Oku Turikubaasa Kukoresa Akatabo Amakuru Marungi Kuruga Ahari Ruhanga!
Akatabo Kasya Akatebeekanisiibwe Kutuhwera Kugarukayo aha Bantu n’Okutandika Kubeegyesa Baibuli
1. Ni katabo ki aku twatungire aha ruteerane oruhango akatebeekanisiibwe kutuhwera kugarukayo aha bantu n’okubeegyesa Baibuli?
1 Aha ruteerane Oruhango orwabaire rwine omutwe “Rinda Omutima Gwawe!,” tukashemererwa kutunga akatabo akasya Amakuru Marungi Kuruga Ahari Ruhanga! Nikaija kutuhwera kugarukayo aha bantu n’okutandika kubeegyesa Baibuli. Akatabo aka akagiire omu mwanya gw’akatabo Ruhanga Natwenza Ki? nako kahandiikirwe omu bugufu. Nikaija kutuhwera kutandika kwegyesa Baibuli abantu abarikuba baine obwire bukye. Akatabo Ruhanga Natwenza Ki? kakaba nikashoboorora aha bi Ruhanga arikwenza Abakristaayo ebi omwegi musya arikubaasa kutarahuka kwikiriza, kwonka akatabo akasya ko nikeegyesa aha makuru marungi agari omu Baibuli.—Byak. 15:35.
2. Ahabw’enki akatabo Amakuru Marungi kaateirwe?
2 Ahabw’enki kaateirwe? Ab’eishe-emwe omu nsi yoona batwire baine ekyetengo ky’okutunga akatabo koorobi akarikubaasa kuhwera abantu kwenda kumanya amazima tutakatandikire kwega nabo omu katabo Eki Baibuli Erikwegyesa. Abantu abatarikukunda kushoma ebitabo ebihango, nibabaasa kwikiriza kwega Baibuli barikukoresa burocuwa. Kandi burocuwa eyorobi kuvunuura omu ndimi nyingi.
3. Akatabo aka n’ak’omutaano kata aha bundi obu turikukoresa omu kwegyesa abantu Baibuli?
3 Oku Katebeekanisiibwe: Ebitabo byaitu ebingi bitebeekanisiibwe kugira ngu omuntu yaabishoma ayetegyereze amazima, n’obu yaakuba atahwereirwe. Akatabo aka n’ak’omutaano. Katebeekanisiibwe kuhwera abeegi ba Baibuli kukeega barikuhwerwa ababuurizi. N’ahabw’ekyo, waakaha omuntu ni kirungi kushoma nawe akacweka kamwe nari bubiri kandi mukabugaaniiraho. Karimu obucweka bugufu obu orikubaasa kukoresa kwega n’omuntu oine obwire bukye nari ori aha murimo. N’obu kiraabe kiri kirungi kutandika n’eishomo 1, nitubaasa kutandika kwegyesa omuntu turikukoresa eishomo erindi ryona.
4. Akatabo aka nikatuhwera kata kwegyesa abantu Baibuli?
4 Omu bitabo byaitu ebingi, eby’okugarukamu by’ebibuuzo nibiba biri omu bucweka bw’eshuura. Kwonka omu katabo aka, na munonga eby’okugarukamu biri omu byahandiikirwe. Abantu baingi nibakunda kwega amazima barikukoresa Baibuli omu mwanya gw’okukoresa ebitabo byaitu. N’ahabw’ekyo, ebyahandiikirwe ebingi tibijuriziibwe kureka byorekirwe. N’eby’okushoma kuruga omu Baibuli. Eki nikihwera omwegi kumanya ngu ebi arikushoma nibiruga ahari Ruhanga.—Isa. 54:13.
5. Ahabw’enki kiri kikuru omubuurizi kwetebeekanisa gye buri kuza kukoresa akatabo aka omu kwegyesa?
5 Akatabo aka tikarikushoboorora ebyahandiikirwe byona. Ahabw’enki? Ahabw’okuba katebeekanisiibwe kuhiga omwegi kubuuza ebibuuzo reero kikabaasisa orikumwegyesa kuhikaanisa nawe ebiteekateeko. N’ahabw’ekyo ni kirungi kwetebeekanisa gye buri kuza kukakoresa omu kwegyesa. Eky’okwetantara: Otagamba bingi! Nitukunda kushoboorora ebyahandiikirwe, kwonka nikihwera, omwegi twamushaba kugamba oku arikwetegyereza ekyahandiikirwe. Twakoresa gye ebibuuzo, nitubaasa kuhwera omwegi kuhika aha kwetegyereza amakuru ga buri kyahandiikirwe.—Byak. 17:2.
