Okukoresa Gye Ebitabo Ebirikushoboorora Baibuli

Yesu akegyesa ati: “Mukaheerwa busha, naimwe muheere busha.” (Mat 10:8) Nitukuratira obuhabuzi obwo turikuha abantu Baibuli nari ebitabo ebirikugishoboorora, hatariho kushashura. (2Kor 2:17) Kandi, ebitabo ebi birimu amazima g’omuhendo kuruga omu Kigambo kya Ruhanga. Nikitwara amaani mingi kandi n’esente nyingi, okuteera ebitabo kandi bikooherezibwa omu bibiina omu nsi yoona. N’ahabw’ekyo, tushemereire kutwara ebitabo ebi turaakorese byonka.

Koresa okwetegyereza waaba nooha abandi ebitabo, nangwa na twaba nitubuurira turikukoresa akagaari n’emeeza omu myanya erikuba erimu abantu baingi. (Mat. 7:6) Omu mwanya gw’okuha ebitabo abarikuba nibahingura, teeraho kugaaniira nabo kubaasa kwetegyereza baaba nibabikunda. Noobaasa kugarukamu eego ahari kimwe aha bibuuzo ebiri omu kabokisi? Waaba otarikuhamya ngu omuntu naabikunda, nikiba kiri kirungi kumuha turakiti. Buzima, omuntu yaashaba magaziini nari ekitabo ekindi, nitumuha ekyo eki yaashaba.​—Enf 3:27, 28.