Oku Turikubaasa Kukoresa Akatabo Ni Baahi Abarikukora Ebi Yehova Akunda Obunaku Obu?
Akatabo Kasya Akatebeekanisiibwe Kuhwera Abeegi ba Baibuli Kumanya Ekibiina
1. Gamba enshonga ishatu ahabw’enki akatabo Abarikukora Ebi Yehova Akunda kaateirwe.
1 Waatandikire kukoresa akatabo kasya Ni Baahi Abarikukora Ebi Yehova Akunda Obunaku Obu? Katebeekanisiibwe (1) kuhwera abeegi ba Baibuli kumanya gye Abajurizi ba Yehova, (2) kubahwera kumanya ebi turikukora, (3) n’okubooreka oku ekibiina kyaitu kitebeekanisiibwe. Buri ishomo omu katabo aka, ni rigufu nimubaasa kurihikaanisaho ebiteekateeko omu dakiika itaano nari ikumi bwanyima ya buri kuheza kwega n’omwegi omu katabo akandi.
2. Gamba oku akatabo aka katebeekanisiibwe n’ebikarimu.
2 Oku Katebeekanisiibwe: Akatabo aka kabaganisiibwemu ebicweka bishatu, kandi buri kicweka nikishoboorora aha kibiina kya Yehova nk’oku kirikworekwa aharuguru. Buri ishomo aha mashomo 28 riri omu muringo gw’ekibuuzo kandi emitwe emikye eri omu nyuguta ezikwatsire neegarukamu ebibuuzo ebyo. Harimu ebishushani kuruga omu mahanga 50 ebirikworeka omurimo gwaitu ogujanjaire omu nsi yoona. Amashomo amaingi gaine akabokisi akaine omutwe “Manya Ebirikukiraho” akarimu obuhabuzi obu orikubaasa kukoresa kuhiga omwegi kubukuratira.
3. Nitubaasa kukoresa tuta akatabo Abarikukora Ebi Yehova Akunda?
3 Oku Orikubaasa Kukakoresa: Noobaasa kutandika orikworeka omuntu omutwe gw’eishomo oguri omu muringo gw’ekibuuzo. Mushome eishomo eryo, reero muhikaanise ebiteekateeko aha mitwe emikye eri omu nyuguta ezikwatsire. Nimubaasa kuhendera murikugarukamu ebibuuzo ebiri aha muheru gwa buri ishomo. Nimubaasa kushoma eishomo ryona omurundi gumwe reero bwanyima murigaaniireho, nari mushome buri kacweka murikukagaaniiraho. Aha byahandiikirwe ebyorekirwe, tooranaho ebi muraashome. Mugaaniire n’aha bishushani hamwe n’obubokisi obwine omutwe, “Manya Ebirikukiraho.” Ni kirungi kwega amashomo nk’oku gakurataine. Kwonka noobaasa kuguruka oze aha ishomo eririkukwata aha ki omwegi ashemereire kumanya ahonaaho. Nk’eky’okureeberaho, haaba nihaija kubaho oruteerane oruhango, noobaasa kuguruka oze aha eishomo 11.
4. Ahabw’enki okutunga akatabo aka akasya kirikwija kutuhwera?
4 Twayegyesa omuntu Baibuli, nitumuhwera kumanya gye Tataitwe ow’omu iguru. Kwonka, twine n’okumuhwera kwega ebirikukwata aha kibiina kya Yehova. (Enf. 6:20) Ka twine okushemererwa ahabw’okutunga akatabo aka akasya akoorobi kukoresa omu kwegyesa abantu ahari Yehova n’ekibiina kye!