Buzima Noobaasa Kubuurira Kitaraariire!
1 Ni bangahi omu kibiina kyanyu abaabandize kutunga amazima ahabw’okubuurirwa kitaraariire? Eky’okugarukamu nikibaasa kukutangaaza. Okubuurira kitaraariire nikitwariramu okubuurira amakuru marungi abantu abu orikubugana omu izooba—waaba ori aha rugyendo, otaayaayiire abanyabuzaare nari abataahi, noogura ebintu, nangwa na waaba ori ah’eishomero nari aha murimo n’omu myanya endiijo. Omu kibiina ekirimu ababuurizi ababatiziibwe abarikurenga 200, 40 ahari 100 n’abaabandize kubuurirwa kitaraariire. N’ahabw’ekyo, omuringo ogu ogw’okubuurira nigukora gye.
2 Ababuurizi omu kyasha ky’okubanza obwire obwingi bakaba babuurira kitaraariire. Nk’eky’okureeberaho, Yesu obu yaabaire naaraba omuri Samaria akabuurira omukazi owaabaire nataha amaizi aha iziba rya Yakobo. (Yoh. 4:6-26) Filipo akatandika kubuurira omushaija wa Esiopia owaabaire naashoma ekitabo kya Isaaya, arikumubuuza ati: “Nooshoborokyerwa ebi orikushoma?” (Byak. 8:26-38) Paulo obu yaabaire ari omu kihome omuri Filipi akabuurira omurinzi w’ekihome. (Byak. 16:23-34) Obu Paulo yaabaire akomiirwe omu nju, akaba ‘ayakiira boona abaabaire bamutaayaayira, ababuurira eby’obukama bwa Ruhanga, kandi abeegyesa ebya Mukama waitu Yesu.’ (Byak. 28:30, 31) Naiwe noobaasa kubuurira kitaraariire n’obu waakuba oine enshoni. Mu muringo ki?
3 Oku Orikubaasa Kutandika: Baingi ahariitwe titurikworoberwa kutandika kubuurira abantu abu tutarikumanya. Nangwa n’abo abu turikumanya abatari Bajurizi ba Yehova, okubabuurira nikireebeka nk’ekigumire. Kwonka, twateekateeka aha burungi bwa Yehova, amazima g’omuhendo agu ahaire abaheereza be n’embeera mbi ei abantu barimu omu nsi, nibiija kutuhiga kubabuurira. (Yon. 4:11; Zab. 40:5; Mat. 13:52) Kandi, nitubaasa kushaba Yehova kutuhwera ‘kugira obumanzi.’ (1 Tes. 2:2) Ow’eishe-emwe omwe owaabaire ari omu Ishomero eririkutendeka Abamiisani akagira ati: “Butoosha nshangire ngu okushaba nikuhwera kyaba kingumiire kubuurira abantu.” Waaba otiinire kubuurira omuntu, shabira aha mutima omu bugufu.—Neh. 2:4.
4 Omu kubuurira kitaraariire tikirikwetengyesa kugira enyanjura nari ekyahandiikirwe eki waatandikisa. Noobaasa kushanga kirikuhwera kugira ekigyendererwa ky’okutandika kugaaniira n’omuntu otarikukyoreka ngu oriyo nooza kumubuurira eshaaha egyo. Ababuurizi baingi nibagira ngu okukora eki nikibareetera kugira obumanzi obu barikwetenga kubaasa kutandika kubuurira amakuru marungi. Omuntu yaaba atarikwenda kugamba naiwe, tikirikwetengyesa kumugyema. Omu bucureezi noobaasa kuhendera okugaaniira reero ogumizemu n’ebyawe.
5 Munyaanyazi-itwe omwe oine enshoni, ku arikuza kugura ebintu omu katare naabanza areeba omuntu aha maisho reero amwenya. Omuntu ogwo nawe ku arikumwenya, agira ebigambo bikye ebi yaamugambira. Omuntu ku arikumugarukamu gye, nikimuha obumanzi kugumizamu naagaaniira nawe. Naahurikiza gye kandi ateeraho kumanya amakuru marungi agarikubaasa kushemeza omuntu ogwo. Ahabw’okukoresa omuringo ogu, abaasize kugaba ebitabo bingi kandi yaatandika n’okwegyesa omuntu Baibuli.
