Eki Twine Kwebembeza
1. Yesu akooreka ata ngu okubuurira kukaba kuri kukuru ahariwe?
1 Okubuurira nikwo Yesu yaabaire naayebembeza. N’obweziriki, akaba agyenda engyendo ndaingwa omuri Palesitini yoona kubuurira abantu baingi nk’oku kirikubaasika. Akaba aine eriisho eririkureeba hamwe n’ahabw’ekyo obwire bwe obwingi n’ebiteekateeko bye akaba abimarira aha kubuurira. (Mat. 8:20) Abantu ku baateireho kumuzibira kugyenda kugira ngu abaase kukiza abarwaire baabo, akagira ati: “Nshemereire kubuurira ebigambo ebirungi by’obukama bwa Ruhanga omuri tauni ezindi nazo; ahabw’okuba nikyo naatumiirwe.”—Luk. 4:43.
2. Ahabw’enki okubuurira kwabaire kuri kukuru munonga ahari Yesu?
2 Ahabw’enki okubuurira kwabaire kuri kukuru munonga ahari Yesu? Ekigyendererwa kye ekikuru kikaba kiri okweza eiziina rya Yehova. (Mat. 6:9) Akaba naakunda Ishe ow’omu iguru n’ahabw’ekyo akaba aine ekyetengo ky’okukora ebi Ishe akunda kandi akoorobera na buri kiragiro Kye kyona. (Yoh. 14:31) Okwongyera ahari ekyo, akaba naafayo munonga aha bantu kandi arikwenda kubahwera.—Mat. 9:36, 37.
3. Nitubaasa kworeka tuta ngu okubuurira nikwo turikutwara nka kikuru?
3 Tooreza Yesu: Okwebembeza omurimo gw’okubuurira nk’oku Yesu yaakozire nikibaasa kuguma ahabw’okuba omu nsi harimu bingi ebirikubaasa kutwara obwire bwaitu bwingi n’ebirikuhuzya. (Mat. 24:37-39; Luk. 21:34) N’ahabw’ekyo, twine kwebembeza ebyo ebirikukirayo obukuru, turikutunga obwire kwetebeekanisiza omurimo gw’okubuurira n’okugwejumbamu butoosha. (Fil. 1:10) Twine kuteeraho kugira eriisho eririkureeba hamwe kandi tuketantara kurengyesereza omu kukoresa eby’omu nsi.—1 Kor. 7:31.
4. Ahabw’enki kiri kikuru hati okuguma nitwebembeza omurimo ogurikukirayo obukuru?
4 Obwire bwaba buri bukye, omuntu omunyabwengye naabanza kukora ebikuru munonga. Nk’eky’okureeberaho ku yaakumanya ngu nihaija kubaho eihunga ry’amaani, naija kumarira obwire bwe n’amaani omu kukora entebeekanisa z’okukiza eka ye n’okurabura bataahi be. Emirimo etari mikuru naabaasa kuba agitaire aha rubaju. Hatsigaireyo obwire bukye Haramagedoni ekabaho. (Zef. 1:14-16; 1 Kor. 7:29) Okubaasa kuhonokaho hamwe n’abo abarikutuhurikiza, twine kufayo aha bi turikukora butoosha kandi tukafayo n’aha ku turikwegyesa, yaaba omu kibiina nari aheeru yaakyo. (1 Tim. 4:16) Buzima, okuhonokaho kwaitu nikwija kurugiirira aha ku turikutwara omurimo gw’okubuurira nka mukuru.