Omu Kubuurira Mube Abegyendesereza
1. Ahabw’enki twine kuba abegyendesereza omu kubuurira?
1 ‘Nk’entaama omu mishega,’ abaheereza ba Ruhanga nibabuurira “ahagati y’ab’obusingye obukiikami.” (Mat. 10:16; Fil. 2:15) Amakuru agarikukwata aha kwesharinga, ebikorwa by’obushaarizi n’okubuzaho abantu ebiri buri hamwe, byona nibihamya ngu abantu babi ‘beyongyeire kuba babi.’ (2 Tim. 3:13) Ni misingye ki ya Baibuli ei turikubaasa kugyenderaho kutuhwera kuba abegyendesereza omu kubuurira?—Mat. 10:16.
2. Ni mbeera ki ezirikubaasa kukwetengyesa ngu oruge omu kicweka ahonaaho oze kubuurira ahandi?
2 Koresa Obwengye: Ebiri omu Enfumu 22:3 nibyoreka obukuru bw’okuteeraho ‘kweshereka’ akabi. Guma oyeteekateekire ahakuba embeera nungi nizibaasa kuhinduka ahonaaho zibe mbi. Noobaasa kureeba abapuriisi nari abantu baingi baatandika kwijura omu nguuto. Obumwe ou orikubuurira naabaasa kukugambira aha kiriyo nikiza kubaho. Omu mwanya gw’okwezigaziga, nikiba kiri eky’obwengye kugyenda ahonaaho okaza kubuurira ahandi.—Enf. 17:14; Yoh. 8:59; 1 Tes. 4:11.
3. Omusingye oguri omu Omubuurizi 4:9 nigukwata guta aha kubuurira kwaitu?
3 Buurira n’Abandi: Omubuurizi 4:9 nihagira hati: “Ababiri nibakira omwe.” Ku oraabe otwire noobuurira wenka otarikuhikwaho kabi, na hati nikikibaasika? Omu bicweka ebimwe nikikibaasika. Kwonka omu bicweka ebindi n’eky’akabi munyaanyazi-itwe nari omubuurizi omuto kubuurira enju aha nju wenka na munonga omu mwabazyo. Ebirikubaho nibyoreka ngu ni kikuru okubuurira muri babiri. (Mub. 4:10, 12) Mwaba nimubuurira omu kicweka muri baingi muteereho kurindana. Waaza kuruga omu kicweka eki mwaba nimubuuriramu manyisa abu waaba noobuurira nabo.
4. Twena omu kibiina nitubaasa kukora ki kubaasa kugira oburinzi?
4 Obu abareeberezi nibo ‘barikurinda amagara gaitu,’ baine obujunaanizibwa bw’okutuha obuhabuzi oburikuhikaana n’ekicweka kyaitu. (Heb. 13:17) Yehova naija kutuha emigisha twaba abacureezi kandi tukakwatanisa nabo. (Mik. 6:8; 1 Kor. 10:12) Twena abaheereza ba Ruhanga ka tuteereho kubuurira gye omu kicweka kyaitu, kwonka butoosha tube abegyendesereza.