6 Ba Niiwe Waatandika Kugaaniira n’Omuntu: Nitubaasa kugamba ki okuba niitwe twatandika kugaaniira n’omuntu? Yesu obu yaabuurira omukazi aha iziba akatandika arikumushaba amaizi g’okunywa. (Yoh. 4:7) N’ahabw’ekyo noobaasa kutandika kugaaniira n’omuntu orikumuramutsya nari orikumubuuza ekibuuzo omu muringo murungi. Mwaba nimugaaniira noobaasa kutunga omugisha gw’okwanjura enshonga kuruga omu Byahandiikirwe obundi oshangye waabiba embibo y’amazima. (Mub. 11:6) Abamwe babaasize kutandika kubuurira kitaraariire barikugamba aha kintu ekirikushemeza ekirikubaasa kureteera omuntu kwenda kumanya ebirikukiraho n’okubuuza. Nk’eky’okureeberaho, waaba otegyereize omushaho, noobaasa kutandika kugaaniira n’omuntu orikugira oti: “Ninyija kushemererwa obu ndaabe ntakigaruka kurwara.”
7 Okwetegyereza ebikwetoroire nakyo nikiija kukuhwera kubaasa kutandika kubuurira abantu. Twayetegyereza ngu omuzaire aine abaana b’emicwe mirungi, nitubaasa kumwebaza kandi tumubuuze tuti: “Niki ekikuhwereire kworora gye abaana baawe?” Munyaanyazi-itwe omwe naahurikiza ebi abandi aha murimo barikukira kuba nibagaaniiraho reero agira eki yaagaaniira nabo kurugiirira aha bi barikukunda. Ku yaamanyire ngu omukazi omwe aha bu yaabaire naakora nabo akaba naaza kushwerwa, akamuha Awake! eyaabaire neegamba aha kutebeekanisiza obugyenyi bw’okugaitwa. Eki kikarugamu okugaaniira bingi ebirikukwata ahari Baibuli.
8 Ogundi muringo gw’okubuurira kitaraariire n’okushomera ebitabo byaitu ahu abandi barikubaasa kutureeba. Ow’eishe-emwe omwe naashuuruura aha mutwe ogurikushemeza abantu ogurikuba guri omuri Watchtower nari Awake!, reero atandika kushoma ahunami. Ow’eishe-emwe ogwo ku arikureeba omuri aha rubaju naareeba aha bi arikushoma, naamubuuza ekibuuzo nari agira eki yaagamba aha bi ariyo naashoma. Eki emirundi emingi nikirugamu okugaaniira n’okubuurira omuntu ogwo. Okutsiga ekitabo ahu kirikureebwa nikibaasa kureetera abu orikukora nabo nari abu orikushoma nabo kwenda kumanya ebirikukiraho nari kubuuza.
9 Teeraho Kubuurira Kitaraariire: Kurugiirira aha bukuru bw’omurimo gw’okubuurira, tushemereire kufayo munonga aha kubuurira kitaraariire. Tushemereire kuteeraho kutaho embeera ezirikutubaasisa kubuurira abantu twaba nitukora ebyaitu eby’obutoosha. Teekateeka aha bantu abu orikubaasa kubugana kandi oreebe oku orikubaasa kutandika kubabuurira. Teeraho kugyenda na Baibuli n’ebitabo ebi orikubaasa kuha abo abarikwenda kumanya ebirikukiraho.—1 Pet. 3:15.
10 Ababuurizi baingi babaasize kutaho embeera ezirikubabaasisa kubuurira kitaraariire. Munyaanyazi-itwe omwe orikutuura omu kyombeko ekiine oburinzi bw’amaani naakoresa omwanya ogw’ekyombeko ekyo ogu abantu barikuhuumuriramu, kureeba ebishushani birungi by’ebyahangirwe. Abantu ku barikutandika kugamba nawe aha bikwatiraine n’ebishushani ebyo, naakoresa omugisha ogwo kugaaniira nabo aha kuragaanisa okuri omuri Baibuli ‘okw’eiguru erisya n’ensi ensya.’ (Kush. 21:1-4) Noobaasa kuteekateeka aha bi orikubaasa kukora kukubaasisa kubuurira kitaraariire?
11 Okugaruka Kugaaniira n’Orikwenda Kumanya Ebirikukiraho: Omuntu yaahurikiza gye, teeraho kugaruka kugaaniira nawe omurundi ogundi. Kyaba nikibaasika, noobaasa kumugira oti: “Naashemererwa munonga kugaaniira naiwe. Nimbaasa kukushanga nkahi kugira ngu tubaase kugaruka kugaaniira kumwe?” Ababuurizi abamwe nibaha omuntu nk’ogwo endagiriro n’enamba y’esimu reero bamugira bati: “Naashemererwa kugaaniira naiwe. Ku oraabe nooyenda kumanya ebirikukiraho aha bi twagaaniiraho, egi niyo ndagiriro yangye.” Ku waakuba otarikubaasa kugaruka kugaaniira n’omuntu ogwo, ijuza foomu erikwetwa Please Follow Up (S-43) ogihe omuhandiiki w’ekibiina kyanyu kugira ngu ekibiina ekiri haihi n’omuntu ogwo kimusherure.
