Akabokisi k’Ebibuuzo

◼ Mbwenu shi munyaanyazi-itwe yaagyenda n’ow’eishe-emwe aha mwegi ou arikwegyeseza aha muryango, aine kwetwekyerera?

Munyaanyazi-itwe yaagyenda n’ow’eishe-emwe kwega n’omwegi wa Baibuli ou atwire naayega nawe, naba aine kwetwekyerera. (1 Kor. 11:3-10) Watchtower eya Gyuraayi 15, 2002, orupapura 27, neeshoboorora eti: “Egi n’entebeekanisa ahu orikuba naayegyesa omwegi arikwebembera okwega. Omu mbeera nk’egi, okwega oku nikuba nikutwarirwa omu ntebeekanisa z’ekibiina. Munyaanyazi-itwe yaagyenda n’ow’eishe-emwe aha mwegi wa Baibuli, naaba aine kwetwekyerera.” Nikyo kimwe na yaaba naayegyeseza omwegi wa Baibuli aha muryango nari omu myanya endiijo yoona.

Munyaanyazi-itwe yaaba agarukireyo aine ekigyendererwa ky’okutandika kwegyesa omuntu Baibuli nari kuhikaanisa ebiteekateeko aha biri omu bitabo ebi turikukoresa kwegyesa abantu Baibuli ari n’ow’eishe-emwe, tikirikumwetengyesa kwetwekyerera. Ahabw’okugira ngu ou orikuba noogaaniira nawe aha muryango naatwara obwire kuhinduka omwegi wa Baibuli, omubuurizi aine kukoresa obwengye kumanya obu araatandikye kwetwekyerera.