Oyeteekateekire Kubuurira Kitaraariire?
1. Ni ky’okureeberaho ki ekirikworeka ngu okubuurira kitaraariire nikubaasa kurugamu ebirungi?
1 Okubuurira kitaraariire nikubaasa kurugamu ebirungi. Baibuli erimu eby’okureeberaho bingi eby’abantu ababuuriire kitaraariire kandi hakarugamu ebirungi. (Yoh. 4:7-15) Nitubaasa kukora ki okwetebeekanisiza okubuurira okw’omuringo ogu?
2. Enjwara yaitu n’oku turikweboneza nibibaasa kutuhwera bita kubuurira?
2 Enjwara n’Okweboneza: Twateeraho kujwara gye n’okweboneza omu muringo murungi obwire bwona, nikiija kutuhwera kubuurira abandi ebi turikwikiriza tutaine kutiina. (1 Tim. 2:9, 10) Endebeeka yaitu yaaba etarikuhaisa Yehova ekitiinisa, nitubaasa kutiina kubuurira. Kwonka, twaba tujwaire gye, nikibaasa kureetera abandi kwenda kumanya ahabw’enki tujwaire gye. Nk’eky’okureeberaho, omushaija n’omukazi we abajurizi ba Yehova bakaba bajwaire gye bari omu motoka bashutami aha rubaju rw’omushaija Omusiraamu. Omushaija ogwo ku yaareebire oku bajwaire, yaababuuza yaaba bari Abakristaayo. Ekyo kikarugamu okugaaniira ahari Baibuli kumara eshaaha ishatu.
3. Otooreize ota eky’okureeberaho kya Yesu omu kutandika kubuurira omuntu?
3 Okutandika Kubuurira Omuntu: Obu Yesu yaashanga Omusamariakazi aha iziba rya Yakobo, kubaasa kutandika kumubuurira, akabanza kumushaba amaizi g’okunywa. Naitwe nitubaasa kutandika kubuurira abantu, omu bugufu turikubabuuza ekibuuzo kyorobi. N’obu obumwe turikubaasa kutiina, twashaba Yehova okutuhwera, nitubaasa ‘kugira obumanzi’ bw’okutandika kubuurira.—1 Tes. 2:2.
4. Nitubaasa kwetebeekanisa tuta kubuurira kitaraariire?
4 Teeraho Kubuurira Kitaraariire: Ababuurizi baingi nibateeraho kubuurira kitaraariire. Teekateeka aha bantu abu orikubaasa kubugana buri izooba kandi oreebe oku orikubaasa kubabuurira. Gyenda n’ebitabo ebirikwetengwa hamwe na Baibuli. Yetegyereze embeera z’abantu kandi teeraho kugaaniira nabo. Waateekateeka kare aha bantu abu orikubaasa kubugana omu izooba, noija kuba oyetebeekaniise gye kubuurira.—Fil. 1:12-14; 1 Pet. 3:15.
5. Ahabw’enki twine kuba twetebeekaniise okubuurira kitaraariire?
5 Twine enshonga nungi ibiri ezirikutureetera kubuurira kitaraariire—okukunda Ruhanga n’okukunda abataahi. (Mat. 22:37-39) Twine kwetebeekanisiza okubuurira kitaraariire ahabw’okugira ngu omurimo gw’okubuurira ni mukuru munonga omu bwire obu. Twine kuba tweteekateekire kukoresa omugisha gwona kubuurira abandi amakuru marungi g’Obukama hakiriyo obwire.—Rom. 10:13, 14; 2 Tim. 4:2.