Hwera Abantu Kuhurikiza Ruhanga
1. Ni butabo ki obwashohoziibwe aha ruteerane oruhango “Obukama Bwawe Bwije!”, kandi ahabw’enki n’obw’omugasho munonga?
1 Aha ruteerane oruhango orwabaire rwine omutwe “Obukama Bwawe Bwije!” tukatunga obutabo bubiri, Hurikiza Ruhanga Obone Kugumaho Ebiro Byona na Hurikiza Ruhanga. Ahabw’okugira ngu tiburimu bigambo bingi bworobi kuvunuura. Obu akatabo Hurikiza Ruhanga Obone Kugumaho Ebiro Byona baabanza kukashohoza omu Rungyereza bakaba baikirize ngu kavunuurwe omu ndimi 431.
2. Ni baahi abu obutabo obu burikubaasa kugasira?
2 N’oha ou obutabo obu burikubaasa kugasira munonga? Noobaasa kubukoresa omu mbeera ezi:
• Omubuurizi yaaba naabuurira omuntu aha murundi gw’okubanza nari agarukireyo, akeetegyereza ngu omuntu ogwo tarikumanya kushoma nari tarikushoma gye.
• Omubuurizi yaabuurira abantu abarikugamba orurimi oru twinemu ebitabo bikye nari oru tutainemu bitabo. Nari yaaba naabuurira omu kicweka ekirimu abantu baingi abatarikubaasa kushoma orurimi rwabo.
• Omubuurizi yaaba naakoresa orurimi rw’abateta kubabuurira.
• Omuzaire yaaba naayenda kwegyesa omwana we amazima otakeegire kushoma.
3. Akatabo Hurikiza Ruhanga katebeekanisiibwe kata?
3 Oku Obutabo Obu Butebeekanisiibwe: Akatabo Hurikiza Ruhanga karimu ebigambo bikye byorobi hamwe n’Ebyahandiikirwe aha muheru gwa buri rupapura ebirikworeka enshonga enkuru. Ahabw’enki? Mbwenu omuntu yaakuha akatabo akari omu rurimi oru otarikubaasa kushoma, okaayenda kukashoma n’obu kaakuba karimu ebishushani birungi? Abaingi tibakaakunda kukashoma. N’abantu abatarikumanya kushoma nibakira kwanga ebitabo ebirimu ebigambo. N’ahabw’ekyo, ahari buri rupapura hariho ebishushani n’obumanyiso oburikworeka oku biine kukuratana.
4. Akatabo Hurikiza Ruhanga Obone Kugumaho Ebiro Byona katebeekanisiibwe kata?
4 Akatabo Hurikiza Ruhanga Obone Kugumaho Ebiro Byona karimu ebishushani nk’ebiri omu Hurikiza Ruhanga. Katebeekanisiibwe kukoresibwa omu kwegyesa Baibuli abo abatarikumanya kushoma gye nari abarikwega kushoma. Kandi omubuurizi naabaasa kukakoresa yaaba naayega n’omuntu omu katabo Hurikiza Ruhanga. Aha mutwe gwa buri mpapura ibiri aha rubaju rwa bumosho hariho ekibuuzo ekirikugarukwamu aha mpapura ezo. Aha bishushani hariho ebigambo n’ebyahandiikirwe. Ahansi aha muheru gw’empapura enyingi hariho akabokisi akarimu enshonga ezindi n’Ebyahandiikirwe ebirikubaasa kugaaniirwaho kurugiirira aha kubaasa kw’omwegi.
5. Ni ryari obu turikubaasa kugaba obutabo obu, kandi tuta?
5 Oku Turikubaasa Kubukoresa: Waaba noobuurira enju aha nju noobaasa kuha omuntu kamwe aharibwo waareeba ngu nikabaasa kumuhwera, nangwa n’obu bwakuba butari bwo burikugabwa omu kwezi okwo. (Reeba akabokisi “Oku Burikubaasa Kugabwa.”) Waaba ogarukireyo aha omuntu noobaasa kumugira ngu oine eki orikwenda kumworeka reero okamukwatse.
