Eka Yaawe Neeyetebeekanisa Kuhonokaho?
1 Obunabi obwahikiriziibwe nibuha obuhame bw’amaani ngu emperu y’ensi egi embi eri haihi kuhika. Ebiro ebi turimu ni bibi munonga nk’ebyabandiize Omwegyemure. (Mat. 24:37-39) Noa akakira okuhwerekyerera kw’ensi egyo eya ira ahabw’okugira ngu ‘akaguma naagyenda na Ruhanga.’ (Kut. 6:9) Noa aine kuba yaayegyeise ab’omu ka ye emihanda ya Yehova ahabw’okuba nabo bakahonokaho. Ni mu muringo ki ogu turikubaasa kutoorezamu Noa reero tukeetebeekanisa nk’eka kuhonokaho aha kucwekyerera kw’obusingye obu obubi?
2 Omubuurizi w’Okuhikiirira: Noa ‘omubuurizi w’okuhikiirira’ akagumisiriza kumara emyaka nka 40 nari 50. (2 Pet. 2:5) Yaaba bataahi be baabaire nibakoresibwa baamaraika abagomi nari batarikubakoresa, baine kuba baamushekyereire arikubabuurira. Butoosha abantu tibarikufayo aha bi turikubabuurira kandi nibatushekyerera, ekirikworeka ngu emperu y’obusingye obu eri haihi. (2 Pet. 3:3, 4) Kwonka obutashushana n’abantu b’omu bunaku bwa Noa, baingi hati nibahurikiza kandi ‘bahimintikira’ omu kuramya kwa Yehova. (Isa. 2:2) Twagumisiriza, nitwija ‘kwejuna kandi tujune n’abarikutuhurikiza’. (1 Tim. 4:16) Ka ni kikuru abazaire kwegyesa abaana baabo omu bigambo n’omu bikorwa obukuru bw’okubuurira!—2 Tim. 4:2.
3 ‘Akatwaza Atyo’: Noa n’eka ye bakahonokaho ahabw’okukuratira gye ebiragiro bya Yehova. (Kut. 6:22) Naitwe omu bunaku obu twine ‘kuguma tweteekateekire kworobera’ obuhabuzi oburikuruga omu Baibuli hamwe n’aha mwambari omwesigwa. (Yak. 3:17, NW) Ishe abaana omwe akagyendera aha buhabuzi obu yaatungire kuruga omu kibiina kya Yehova. Nk’eky’okureeberaho, akaba ayebembera okwega kwabo okw’eka buri saabiiti kandi agyenda n’ab’omu ka ye kubuurira buri wiikenda nk’oku obuhabuzi bwabaire nibugira. Buri saabiiti, akaba ateeraho kugyenda n’omwe aha baana be omu kubuurira. Okuguma ‘naatwaza atyo’ kukahwera abaana be, kandi boona mukaaga bakakura baaba abaheereza ba Yehova abeesigwa.
4 Emperu y’obusingye obu neija kubaho kitaraariire. (Luk. 12:40) Twatooreza Noa kandi tukooreka okwikiriza, itwe n’ab’omu ka yaitu buzima nitwija kuba twetebeekaniise kuhonokaho.—Heb. 11:7.