12 Obwire obu turikumara turikubuurira kitaraariire tushemereire kububara. N’ahabw’ekyo, gira ahu waahandiika obwire obwo nangwa n’obu zaakuba edakiika nkye. Teekateeka ahari eki: Buri mubuurizi yaabuurira kitaraariire kumara edakiika itaano buri izooba, aha muheru gw’okwezi twena hamwe nituba tubuuriire eshaaha ezirikurenga obukaikuru 17.
13 Twine enshonga nungi ezirikutureetera kubuurira kitaraariire—okukunda Ruhanga n’abataahi. (Mat. 22:37-39) Okusiima emitwarize ya Yehova n’ebigyendererwa bye nikituhiga kugamba aha ‘kitiinisa ky’obukuru bw’obukama bwe.’ (Zab. 145:7, 10-12) Okufayo munonga ahari bataahi baitu nikituhiga kukoresa buri mugisha gwona kubuurira abantu amakuru marungi hakiriyo obwire. (Rom. 10:13, 14) Twatebeekanisa bukiri kare, twena nitubaasa kubuurira kitaraariire kandi tutungye n’okushemererwa okurikuruga omu kworeka omuntu w’omutima murungi amazima.
[Ebibuuzo by’obucweka]
1. (a) Okubuurira kitaraariire nikimanyisa ki? (b) Omu ruteerane oru ni bangahi abaabandize kutunga amazima ahabw’okubuurirwa kitaraariire?
2. Ni by’okureeberaho ki eby’okubuurira kitaraariire ebi turikushanga omu Byahandiikirwe?
3. Niki ekirikubaasa kutuhwera kusingura okutiina?
4. Omu kutandika kugaaniira n’omuntu twine kuba na kigyendererwa ki kandi n’ahabw’enki?
5. Niki ekirikuhwera munyaanyazi-itwe omwe oine enshoni, kubuurira kitaraariire?
6. Nitubaasa kutandika tuta kubuurira omuntu kitaraariire?
7. Okwetegyereza ebikwetoroire nikiija kukuhwera kita kubuurira kitaraariire?
8. Nitubaasa kukoresa tuta ebitabo byaitu kubuurira kitaraariire?
9, 10. (a) Nitubaasa kutaho tuta embeera ezirikutubaasisa kubuurira kitaraariire? (b) Ekyo obaasize kukikora ota?
11. Orikwenda kumanya ebirikukiraho ou twabuurira kitaraariire naabaasa kusherurwa ata?
12. (a) Ahabw’enki tushemereire kufayo kubara obwire obu turikubuurira kitaraariire? (b) Ni birungi ki ebirugire omu kubuurira kitaraariire? (Reeba akabokisi “Okubuurira Kitaraariire Nikurugamu Ebirungi!”)
13. Niki ekishemereire kutuhiga kubuurira kitaraariire?
[Ebigambo ebitoorainwe aha rupapura 4]
Noobaasa kushanga kirikuhwera kugira ekigyendererwa ky’okugaaniira n’abantu bwanyima okababuurira
[Ebigambo ebitoorainwe aha rupapura 5]
Ababuurizi baingi babaasize kutaho embeera ezirikubabaasisa kubuurira kitaraariire
[Akabokisi aha rupapura 5]
Obuhabuzi Obumwe aha Ku Orikubaasa Kutandika Kubuurira Omuntu
◼ Shaba Yehova kukuhwera kutandika kubuurira omuntu
◼ Gamba n’abo abarikwenda kuhurikiza kandi abatari ha bwira
◼ Noobaasa kureeba omuntu, omwenye kandi ogambe aha kirikubaasa kumushemeza
◼ Teeraho kuhurikiza gye
[Akabokisi aha rupapura 6]
Okubuurira Kitaraariire Nikurugamu Ebirungi!
• Ow’eishe-emwe omwe obu yaabaire naakanikisa emotoka ye, akabuurira abaabaire bari omu mwanya ogwo kandi yaabaha n’obupapura bw’okubeeta aha ruteerane oruhango kwija kuhurikiza orubazo rw’abantu boona. Bwanyima y’omwaka gumwe, aha ruteerane oruhango orw’ebiro bishatu, akaramukibwa omushaija ou atarayetegyerize. Akaba ari omwe aha bashaija abu yaayetsire aha ruteerane orw’omwaka ogwabaire guhweire obu yaabaire naakanikisa emotoka. Omushaija ogwo obu yaayetwa akaija kuhurira orubazo rw’abantu boona kandi yaashaba kwegyesibwa Baibuli. Omushaija ogwo n’omukazi we obu baareeba ow’eishe-emwe, bakaba baabatiziibwe.