6. Akatabo aka nitubaasa kukakoresa tuta: (a) ei abantu batarikukunda ebirikukwata ahari Ruhanga na Baibuli? (b) twaba nitubuurira enju aha nju? (c) kutandika kwegyesa abantu Baibuli aha murundi gw’okubanza tutarikwekiikuura? (d) twaba tugarukireyo aha bantu?
6 Nk’ebitabo ebindi ebi turikukoresa omu kwegyesa abantu Baibuli, akatabo aka nikabaasa kugabwa n’obu kaakuba katari kamwe aha burikugabwa omu kwezi. Nikaija kutuhwera kutandika kwegyesa Baibuli abantu abaine obwire bukye tutarikwekiikuura. Kandi nk’oku kyagambirweho aha ruteerane oruhango, nikaija kutuhwera kugira ekihika ky’okugarukayo aha bantu abarikwenda kumanya ebirikukiraho.—Reeba obubokisi oburi aha rupapura 5-7.
7. Akatabo aka noobaasa kukakoresa ota kwegyesa omuntu Baibuli?
7 Oku Turikubaasa Kukeegyesezamu Abantu: Noobaasa kutandika kuhikaanisa ebiteekateeko n’omuntu orikushoma ebibuuzo ebiri omu nyuguta ezikwatsire. Bwanyima oshome obucweka n’ebyahandiikirwe ebiriho ekigambo “shoma.” Koresa ebibuuzo ebirikuhwera ou orikubuurira kwetegyereza gye ekyahandiikirwe. Mutakagiire aha kacweka akandi, shaba ou orikubuurira abanze agarukemu ekibuuzo ekiri omu nyuguta ezikwatsire kuhamya ngu yaayetegyereza. Mwaba nibwo mutandikire kwega, ni kirungi kugarukamu ekibuuzo kimwe, kimwe aha biri omu nyuguta ezikwatsire. Okwega kwaheza kuhama, nimubaasa kutandika kwega eishomo ryona.
8. Nitubaasa kwanjura tuta ekyahandiikirwe, kandi n’ahabw’enki?
8 Ebyahandiikirwe ebyorekirwe ebiriho ekigambo “shoma” nibyo birikugarukamu ebibuuzo ebiri omu nyuguta ezikwatsire. Waaba nooza kushoma ekyahandiikirwe yetantare okugira ngu “entumwa Paulo akahandiika” nari “reeba ebi Yeremia yaarangire.” Ou orikubuurira naabaasa kuteekateeka ngu oriyo nooshoma ebigambo by’omuntu. Nikiba kiri kirungi kugira ngu “Ekigambo kya Ruhanga nikigira kiti” nari, “yetegyereze eki Baibuli yaarangire.”
9. Mbwenu shi ebyahandiikirwe byona ebyorekirwe biine kushomwa mwaba nimwega?
9 Mbwenu shi twine kushoma ebyahandiikirwe byona ebyorekirwe, nari ebyo byonka ebiriho ekigambo “shoma”? Cwamu kurugiirira aha mbeera. Ebyahandiikirwe byona ebyorekirwe nibiba nibishagika enshonga, kandi noobaasa kubigambaho. Kwonka obumwe omwegi naabaasa kuba ataine bwire, atafiireyo nari atarikushoma gye, obwo noobaasa kucwamu kushoma ebyo byonka ebiriho ekigambo “shoma.”
