Amakuru g’Obukama Na. 38 Neija Kugabwa Omuri Desemba!

1. Abantu baine bibuuzo ki ebirikukwata aha bafu, kandi nibiija kugarukwamu bita omuri Desemba?

¹ N’obu waakuba ori wa nyikiriza ki, rufu n’omuzigu w’abantu boona. (1 Kor. 15:26) Baingi nibebuuza ei abafu bari kandi yaaba barigaruka kubareeba. N’ahabw’ekyo, ebibiina omu nsi yoona nibiija kwejumba omu kugaba turakiti Amakuru g’Obukama Na. 38, eine omutwe Abaafiire Buzima Baryazooka? Omu Uganda kampeyini egi ey’omutaano neija kutandika Desemba 1. Bwanyima ya kampeyini, Amakuru g’Obukama Na. 38 neija kukoresibwa omu kubuurira nka turakiti ezindi.

2. Turakiti Amakuru g’Obukama Na. 38 etebeekanisiibwe eta?

² Oku Etebeekanisiibwe: Amakuru g’Obukama Na. 38 etebeekanisiibwe kugira ngu yaakubwa omutwe gwa turakiti n’ebigambo “Noogira ngu . . . eego? ngaaha? torikuhamya?” bize aha mutwe gwayo. Orikuza kushoma turakiti yaagikubuurira, naija kureeba eki Baibuli erikwegyesa aha bikwatiraine n’ekibuuzo ekiri ahari turakiti n’oku araagasirwe omu ki Baibuli erikuraganisa. Naija kureeba enshonga ahabw’enki ashemereire kwikiriza ebi Baibuli erikwegyesa. Enyima yaako hariho ekibuuzo kirungi eki araije kuteekateekaho kandi ekiraamuhigye kwenda kumanya ebirikukiraho.

3. Amakuru g’Obukama Na. 38 neija kugabwa eta?

³ Oku Turakiti Eraagabwe: Kampeyini egi neija kushushana na kampeyini eyokweta abantu aha Kiijutsyo n’aha ruteerane oruhango orw’ebiro bishatu. Abareeberezi nibaija kukora entebeekanisa y’okugaba turakiti egi omu kicweka kyanyu kyona ky’okubuuriramu, nk’oku ebaruha ei baatungire Apuri 1, 2013 erikworeka. Ebibiina ebitaine kicweka kihango by’okubuuriramu nibibaasa kwehayo kuhwera ebibiina ebibiri haihi ebiine ekicweka kihango ky’okubuuriramu. Waaba nootunga Amakuru g’Obukama Na. 38, twara ezi oraakorese omu wiiki emwe. Turakiti egi neebaasa kugabwa omu myanya erimu abantu baingi bwanyima y’okuheza kugigaba enju aha nju omu kicweka kyanyu ky’okubuuriramu. Yaahwaho okwezi kutakahendiire, ebitabo eby’okugaba omu kwezi okwo bishemereire kukoresibwa. Aha Rwamukaaga orurikubanza, nitwija kuta omutima aha kampeyini egi ey’omutaano omu mwanya gw’okutandika kwegyesa abantu Baibuli. Omu wiikenda, tushemereire kugaba na magaziini kyaba nikibaasika. Oyetebeekanise kwejumba omu kampeyini egi ey’omutaano?