6. Nitubaasa kukoresa tuta obutabo obu kwegyesa omuntu Baibuli?
6 Obu akatabo Hurikiza Ruhanga katarimu bibuuzo, titurikwija kukeega n’omuntu turikukoresa ebibuuzo n’eby’okugarukamu nk’oku turikukora twaba nitwega n’omuntu omu katabo Eki Baibuli Erikwegyesa. Abantu nibakunda kuhurira ebitebyo. N’ahabw’ekyo koresa ebishushani ebirimu kubatebeza ebitebyo by’omu Baibuli. Bashoboororere eki ebishushani ebyo birikworeka. Ekyo kikore n’omuhimbo. Shaba omwegi kukugambira eki arikureeba n’eki arikuteekateeka. Shoma ebyahandiikirwe ebiri ahansi, reero omushabe kukugambira oku arikubyetegyereza. Mubuuze, kumuhiga kuhikaanisa naiwe ebiteekateeko n’okuhamya ngu yaayetegyereza. Yaaba naakoresa akatabo Hurikiza Ruhanga Obone Kugumaho Ebiro Byona, mushome hamwe ebigambo n’ebyahandiikirwe ebirikuhikaana n’ekishushani eki murikugaaniiraho.
7. Nitubaasa kuhwera tuta omwegi wa Baibuli kutunguuka?
7 Hwera Omwegi wa Baibuli Kutunguuka: Okuhikaanisa ebiteekateeko n’omwegi wa Baibuli omu muringo nk’ogu, nikibaasa kumuhiga kwenda kwega kushoma kugira ngu atungye okumanya okurikukwata ahari Yehova. (Mat. 5:3; Yoh. 17:3) N’ahabw’ekyo, waaba nooyega n’omwegi omu katabo Hurikiza Ruhanga, waareeba ngu naayenda kwega noobaasa kumushaba kumwegyesa kushoma reero otandikye kumwegyesa omu katabo Hurikiza Ruhanga Obone Kugumaho Ebiro Byona. Omwegi n’obu yaakuheza kwega obutabo bubiri obu naaba atakahikire kubatizibwa. Naaba aine kwega akatabo Eki Baibuli Erikwegyesa nari akandi akashemereire kwegwa, kamuhwere kwongyera kwetegyereza gye Baibuli.
8. Ahabw’enki twine okushemererwa ahabw’obutabo obu obw’okukoresa omu kubuurira?
8 Abantu okubaasa kugumaho ebiro byona baine kuhurikiza ow’Obushoboorozi Bwona. (Isa. 55:3) Kandi Yehova naayenda ngu “abantu boona,” otwariiremu n’abo abatarikumanya kushoma, beegye kumuhurikiza. (1 Tim. 2:3, 4) Twine okushemererwa kuhango ahabw’obutabo obu, obu turikubaasa kukoresa kwegyesa abantu kuhurikiza Ruhanga.
[Akabokisi aha rupapura 3]
Oku Burikubaasa Kugabwa
Ou orikubuurira mworekye ebiri aha rupapura 2-3, reero ogire oti: “Okaayenzire kutuura omu nsi erikushusha eti? [Tegyereza agarukyemu.] Ebyahandiikirwe nibigira ngu Ruhanga ari haihi kureeta obusingye omu nsi egi ekaba nungi kandi akamaraho obworo n’okurwara. Yetegyereze eki twine kukora okubaasa kugituramu. [Shoma Isaaya 55:3, ekiri aha mutwe gw’orupapura 3.] Ekyahandiikirwe eki nikituhiga ‘kwija ahari’ Ruhanga ‘tukamuhurikiza.’ Kwonka shi Ruhanga nitumuhurikiza tuta?” Za aha rupapura 4-5, kubaasa kutunga eky’okugarukamu. Yaaba ataine bwire, mutsigire akatabo ako reero okore entebeekanisa kugarukayo okagarukamu ekibuuzo ekyo.