaayaayira ebibiina nirwija kworeka oku ababuurizi baingi barikusingura oburemeezi obu barikubugana omu kubuurira. Orubazo orwine omutwe “Reeberera Ebi Obyaire” nirwija kworeka buzima oku turikubaasa kuhwera abo ‘abarikwenda kutunga amagara agatahwaho.’ (Byak. 13:48) Omugambi orikuruga aha ofiisi y’eitaagi naija kubanza ashoboorore 2 Abakorinso 6:1-10, orunyiriri aha rundi, omu rubazo orwine omutwe “Oku Turikubaasa Kweyoreka nk’Ababuurizi.” Omu ihangwe, naija kuha orubazo orwine omutwe “Twara Obuheereza Bwawe nk’Ekintu Kikuru.” Buzima nimwija kukunda embazo ezi “Abato n’Abakuru Nibakunda Obuheereza” na “Eminyeeto Abarikuhikiiriza Obuheereza.” Abo abarikwenda kworeka okwehayo kwabo barikubatizibwa omu maizi omu nteerane ezi empango bashemereire kumanyisa orikwebembera akakiiko k’abareeberezi juba. Ekicweka kikuru omu nteerane zaitu empango n’okwega ebiri omu The Watchtower. Reeba ngu waija na Watchtower erikwija kushomwa saabiiti egyo eraabemu oruteerane oruhango orw’ekiro kimwe.

Omu kwezirika kuhikiiriza obuheereza bwaitu, nituteeraho okureeba ngu ebintu ebindi tibyatusiisira bwire obw’okukoreramu ebi Yehova atuhaire. Okugarurwamu amaani okurikuruga omu Byahandiikirwe okuribaho omu ruteerane oruhango oru orw’ekiro kimwe kushemereire kutuhwera twena kwetegyereza eki twine kukora okuguma nitureeba kandi nituteekateeka aha ki tushemereire kukora okubaasa kuhikiiriza gye obuheereza bwaitu.