Okwikiriza kw’Abajurizi ba Yehova—Ekicweka 1: Okuruga omu Mwirima
Omu Baibuli, omushana gwine akakwate n’amazima kandi omwirima gwine akakwate n’ebishuba. (Zab. 43:3; Isa. 5:20) Sitaane obu yaabeiha Haawa nibwo yaareetaho omwirima omu nsi, n’ekyarugiremu gukajanjaara hoona. (Kush. 12:9) Vidiyo erikwetwa Jehovah’s Witnesses—Faith in Action, Part 1: Out of Darkness, neeyoreka oku omushana gw’eby’omwoyo gwatandikire kwaka omu mwirima. (Isa. 60:1, 2) Waaheza kureeba vidiyo egi, noobaasa kugarukamu ebibuuzo ebi:
(1) Bwanyima y’okufa kw’entumwa, omwirima gukatandika guta? (2) Omu myaka ya 1100, niki ekyahwereire abantu kumanya ngu amakanisa gakaba nigegyesa ebitahikire? (3) Niki eki turikumanya ahari Henry Grew na George Storrs? (4) Ni bintu ki ebyabaireho ebyakwatsire munonga ahari Charles Russell? (5) Ow’eishe-emwe Russell, ishe na bagyenzi baabo bakaba bacondooza bata omuri Baibuli, kandi ni nyegyesa ki za Baibuli ezi baazoire? (6) Ahabw’enki ab’eishe-emwe aba baayegaitsire ahari guruupu ya Nelson Barbour, kwonka niki ekyareeteire ow’eishe-emwe Russell kubeetaanisaho? (7) Niki ekyabaireho omuri Gyuraayi 1879 ekyagarukire kureetaho omushana gw’eby’omwoyo? (8) Kuruga obwo, abeegi ba Baibuli bakakora ki kujanjaaza amakuru marungi? (9) Emyaka mingi enyima, niki eki abeegi ba Baibuli baabaire bategyereize kubaho omuri 1914? (10) Abeegi ba Baibuli bakatunga buremeezi ki bwanyima y’okufa kw’ow’eishe-emwe Russell? (11) Abeegi ba Baibuli bakakora ki bwanyima y’ow’eishe-emwe Rutherford na bagyenzi be kuruga omu kihome? (12) Vidiyo egi ekuhwereire eta kwongyera kwetegyereza gye n’okusiima ekibiina kya Yehova? (13) Vidiyo egi ekuhwereire eta kugumizamu omaririire orikubuurira n’obumanzi n’obu waakuba nohiiganisibwa? (14) Nitubaasa kukoresa tuta vidiyo egi kuhwera abanyabuzaare, abeegi ba Baibuli n’abandi?
Ab’eishe-emwe abo ka baatuteraireho eky’okureeberaho kirungi omu by’omwoyo! Omu nsi y’omwirima omu by’omwoyo, bakajwisa omushana gwabo baine obumanzi n’obweziriki. Ka tuteereho kubatooreza kandi ‘tugume tugyende nk’abaana b’omushana.’—Efe. 5:8.