Yehova Naandeeba Ata?
1. Baibuli neegyeragyeranisibwa eta n’endeeberwamu?
1 Nooyereebera omu ndeeberwamu emirundi engahi? Baingi nitugikoresa buri izooba kureeba ahu twine kuteereza. Baibuli neegyeragyeranisibwa n’endeeberwamu. Okushoma Ekigambo kya Ruhanga nikutubaasisa kushwijuma emitima yaitu, kandi Yehova niyo arikureeba. (1 Sam. 16:7; Yak. 1:22-24) Ekigambo kya Ruhanga nikibaasa “kucaaka ebi omuntu arikuteekateeka n’ebi amaririire omu mutima gwe kukora.” (Heb. 4:12) Okushoma Baibuli hamwe n’okuteekateeka aha bitwashoma buri izooba nikituhwera kita kumanya ahu twine kukora empindahinduka kubaasa kuba ababuurizi barungi?—Zab. 1:1-3.
2. Baibuli neebaasa kutuhwera eta kweshwijuma?
2 Koresa Baibuli nk’Endeeberwamu: Ebiri omu Baibuli ebirikukwata aha baheereza ba Yehova abeesigwa nibituhwera kumanya emitwarize ei arikusiima. Nk’eky’okureeberaho, Daudi akooreka obweziriki ahabw’eiziina rya Ruhanga. (1 Sam. 17:45, 46) Isaaya taratiinire kwehayo kubuurira omu kicweka ekyabaire kigumire. (Isa. 6:8, 9) Rukundo ei Yesu yaabaire ainiire Ishe ow’omu iguru ekamureetera kutareeba omurimo gw’okubuurira nk’omugugu, kureka ogurikureeta okumarwa kandi gukagaruramu amaani. (Yoh. 4:34) Abakristaayo b’omu kyasha ky’okubanza bakabuurira n’obweziriki, bakaba nibesiga Yehova, kandi bamaririire kugumizamu. (Byak. 5:41, 42; 2 Kor. 4:1; 2 Tim. 4:17) Twateekateeka aha by’okureeberaho ebi nikituhwera kweshwijuma kubaasa kwongyera kuheereza gye Yehova.
3. Ahabw’enki twine kukora empindahinduka ezirikwetengyesa ahonaaho?
3 Koora Empindahinduka: Twayereebera omu ndeeberwamu kandi tukanga kuboneza ahu kirikwetengyesa, tikirikutugasira. Nitubaasa kushaba Yehova kutuhwera kweshwijuma kandi tukakora empindahinduka ezirikwetengyesa. (Zab. 139:23, 24; Luk. 11:13) Ahabw’okugira ngu obwire obutsigaireyo nibukye kandi amagara g’abantu gari omu kabi, titushemereire kweziringa omu kukora empindahinduka.—1 Kor. 7:29; 1 Tim. 4:16.
4. Niki ekirikuba aha muntu orikushoma Ekigambo kya Ruhanga kandi akata omu nkora ebi yaayega?
4 Oku Yehova arikureeba omuntu nari omutima gwe, nikyo kikuru munonga kukira emireebekyere y’aharuguru. (1 Pet. 3:3, 4) Niki ekirikuba aha muntu orikushoma Ekigambo kya Ruhanga kandi akata omu nkora ebi yaayega? Naaba “atari orikubihurira akeebwa, kureka ari omukozi orikubyorobera, omuntu ogwo aryaheebwa omugisha omu kukora kwe.” (Yak. 1:25) Buzima nitwija kugira okushemererwa kandi tube ababuurizi barungi, ‘nk’endeeberwamu tworekye ekitiinisa kya Mukama.’—2 Kor. 3:18.