Akabokisi k’Ebibuuzo
◼ Nitwihirira ahari ki okuha omuntu ebitabo?
Ekikuru eki turikwihiriraho n’oku omuntu yaakunda ebi twagaaniira nawe. Twareeba ngu yaabikunda, nitubaasa kumuha magaziini ibiri nari burocuwa nari akatabo nari ekitabo ekindi kyona aha bi turikuba nitugaba. Nitubaasa kubimuha n’obu yaakuba aine sente nkye nari ataine sente z’okuhayo kushagika omurimo gw’okubuurira. (Yob. 34:19; Kush. 22:17) Kwonka ebitabo byaitu by’omuhendo titushemereire kubiha abantu abatarikubikunda.—Mat. 7:6.
Nitubaasa kumanya tuta ngu ou turikubuurira naabikunda? Yaikiriza kugaaniira naitwe, akahurikiza gye twaba nitugaaniira nawe, tukamubuuza akagarukamu eki arikuteekateeka, nikibaasa kworeka ngu naayenda kumanya. Yaakuratira twaba nitushoma omu Baibuli nikyoreka ngu naaha Ekigambo kya Ruhanga ekitiinisa. Kandi ni kirungi okumubuuza yaaba naza kushoma ebitabo ebi twamuha. Ababuurizi bashemereire kuteeraho kumanya yaaba ou barikubuurira yaakunda ebi baagaaniira nawe. Nk’eky’okureeberaho, twaba nitubuurira aha nguuto, tiky’oburyo okugabira eryo zaamagaziini, zaaburocuwa nari ebitabo turikubiha buri omwe orikuhingura. Twaba tutabaasize kumanya gye yaaba yaabikunda, nikiba kiri kirungi okumuha akapapura k’okweta abantu omu nteerane nari kaaturakiti.
Kandi, omubuurizi tashemereire kushaba ebitabo by’okukoresa omu kubuurira kurugiirira aha bwingi bw’esente ezi arikuhayo, beitu ashemereire kutwara ebyo byonka ebi arikubaasa kugaba. Esente ezirikuheebwayo ti z’okushashurira ebitabo kureka n’ez’okuhwera omu mirimo yoona eine akakwate n’omurimo gw’okubuurira. N’obu twakuba twine sente nyingi nari nkye, okusiima kwaitu nikwija kutuhiga kuhayo kushagika emirimo y’Obukama twihire aha mutima, beitu kutari kuhayo ebi tushagize. (Mak. 12:41-44; 2 Kor. 9:7) Kandi eki nikiija kutuhiga kutwara ebitabo byonka ebi turikubaasa kugaba omu kubuurira, kituhwere kutashiisha esente ezirikuheebwaho.
[Ebigambo ebirikworeka enshonga eri nkuru aha rupapura 2]
Ababuurizi bashemereire kuteeraho kumanya yaaba ou barikubuurira yaakunda ebi baagaaniira nawe