• Munyaanyazi-itwe owaayegire amazima ahabw’okubuurirwa kitaraariire naakira kubuurira abantu abu arikubugana ahabw’abaana be bashatu. Naakira kubuurira abataahi n’abazaire abu arikushanga ah’eishomero n’omu nteerane z’abazaire ah’eishomero. Ku arikuheza kweyanjura, naabagambira ebigambo birungi ebirikworeka ngu Baibuli niyo emuhwereire omu kworora abaana be bwanyima ahindura agamba aha nshonga ezindi. Ahabw’okugira ngu naba yaatandikire kugamba nabo omu muringo nk’ogwo, nikimworobera kugamba aha bikwatiraine na Baibuli omu kugaaniira nabo. Ahabw’okukoresa omuringo ogwo, abaasize kuhwera abantu 12 kuhika aha kubatizibwa.
• Munyaanyazi-itwe omwe obu yaataayaayirwa omushaija orikuguza eby’ekitongore ky’eby’enshumbushano, akakoresa omugisha ogwo kumubuurira. Akamubuuza ku araabe naayenda kutunga amatsiko g’amagara marungi, okushemererwa n’amagara agatahwaho. Omushaija ogwo akaikiriza kandi yaabuuza munyaanyazi-itwe eki yaabaire naamanyisa. Akamworeka ebi Baibuli erikuraganisa kandi yaamuha kamwe aha butabo bwaitu aku omushaija ogwo yaashomire omu mwabazyo gumwe. Akakora nawe entebeekanisa y’okutandika kwega Baibuli. Akatandika kwija omu nteerane kandi akaija yaabatizibwa.
• Munyaanyazi-itwe omwe obu yaabaire naagyendera omu nyonyi, akatandika kugaaniira n’omukazi owaabaire amushutami aha rubaju kandi yaamubuurira. Ku baarugire omu nyonyi, munyaanyazi-itwe akaha omukazi ogwo endagiriro n’enamba ye y’esimu kandi yaamuhiga ngu ku araareebe Abajurizi ba Yehova abashabe kutandika kumwegyesa Baibuli. Ekiro ekyakuratsireho, Abajurizi ba Yehova babiri bakaija aha nju y’omukazi ogwo. Omukazi ogwo akatandika kwega Baibuli, yaarahuka kutunguuka omu by’omwoyo, yaabatizibwa kandi bwanyima akaba aine abantu bashatu abu arikwegyesa Baibuli.
• Ow’eishe-emwe w’emyaka 100 ohuumire orikutuura omu nju erikurebereerwamu abakaikwire naakira kugira ati: “Nitwetenga Obukama.” Eki butoosha kireetaire abashaho n’abarwaire kumubuuza ebibuuzo nawe yaatunga omugisha gw’okubashoboororera eki Obukama burikumanyisa. Omukazi omwe aha barikukorayo akabuuza ow’eishe-emwe ogwo eki arikwija kukora omu Paradiso. Akagarukamu ati: “Ninyija kureeba, ngarukye ngyende kandi nyotsye n’akagaari kangye.” Ahabw’okugira ngu tarikureeba, naashaba omukazi ogwo kumushomera zaamagaziini. Muhara w’ow’eishe-emwe ogwo ku yaizire kutaayaaya, omukazi ogwo akamushaba ngu amwikirize atware zaamagaziini ezo omuka owe. Omukazi ogwo akagambira muhara w’ow’eishe-emwe ngu, “Omutwe musya ogu turikugambaho omu mwanya ogu nigugira ngu: Nitwetenga Obukama.”
• Munyaanyazi-itwe omwe owaabaire ari omu hoteeri agiire kurya, akahurira abashaija bakuru abaabaire bashutami haihi nawe barikugaaniira aha by’obutegyeki. Omushaija omwe akagira ati gavumenti terikubaasa kuhezaho oburemeezi bwaitu. Munyaanyazi-itwe omu mutima gwe akagira ati: ‘Ogu n’omugisha gwangye.’ Akashaba omu bugufu aha mutima gwe reero yaabahikaho. Ku yaaherize kweyanjura, yaabagambira gavumenti erikwija kuhezaho oburemeezi bw’abantu, nibwo Obukama bwa Ruhanga reero yaabaha burocuwa ei yaabaire aine. Bwanyima y’ekyo mukuru wa hoteeri egyo akahika ahu munyaanyazi-itwe yaabaire ari. Munyaanyazi-itwe akateekateeka ngu ariyo naaza kumugambira ngu ashohore. Kwonka, akagambira munyaanyazi-itwe ngu nawe yaaba ahurikiize, kandi ngu naayenda burocuwa. Omukozi nawe owaabaire ahurikiize akaija arikuragarwa amarira. Akaba araayegireho Baibuli arikwenda kugarukamu kugyega.