Turi Abajurizi ba Yehova Obwire Bwona

1. Nitubaasa kwega ki omu ky’okureeberaho kya Yesu arikubuurira omukazi owaizire kutaha amaizi aha iziba?

¹ Yesu akaba yaaheza kugyenda orugyendo ruraingwa, aruhire kandi aine eiriho. Abeegi be ku baabaire bagiire kugura ebyokurya, Yesu yaashutama haihi na iziba aheeru y’orurembo rwa Samaria kuruhuuka. Yesu akaba atagiire Samaria kubuurira; kureka akaba naarabamu arikuza Galilaaya kubuurirayo. N’obu kiraabe kyabaire kiri kityo, akakoresa omugisha ogwo kubuurira omukazi owaizire kutaha amaizi. (Yoh. 4:5-14) Ahabw’enki? Yesu tararekire kuba “kareebi omwesigwa kandi ow’amazima” owa Yehova. (Kush. 3:14) Nitutooreza Yesu turikuguma turi Abajurizi ba Yehova obwire bwona​—1 Pet. 2:21.

2. Nitubaasa kutebeekanisa tuta kubuurira kitaraariire?

² Ba Oyetebeekaniise: Twagyenda n’ebitabo nituba twetebeekaniise kubuurira kitaraariire. Ababuurizi baingi nibakira kugyenda na zaaturakiti kandi baziha abarikukora aha masitooha, abarikukora ahu barikuguriza amajuta ga motoka, hamwe n’abandi. (Mub. 11:6) Munyaanyazi-itwe orikukira kugyenda munonga, naateeraho obutoosha kuta omu nshaho ye Baibuli enkye n’akatabo Niki Eki Baibuli Buzima Erikwegyesa?, kandi naateeraho kubuurira abamushutami haihi.

3. Nitubaasa kutandika tuta kugaaniira n’abantu?

³ Tandika Orikugaaniira n’Abantu: Twaba nitubuurira kitaraariire, nitubaasa kutatandika turikugamba aha birikukwata aha Byahandiikirwe. Yesu taratandikire kugaaniira n’omukazi owaamushangire aha iziba arikumweyanjurira nka Mesia. Akatandika arikumushaba amaizi g’okunywa, bwanyima yaamubuurira. (Yoh. 4: 7-9) Munyaanyazi-itwe omwe ashangire ngu okutandika atyo, nikimubaasisa kutandika kubuurira omuntu, yaamubuuza yaaba ashemeziibwe ekiro kikuru ekirikuba kibaireho. Omu mwanya gw’okugarukamu ngu takyejumbiremu ahabw’okuba omujurizi wa Yehova, naagira ati: “Ncwairemu okutakikuza.” Orikubuuza yaaba aine ekihika ky’okwenda kumanya, naabuuza ahabw’enki, reero ekyo kibaasise munyaanyazi-itwe kumubuurira.

4. Ahabw’enki ebiri omuri Matayo 28:18-20 birikukuhiga?

⁴ N’obu Yesu araabe yaaherize obuheereza bwe obw’omu nsi, naakifayo munonga aha murimo gw’okubuurira ogukiriyo nigukorwa. (Mat. 28:18-20) N’ahabw’ekyo, nk’eky’Okureeberaho kyaitu Yesu, naitwe turi Abajurizi abeteekateekire obwire bwona kugumizamu nitubuurira aha matsiko agu twine.​—Heb. 10:23.