Buurira ‘Abantu b’Emiringo Yoona’

1. Ni mu muringo ki ogu ababuurizi barikubaasa kuba nk’omubaizi murungi?

¹ Omubaizi murungi naaba aine eby’okukoresa bingi kandi naaba naamanya oku aine kukoresa buri kimwe aharibyo n’obu aine kubikoresa. Naitwe nk’ababuurizi, twine eby’okukoresa bingi ebirikutuhwera kukora omurimo gwaitu gw’okubuurira. Nk’eky’okureeberaho, ekibiina kiteire zaaburocuwa ezirikukwata aha bintu bitari bimwe kutuhwera kubuurira ‘abantu b’emiringo yoona.’ (1 Kor. 9:22) Orupapura rw’omunda ruriho zimwe aharizo, nihooreka abu zirikubaasa kuhwera, n’oku turikubaasa kuzigaba.

2. Ni ryari obu turikubaasa kukoresa zaaburocuwa omu kubuurira?

² Obu Turikubaasa Kukoresa Zaaburocuwa: Omubaizi naakoresa buri kimwe aha bikoreso bye obu kirikuba nikyetengyesa. Nikyo kimwe naitwe, twine kuha omuntu burocuwa twareeba ngu neija kumugasira, beitu kutari ahabw’okugira ngu neeba neegabwa omu kwezi okwo. Nk’eky’okureeberaho, twaba nitugaba akatabo Eki Baibuli Erikwegyesa kwonka ou turikubuurira atari Mukristaayo, nikiba kiri kirungi kumuha burocuwa erikubaasa kumugasira reero yaayoreka ngu naayenda kwega tukabona kumuha akatabo Eki Baibuli Erikwegyesa.

3. Ahabw’enki twine kwega kukoresa gye ebitabo byaitu ebi turikukoresa omu kubuurira?

³ Baibuli neesiima abo abarikukora gye emirimo yaabo. (Enf. 22:29) Buzima, obunaku obu tihariho omurimo oguri mukuru okukira omurimo gurikwera ogw’okubuurira amakuru marungi. (Rom. 15:16) Kubaasa kuba ‘abakozi abatashemereire kukwata nshoni,’ twine kwega kukoresa gye ebitabo byaitu.—2 Tim. 2:15.