Oku Orikubaasa Kugasirwa omu Guruupu y’Okubuurira Ei Orimu
1. Ni birungi ki ebyabaire biri omu Kwega Ekitabo okw’Ekibiina ebi turikutunga na hati omu guruupu zaitu z’okubuurira?
1 Haine eki orikuhurira noofeerwa ekyabaire kiri omu Kwega Ekitabo okw’Ekibiina? Guruupu z’okwega ekitabo zikaba zirimu abantu bakye. Ekyo kikaba kitubaasisa kurahuka kutunga abanywani abaabaire batuhwera kuguma tuhami omu kwikiriza. (Enf. 18:24) Orikwebembera okwega ekitabo kikaba kimworobera kumanya embeera zaitu, ekyo kimubaasisa kuhwera buri omwe omu by’omwoyo. (Enf. 27:23; 1 Pet. 5:2, 3) Ebyo byona nitubitunga na hati omu guruupu zaitu z’okubuurira.
2. Omu guruupu zaitu nitubaasa kworeka tuta ngu nitufayo kutunga abanywani abaraatuhwere omu by’omwoyo?
2 Ba Niiwe Waabanza Kugira Eki Waakora: Guruupu z’okubuurira zirimu abantu bakye nk’oku ez’okwega ekitabo zaabaire ziri. Ahabw’okubuurira hamwe, nikituhwera kugira omukago guhami n’abu turikubuurira nabo. (Fil. 1:27) Ni bangahi abu waabuuriire nabo omu guruupu yaanyu? Noobaasa kuteeraho ‘kushashaanuka’? (2 Kor. 6:13) Kandi obumwe nitubaasa kweta omwe aha bari omu guruupu yaitu kuba naitwe omu Kuramya okw’Eka nari kwija kurya naitwe. Omu bibiina ebimwe, guruupu z’okubuurira nizitaana embu omu kutebeekanisiza eby’okurya owaaha orubazo otari w’omu kibiina kyabo. Eizooba eryo, abari omu guruupu egyo nibarya hamwe n’obu owaaha orubazo yaakuba atagumireho kurya nabo.
3. Omu guruupu zaitu z’okubuurira nitubaasa kutunga tuta obuhwezi omu by’omwoyo?
3 N’obu turaabe nitwija omu nteerane emirundi ebiri buri saabiiti, ekyo tikiraatuubize aha bujunaanizibwa bw’abareeberezi obw’okutuhwera omu by’omwoyo. Buri guruupu neeba eine orikugyebembera, kuhwera buri mubuurizi omu by’omwoyo n’okumutendeka omu kubuurira. Orikwebembera guruupu yaanyu ku araabe atakakozire ntebeekanisa kubuurira naiwe, noobaasa kumushaba kubuurira naiwe. Kandi buri kwezi, omureeberezi orikukora ahaby’obuheereza naabuurira na buri guruupu omurundi gumwe. Omu bibiina ebitaine guruupu nyingi, naabaasa kutebeekanisa kuguma naataayaayira buri guruupu emirundi ebiri omu mwaka. Nooteeraho kutebeekanisa kwejumba omu kubuurira obu arikuba ataayaayiire guruupu yaanyu?
4. (a) Enteerane z’okubuurira zitebeekanisiibwe zita? (b) Ahabw’enki n’omugisha waacwamu ngu enteerane z’okwetebeekanisa kuza kubuurira zibe omu ka yaawe?
4 Ni kirungi buri guruupu kugira oruteerane rwayo buri wiikenda orw’okwetebeekanisa kuza kubuurira. Okugira enteerane z’okwetebeekanisa kuza kubuurira, omu myanya etari emwe omu shaaha nizo zimwe, nikyorobera ababuurizi kuziijamu n’okurahuka kuhika omu kicweka ky’okubuuriramu. Nikyoroba kutebeekanisa ababuurizi bakarahuka kuza ei barikuza kubuurira hatabaireho kushiisha bwire. Nikyorobera n’orikwebembera guruupu kufayo ahari buri omwe ori omu guruupu ye. Kwonka obumwe, nikibaasa kwetengyesa ngu guruupu ibiri nari n’okukiraho zibuurire hamwe. Ekibiina kyona kyaba nikiza kubuurira hamwe aha Rwamukaaga orurikubanza omu kwezi nari bwanyima y’okwega Watchtower, ni kirungi abari omu buri guruupu kushutama hamwe reero buri omwe orikwebembera guruupu akorese obudakiika bukye kutebeekanisa abari omu guruupu ye oruteerane rutakahendiire n’okushaba.—Reeba akabokisi “Eka Yaawe Neebaasa Kubamu Oruteerane rw’Okubuurira?”
5. N’obu Okwega Ekitabo okw’Ekibiina kuraabe kutakiriho, twine buhame ki?
5 N’obu Okwega Ekitabo okw’Ekibiina kuraabe kutakiriho, Yehova naagumizamu kutuha buri kimwe eki turikwetenga kubaasa kukora ebi akunda. (Heb. 13:20, 21) Ahabw’okugira ngu Yehova niwe arikutureeberera, tihaine eki tukyenire. (Zab. 23:1) Ni tutunga ebirungi bingi kurabira omu guruupu zaitu z’okubuurira. Twateeraho ‘kubiba nyingi,’ nitwija ‘kushaaruura bingi.’—2 Kor. 9:6.
[Akabokisi aha rupapura 6]
Eka Yaawe Neebaasa Kubamu Oruteerane rw’Okubuurira?
Guruupu z’okubuurira niziteeranira hamwe omu wiikenda ahabw’okugira ngu tihariho amaka agarikumara ag’okugiriramu enteerane ezo. Enteerane z’okwetebeekanisa kuza kubuurira nizitebeekanisibwa ekibiina, n’ahabw’ekyo n’omugisha waacwamu ngu zibe omu ka yaawe. Otatiina ahabw’okugira ngu eka yaawe ti mpango. Abareeberezi nibafayo kumanya yaaba eka yaawe eri hare nari haihi n’ebindi ebirikwetengyesa nk’oku baabaire bakora baaza kucwamu ahu okwega ekitabo okw’ekibiina kuraabe. Ku oraabe nooyenda ngu eka yaawe ebemu enteerane ezo, manyisa orikwebembera guruupu yaawe.