10. Ni ryari obu orikubaasa kuhindura okatandika kwegyesa omuntu omu katabo Eki Baibuli Erikwegyesa?
10 Obu Orikubaasa Kuhindura Okatandika Kwegyesa Omuntu omu Katabo Eki Baibuli Erikwegyesa: Waaba nooyega n’omuntu okareeba ngu naayenda kugumizamu naayega, noobaasa kuhindura muze omu katabo Eki Baibuli Erikwegyesa nari mugumizemu n’akatabo Amakuru Marungi kuhitsya kaahwa. Omubuurizi niwe aine kucwamu obu araahindure akatandika kwegyesa omuntu omu katabo akandi. Mwatandika akatabo Eki Baibuli Erikwegyesa, nikyetengyesa kutandika n’eshuura y’okubanza? Tihatairweho kiragiro. Abeegi tibarikushushana. Kwonka, abeegi abaingi nikiija kubahwera baayega eshuura eri omu katabo Eki Baibuli Erikwegyesa erikuhikaana n’eishomo erimubaire nimwegaho.
11. Akatabo aka akasya nikaija kutubaasisa kukora ki?
11 Omu nsi egi etarimu makuru marungi, twine omugisha gw’amaani ogw’okubuurira amakuru agarikworeka ngu Obukama bwa Ruhanga nibutegyeka kandi ngu buri haihi kureetaho ensi ensya erimu okuhikiirira! (Mat. 24:14; 2 Pet. 3:13) Twine amatsiko ngu baingi abarikuhurira amakuru aga nibaija kwikirizana n’ebigambo ebiri omu Baibuli ebi: “Ebigyere by’orikureeta amakuru g’ebigambo birungi ka ni birungi aha bibungo, orikuranga eby’obusingye, akareeta amakuru marungi g’ebigambo birungi, orikuranga eby’okujunwa, akagira Saayuuni ati: Ruhanga waawe ari aha ngoma.” (Isa. 52:7) Ka tuteereho kukoresa akatabo aka akasya kuhitsya aha bantu abaine eriho ry’eby’omwoyo amakuru kuruga ahari Ruhanga!
[Akabokisi aha rupapura 5]
Ei Abantu Batarikukunda Ebirikukwata Ahari Ruhanga na Baibuli:
● Ababuurizi nibashanga ngu omu bicweka ebimwe abantu tibarikwenda kubabuurira ebirikukwata ahari “Ruhanga” na “Baibuli.” Omu bicweka nk’ebyo, nikiba kiri kirungi aha murundi gw’okubanza kugaaniira aha nshonga ezi abantu barikukunda, nk’ezikwatiraine n’okutunga obutegyeki burungi, ah’okwiha obuhabuzi oburikuhwera amaka, n’ebirungi ebiraabeho omu biro by’omumaisho. Nitubaasa kuguma nitugaaniira n’omuntu reero twaheza kuhamya ngu naikiriza ngu Ruhanga ariho kandi ngu Baibuli neeyesigwa, tubone kumuha akatabo Amakuru Marungi.
[Akabokisi aha rupapura 6]
Twaba Nitubuurira Enju aha Nju:
● “Niinyenda kukworeka oku kyorobi kumanya ekigyendererwa kya Ruhanga ahabw’abantu omu biro by’omumaisho. Nooteekateeka ngu Ruhanga naija kwihaho okubonabona? [Tegyereza agarukyemu.] Akatabo aka nikooreka ahu eky’okugarukamu ky’ekibuuzo ekyo kiri omu Baibuli. [Muhe akatabo reero mushome hamwe akacweka k’okubanza omu eishomo 1, mushome na Yeremia 29:11.] Kurugiirira ahari eki, noogira ngu n’eky’oburyo kwikiriza ngu Ruhanga naija kureetaho embeera nungi omu biro by’omumaisho? [Tegyereza agarukyemu.] Ku ndaagarukye, nituza kushoma akacweka ka kabiri kubaasa kutunga eky’okugarukamu ky’ekibuuzo eki, Ruhanga naija kwihaho ata ebirikureetera abantu kubonabona?” Aha murundi gw’okubanza ou orikubuurira yaaba aine obwire, nimubaasa kushoma akacweka k’okubanza n’aka kabiri n’ebyahandiikirwe bishatu ebyorekirwe. Kora entebeekanisa kugarukayo mukagaaniira aha kibuuzo kya kabiri omu ishomo eryo.
