Oine Eriisho Eririkureeba Hamwe?
1. Nikimanyisa ki okugira ‘eriisho eririkureeba hamwe’?
1 Ebi turikukora nibirugiirira aha bi turikureeba. Ekyo ka nikihikaana n’ebigambo bya Yesu ebi: ‘Eriisho ryawe ku riraabe nirireeba hamwe, omubiri gwawe gwona nigwija kwaka’! (Mat. 6:22) Twaba twine eriisho ‘eririkureeba hamwe,’ omu by’omwoyo niriba ryemariire aha kigyendererwa kimwe—okukora ebi Ruhanga akunda. Nituta eby’Obukama omu mwanya gw’okubanza kandi titurikuhugibwa ebintu ebitarikwetengyesa nari emirimo erikuturemesa kubuurira omu bwijwire.
2. Niki ekirikubaasa kushiisha emiteekateekyere yaitu aha bintu, kwonka niki ekirikubaasa kutuhwera?
2 Buri Muntu Aine Kweshwijuma: Emiteekateekyere yaitu neebaasa kushiishwa ebyo ebi barikuranga ngu nitubyetenga nari ebi abandi baine. Otakacwiremu kukora omurimo nari kugura ekintu ekirikwija kutwara obwire bwingi, esente nyingi, nari amaani mingi, kikaabaire kirungi ‘kubanza kubariirira’ orikwebuuza oti: ‘Omurimo ogu nari ekintu eki nikiija kumpwera kwongyera aha ku ndikuheereza Yehova nari nikiija kundemesa?’ (Luk. 14:28; Fil. 1:9-11) Kandi n’eky’obwengye kuguma nitweshwijuma obutoosha tukareeba oku turikubaasa kwongyera aha bwire obu turikumara omu kubuurira.—2 Kor. 13:5; Efe. 5:10.
3. Nitwega ki ahari munyaanyazi-itwe omwe owaakozire empindahinduka omu bi yaabaire naakora?
3 Munyaanyazi-itwe omwe ku yaatandikire kuheereza nka payoniya, yaacwamu kuguma n’omurimo gwe ogwabaire nigumutwarira obwire bwingi n’obu ogurikutwara obwire bukye gwabaire nigumubaasisa kutunga esente z’okugura ebi arikwetenga. Aha muheru akagira ati: “Tihaine orikubaasa kuheereza abakama babiri. Nkacwamu kwefeerereza ebintu ebitarikwetengyesa kandi naayega kumarwa n’ebyo ebirikwetengyesa munonga. Nketegyereza ngu ebintu nibikura kandi waaheza nabyo obwire nibikutama n’ahabw’ekyo nkareeba ngu okuteeraho kusherura ebintu ebyo nikurutsya.” Embeera ze zikamubaasisa kukora empindahinduka, akahindura omurimo, ekyamubaasise kugumizamu naaheereza nka payoniya.
4. Ahabw’enki kiri kikuru ngu tugire eriisho eririkureeba hamwe hati?
4 Ahabw’obukuru bw’obwire obu turimu nikiba kiri kikuru munonga kuguma twine eriisho eririkureeba hamwe. Buri eizooba eririkurenga niriba ryasharaho ekiro kimwe aha bwire oburikuburayo emperu y’ensi egi ekahika reero hakabaho ensi ensya. (1 Kor. 7:29, 31) Twata omutima aha murimo gw’okubuurira, nitubaasa kukiza amagara gaitu n’ag’abo abarikutuhurikiza.—1 Tim. 4:16.