Akatabo Akasya Akaraagabwe!

1. Ni katabo ki oku turaagabe omuri Novemba, kandi omugasho gwako niguuha?

¹ Omu ruteerane rwaitu Oruhango orw’Ebiro Bishatu orwa 2009 orwabaire rwine omutwe “Mugume Nimureeba!” tukatunga akatabo kasya akaine omutwe The Bible—What Is Its Message? Omuri Novemba ebibiina omu nsi yoona nibiija kugaba akatabo aka omurundi gw’okubanza. Akatabo aka nikaija kugasira kata abantu omu kicweka eki turikubuuriramu? Abantu baingi na munonga abo abari omu madiini agatarikwikiiririza omuri Kristo, nibamanya bikye munonga aha bikwatiraine na Baibuli. N’ahabw’ekyo, akatabo aka aha rupapura 3 nikashoboorora ngu kakozirwe kugamba “ahari Baibuli omu bugufu.”

2. Akatabo aka nitubaasa kukagaba tuta?

² Oku Turaakagabe: Noobaasa kugira oti: “Ninshaba ngu ongambire eki orikuteekateeka aha kyahandiikirwe eki. [Shoma 2 Timoseo 3:16.] Baingi abu turikugaaniira nabo nibaikirizana n’ebigambo ebi, abandi nibagira ngu Baibuli n’ekitabo kirungi kwonka. Iwe Baibuli noogiteekateekaho ki? [Tegyereza agarukyemu.] N’obu twakuba turi ba diini ki, hariho enshonga nungi ahabw’enki tushemereire kushwijuma Baibuli. [Shoma akacweka k’okubanza aha mutwe gw’orupapura 3.] Waaba nooshoma ebirikukwata aha Baibuli ebiri omu katabo aka, noija kureeba ngu Baibuli neeshoboorora aha mutwe gumwe mukuru.”

3. Ni nyanjura ki endiijo ei turikubaasa kukoresa, na munonga twaba nitubuurira omu kicweka ahu abantu baingi batarikwikiiririza omuri Kristo?

³ Aha hariho enyanjura endiijo ei turikubaasa kukoresa kukagaba, na munonga twaba nitubuurira omu kicweka ahu abantu baingi batarikwikiiririza omuri Kristo: “Ninshaba ngu ongambire eki orikuteekateeka aha biri omu kitabo eki ekirikwera. [Shoma Zaaburi 37:11.] Nooteekateeka ngu ensi neija kuba neeshusha ki obunabi obu ku buraahikiirizibwe? [Tegyereza agarukyemu.] Eki ni kimwe aha matsiko n’okuhuumurizibwa ebi abantu b’enganda zoona n’enyikiriza zoona barikubaasa kutunga kuruga omuri Baibuli.” Shoma akacweka k’okubanza aha mutwe gw’orupapura 3, reero omuhe akatabo aka.

4. Nitubaasa kukoresa tuta akatabo aka akasya omu kutandika kwegyesa omuntu Baibuli?

⁴ Tandika Kwegyesa Omuntu Baibuli: Twagarukayo nitubaasa kwijutsya ou twabuuriire ebi twagaaniireho kandi tugaaniire aha kacweka kamwe nari bubiri aha kicweka eki twaagaaniireho, turikukoresa ebibuuzo ebiri aha muheru gw’ekicweka ekyo. Nari waaba nooyenda kumuha akatabo Eki Baibuli Erikwegyesa, noobaasa kushoma nawe ebiri enyima y’akatabo aku waamutsigiire, reero omuhe akatabo Eki Baibuli Erikwegyesa, omubuuze omutwe gw’eshuura ogu yaakunda reero mugaaniire aha kacweka kamwe nari bubiri obw’eshuura egyo. Twena ka tuteereho kwejumbira kimwe omu kugaba akatabo aka omuri Novemba!