● “Abantu nibakunda kushaba, na munonga baaba baine oburemeezi. Obumwe naiwe nooshaba? [Tegyereza agarukyemu.] Nooteekateeka ngu Ruhanga naagarukamu okushaba kwona? [Tegyereza agarukyemu.] Omu katabo aka harimu eky’okugarukamu ky’ekibuuzo ekyo kuruga omu Baibuli. [Muhe akatabo kandi muhikaanise ebiteekateeko aha kacweka k’okubanza omu eishomo 12, mushome n’ebyahandiikirwe ebiriho ekigambo shoma.] Buzima nikishemeza kumanya ngu Ruhanga naagarukamu okushaba kwaitu. Kwonka kubaasa kushaba ebirikuhikaana n’ebi Ruhanga akunda, twine kumumanya gye. [Mworekye eishomo 2 n’emitwe emikye eri omu muringo gw’ebibuuzo.] Ka nkutsigire akatabo aka reero ku ndaagarukye tutungye eby’okugarukamu by’ebibuuzo ebyo kuruga omu Baibuli.”
● “Abantu nibeerarikirira aha ku ensi egi eraabe omu biro by’omumaisho. Nooteekateeka ngu obwire nibwija kuhika embeera mbi zihweho? [Tegyereza agarukyemu.] Abantu baingi nikibatangaaza ku barikumanya ngu Baibuli erimu amakuru marungi agarikutuha amatsiko. Ebi ni bimwe aha bibuuzo ebi Baibuli erikugarukamu.” Muhe akatabo kandi omushabe kutoorana ekibuuzo kimwe aha biri enyima y’akatabo. Mworekye oku arikubaasa kwega Baibuli orikukoresa eishomo eri yaatoorana. Kora entebeekanisa y’okugarukayo mugarukyemu ekibuuzo ekindi.
[Akabokisi aha rupapura 7]
Kutandika Kwegyesa Abantu Baibuli aha Murundi gw’Okubanza Tutarikwekiikuura:
● “Naija kukumanyisa aha ntebeekanisa nsya ey’okwegyesa abantu Baibuli. Akatabo aka kaine amashomo 15 agarimu Ebyahandiikirwe ebirikugarukamu ebibuuzo ebi ebikuru. [Mworekye ebiri aha mutwe gwako n’enyima yaako.] Oraateireho kwetegyereza ebiri omu Baibuli? [Tegyereza agarukyemu.] Ka nkworekye oku ekyo kyorobi. [Muhikaanise ebiteekateeko aha kacweka k’okubanza ak’ekibuuzo 3 omu eishomo 3, mushome na Okushuuruurwa 21:4, 5. Kyaba nikibaasika muhikaanise ebiteekateeko n’aha kacweka akarikukurataho n’ebyahandiikirwe ebiriho ekigambo shoma.] Ka nkuhe akatabo aka twegeho omurundi gumwe, reero oreebe ku oraabe noobaasa kugasirwa omu ntebeekanisa egi. Ku oraagikunde, noobaasa kugumizamu nooyega. Ku ndaagarukye nituza kwega eishomo ry’okubanza, kandi eishomo eryo nirigufu.”
[Akabokisi aha rupapura 7]
Twaba Tugarukireyo aha Bantu:
● Twagarukayo aha muntu owaayorekire ngu naayenda kumanya ebirikukiraho nitubaasa kugira tuti: “Naashemererwa kugaruka kukureeba. Naakureetera akatabo aka akarimu ebyahandiikirwe ebirikugarukamu ebibuuzo bingi. [Muhe akatabo reero omworekye ebiri enyima yaako.] Nikiiha ahari ebi eki orikwenda kutunga eky’okugarukamu kyakyo? [Tegyereza agarukyemu, reero omworekye eishomo eri yaatoorana.] Ka nkworekye oku orikubaasa kukoresa akatabo aka kutunga eby’okugarukamu kuruga omu Baibuli.” Mworekye oku arikubaasa kwega Baibuli murikuhikaanisa ebiteekateeko aha kacweka kamwe nari bubiri n’ebyahandiikirwe ebiriho ekigambo “shoma.” Okutandika kwegyesa omuntu Baibuli nikwo kyorobi kityo! Ou orikubuurira mutsigire akatabo, reero okore entebeekanisa kugarukayo. Mwaheza eishomo, nimubaasa kuhikaanisa ebiteekateeko aha rindi nari mutandike ery’okubanza.