Ebibuuzo Kuruga omu Bashomi

Abeegi ba Yesu 70 abu yaabaire ayoohereize kubuurira bakaba bari nkahi, obu yaatandikaho Ekiihuro kya Mukama Waitu? Bakaba bamutsigireho?

Titwine kuteekateeka ngu Yesu akaba atakisiima abeegi be 70, nari ngu bakaba bamutsigireho ahabw’okugira ngu bakaba batariho obu yaatandikaho Ekiihuro kya Mukama Waitu. Kwonka akaba naayenda kuba n’entumwa ze bonka.

Yesu akaba naasiima entumwa ze 12, n’abeegi be 70. Akatoorana omu beegi be baingi abashaija 12 abu yaayetsire entumwa. (Luk. 6:​12-16) Akaba ari Galilaaya obu yaayeta ikumi na babiri, reero ‘akabatuma kugamba eby’obukama bwa Ruhanga n’okukiza abarwaire.’ (Luk. 9:​1-6) Bwanyima ku yaabaire ari Buyudaaya, ‘akatoorana abandi makumi mushanju, yaabatuma babiri babiri.’ (Luk. 9:51; 10:1) Yesu akaba aine abakuratsi omu bicweka bitari bimwe, abaabaire nibabuurira ebirikumukwataho.

Abayudaaya abaahindukire abeegi be bakaba nibaijuka Okuhingurwaho buri mwaka, obundi bari n’eka zaabo. (Kur. 12:​6-11, 20) Obwire bw’okufa kwa Yesu ku bwairiire haihi, we n’entumwa ze bakaza Yerusaalemu. Kwonka taratebeekaniise Obugyenyi bw’Okuhingurwaho obw’abeegi be boona aba Buyudaaya, Galilaaya na Perea. Buzima, omu bwire obwo akaba naayenda kuba n’entumwa ze bonka. Akabagira ati: “Nyetengire munonga kuriira hamwe naimwe Okuhingurwaho oku, ntakabonabonesiibwe.”—Luk. 22:15.

Yesu akaba aine enshonga nungi ahabw’enki yaatwarize atyo. Akaba ari hakye kufa ‘nk’Omwana gw’entaama wa Ruhanga, orikwihaho ekibi ky’ensi.’ (Yoh. 1:29) Akaba aine kufeera omuri Yerusaalemu, ahu baabaire batwire nibatambira Ruhanga ebitambo. Okufa kwa Yesu kukaba nikwija kureeta okucungurwa okurikukirira kimwe okwareetsirweho omwana gw’entaama ogu Abaisraeli baariire aha kiro eki baarugiireho Misri. (1 Kor. 5:​7, 8) Eki Yesu yaakozire kikaba nikibaasisa entumwa 12 kuba omusingi gw’ekibiina Ekikristaayo. (Efe. 2:​20-22) Ekirikushemeza, Yerusaalemu ensya ‘eine emisingi ikumi n’ebiri, ehandiikirweho amaziina g’entumwa ikumi na ibiri ez’Omwana gw’entaama.” (Kush. 21:​10-14) Buzima, entumwa za Yesu bakaba nibaija kukora kihango omu kuhikiiriza ekigyendererwa kya Ruhanga. N’ahabw’ekyo nitubaasa kwetegyereza ahabw’enki Yesu yaabaire naayenda kurya nabo Okuhingurwaho okw’aha muheru, n’Ekiihuro kya Mukama Waitu.

Abeegi ba Yesu 70 n’abandi bakaba batari nawe aha kiihuro ekyo. Kwonka nabwo, abeegi be boona abaagumire bari abeesigwa bakaba nibaija kugasirwa omu Ekiihuro kya Mukama Waitu eki yaatandikireho. Na boona abaashukirweho omwoyo gurikwera bwanyima bakaba nibaija kutaaha omu ndagaano y’Obukama, ei Yesu yaakozire n’entumwa ze aha kiro ekyo.—Luk. 22:​29, 30