Emiringo Etaano y’Okutungamu Abeegi ba Baibuli
1. Oine kukora ki ku oraabe noogumirwa kutunga omwegi wa Baibuli, kandi n’ahabw’enki?
1 Nikikugumira kutunga omuntu w’okwegyesa Baibuli? Guma nooteeraho. Yehova naaha omugisha abo abarikugumizamu nibakora ebi akunda. (Gal. 6:9) Ahaifo hariho obuhabuzi bw’emiringo etaano oburikubaasa kukuhwera.
2. Nitubaasa kukora ki kutunga omwegi wa Baibuli?
2 Buuza Abantu Yaaba Nibenda Kwega Baibuli: Baingi nibamanya ngu nitugaba Watchtower na Awake!, kwonka nibabaasa kuba batarikumanya ngu nitwegyesa abantu Baibuli. Waaba noobuurira enju aha nju noobaasa kubuuza omuntu yaaba naayenda kwega Baibuli. Noobaasa n’okubuuza abu otwire nootaayaayira abarikwenda kumanya ebirikukiraho yaaba nibenda kwega Baibuli. Baayanga noobaasa kugumizamu noobaha ebitabo kubahwera kukunda amazima. Ow’eishe-emwe omwe akaba atwire naataayaayira omushaija n’omukazi we arikubaha magaziini. Eizooba rimwe ku yaaherize kubaha magaziini akababuuza ati: “Mukaayenzire kwega Baibuli?” Kikamutangaaza ku baikiriize kwega. Hati n’ab’eishe-emwe.
3. Tushemereire kuteekateeka ngu abasya boona abarikwija omu nteerane n’abeegi ba Baibuli? Shoboorora.
3 Abarikwija omu Nteerane: Otateekateeka ngu boona abasya abarikwija omu nteerane nibeega Baibuli. Ow’eishe-emwe omwe akagira ati: “Baingi aha beegi ba Baibuli abu nyine nkabatunga ndikubuuza abasya abarikwija omu nteerane.” Munyaanyazi-itwe omwe akacwamu kubuuza omukazi owaabaire aine enshoni kandi aine abahara omu kibiina ababatiziibwe. Omukazi ogwo akaba atwire naija omu nteerane kumara emyaka nka 15 kandi akaba aija enteerane zirikutandika kandi agyenda ahonaaho zahwa. Akaikiriza kwega Baibuli kandi yaija omu mazima. Munyaanyazi-itwe akahandiika ati: “Niikinshasha kureeba ngu nkamara emyaka 15 ntakamubuurize yaaba naayenda kwega Baibuli!”
4. Okubuuza abandi nikituhwera kita kutunga omwegi wa Baibuli?
4 Buuza Abandi: Munyaanyazi-itwe omwe naagyenda n’abandi baaba nibaza kwega n’abeegi baabo ba Baibuli. Ku barikuheza kwega naabuuza omwegi ku araabe haine ou arikumanya orikwenda kwega Baibuli. Omuntu ou otwire nootaayaayira waamuha akatabo Eki Baibuli Erikwegyesa, noobaasa kumubuuza oti: “Haine ou orikumanya orikubaasa kuba naayenda akatabo aka?” Obumwe ababuurizi abamwe nari baapayoniya nikibaasa kuba kitarikubabaasikira kwegyesa omuntu Baibuli ou bashangire omu kubuurira. N’ahabw’ekyo, bashabe kukuha abantu nk’abo kubeegyesa Baibuli.
5. Ahabw’enki nitubaasa kubuuza abatari mu mazima abashweraine n’abagarimu yaaba nibenda kwega Baibuli?
5 Abatari mu Mazima Abashweraine n’Abagarimu: Omu kibiina kyanyu harimu ababuurizi abashweraine n’abatari mu mazima? Abatari mu mazima abamwe nibanga kugaaniira aha Baibuli n’abakristaayo abu bari nabo omu bushwere, kwonka nibabaasa kwikiriza otari w’omu ka yaabo kubeegyesa Baibuli. Nikiba kiri kirungi kubuuza omushaija nari omukazi Omukristaayo akugambire omuringo murungi gw’okubuuriramu ou ari nawe omu bushwere.
6. Okushaba ni kukuru kuta waaba nooteeraho kusherura omwegi wa Baibuli?
6 Okushaba: Okushaba ni kukuru munonga omu kusherura abeegi ba Baibuli. (Yak. 5:16) Yehova naaraganisa kuhurira okushaba kwaitu kwaba nikuhikaana n’ebi akunda. (1 Yoh. 5:14) Ow’eishe-emwe omwe owaabaire aine bingi by’okukora, akashaba ngu abaase kutunga omwegi wa Baibuli. Omukazi we akaba naabangaanisa yaaba iba naija kubaasa kutunga obwire bw’okwegyesa omwegi na munonga omwegi yaaba aine ebirikumuteganisa. Ekyo akakimanyisa Yehova omu kushaba ngu iba atungye omwegi wa Baibuli. Omu saabiiti nka ibiri okushaba kwabo kukagarukwamu obu payoniya omu kibiina kyabo yaashangire omushaija owaabaire naayenda kwega Baibuli reero akamuha ow’eishe-emwe ogwo. Omukazi we akahandiika ati: “Ogwo weena orikuteekateeka ngu okwegyesa omuntu Baibuli kigumire munonga, niimugira nti: Shaba kyenyine eki orikwenda, kandi ogumizemu orikushaba aha nshonga egyo. Tutungire okushemererwa kwingi kukira oku naabaire ninteekateeka.” Naiwe waagumisiriza noobaasa kutunga omwegi wa Baibuli kandi otungye okushemererwa ahabw’okuhwera omuntu kuza omu ‘irembo eririkutaasya omu magara.’—Mat. 7:13, 14.