Oyetebeekanisiize Obutabanguko Oburikubaasa Kubaho?

Emperu y’obusingye obu yaaguma neyirira haihi, obutabanguko, obuzahambuuki, n’entaro nibiza kweyongyera. (Kush 6:4) Nitubaasa kwetebeekanisiiza tuta embeera zigumire eziraabeho omu biro by’omumaisho?

• Yetebeekanise omu by’omwoyo: Sherura emisingye n’ebindi ebiri omu Baibuli ebirikubaasa kukuhwera kwongyera kwesiga Yehova n’ekibiina kye kandi oguma otaine rubaju. (Enf 12:5; jr-E 125-126 kacw. 23-24) Hati nibwo bwire bw’okugira abanywani abahamire omu kibiina.—1Pet 4:7, 8

• Yetebeekanise omu by’omubiri: Waaba otarikubaasa kuruga omuka tebeekanisa kugira ngu otahikwaho akabi kandi oine byona ebirikwetengyesa. Tebeekanisa eki oraije kukora kyayetengyesa kuruga omu ka. Shwijuma ebiri omu nshaho yaawe y’okwerindisa, kandi ohamye ngu harimu eby’okwerindisa n’esente. Hamya ngu noobaasa kuhurizana n’abareeberezi, kandi nabo nibabaasa kuhurizana naiwe.—Isa 32:2; g17.5-E 3-7

Haabaho obutabanguko, guma nookora ebi orikukora butoosha omu kuramya Yehova, nk’okushaba, okweyegyesa n’okuza omu nteerane. (Fil 1:10) Yetantare kuruga omu mwanya okaza omu gundi kyaba kitarikwetengyesa. (Mat 10:16) Hwera abandi orikubaha eby’okurya n’ebindi bintu.—Rom 12:13.

MUREEBE VIDIYO OYETEBEEKANISIIZE EKIHIKIIRIZI? REERO OGARUKYEMU EBIBUUZO EBI:

• Yehova naabaasa kutuhwera ata omu bwire bw’ekihikiirizi?

• Ni bintu ki ebi turikubaasa kukora kwetebeekanisa?

• Nitubaasa kuhwera tuta abandi abahikirweho ebihikiirizi?