Oku Entaro n’Obutabanguko Biraahweho

RUHANGA NAIJA KWIHAHO OBUTEGYEKI BW’ABANTU

Ruhanga naija kumariraho kimwe gavumenti z’abantu arikukoresa orutaro oru Baibuli erikweta Haramagedoni.a (Okushuuruurwa 16:16) Omu bwire obwo, ‘abagabe b’ensi zoona’ nibaija kurundaanwa, kuza omu “rugamba orw’ekiro kikuru kya Ruhanga ow’Obushoboorozi Bwona.” (Okushuuruurwa 16:14) Haramagedoni n’orutaro rwa Ruhanga oruraahendere entaro zoona.

Ruhanga naaza kwihaho gavumenti z’abantu ateho Obukama bwe nari gavumenti ye eraagumeho ebiro byona erikutegyekyera omu iguru. (Danieli 2:44) Kandi akatoorana omwana we Yesu Kristo kuba omugabe w’obukama obwo. (Isaaya 9:​6, 7; Matayo 28:18) Gavumenti egyo nibwo Obukamab obu Yesu yaayegyeise abeegi be kushaba ngu bwije. (Matayo 6:​9, 10) Abantu omu nsi yoona nibaija kuba ahansi ya gavumenti emwe eraabe neetegyekwa Yesu.

Okutaana n’abategyeki abantu, Yesu tarikwija kukoresa obushoboorozi bwe kukora eby’okweyendeza. Ahabw’okugira ngu n’omuringaaniza kandi tarikushoroora, tihaine n’omwe oraayerarikirire ngu naija kutwarizibwa kubi ahabw’erangi ye, eihanga rye, nari oruganda rwe. (Isaaya 11:​3, 4) Omu bwire obwo, abantu tikiraije kubeetengyesa kurwanirira obugabe bwabo. Ahabw’enki? Ahakuba Yesu naija kuba naafayo aha byetengo bya buri muntu. ‘Naija kujuna omukyene, ku arimutakira, n’omworo otaine kihwera. . . . acungure amagara gaabo, agaihe omu kubonabonesibwa n’omu mwaga.’—Zaaburi 72:​12-14.

Obukama bwa Ruhanga nibwija kwihaho eby’okurwanisa byona ebiriho omu nsi. (Miika 4:3) Kandi nibwija n’okwihaho abantu ababi abarikurwana entaro bakashiisha obusingye bw’abandi. (Zaaburi 37:​9, 10) Buri omwe omu nsi naija kuba aine oburinzi n’obu yaakuba naatuura mu mwanya ki.—Ezekieli 34:28.

Ahansi y’Obukama bwa Ruhanga, buri omwe naija kutuura omu mbeera nungi. Obukama nibwija kwihaho oburemeezi oburikureetera abantu kurwana nk’obworo, enjara n’okubura oburaaro. Buri muntu naija kuba aine eby’okurya birungi n’omwanya murungi gw’okutuuramu.—Zaaburi 72:16; Isaaya 65:​21-23.

Obukama bwa Ruhanga nibuza kwihaho oburemeezi obureetsirweho entaro. Eki nikitwariramu obuhuta bw’aha mubiri, obusaasi bw’aha mutima n’okwehurira kubi, ebirikureetwaho entaro. Kandi n’abaafiire nibaija kugaruka babe abahuriire, batuure omu nsi. (Isaaya 25:8; 26:19; 35:​5, 6) Amaka nigaija kugaruka kuba hamwe kandi tibarikwija kugaruka kwijuka ebyabaireho omu ntaro ahakuba “ebya ira biryaba bihwaireho.”—Okushuuruurwa 21:4.

RUHANGA NAIJA KWIHAHO EKIBI

Obukama bwa Ruhanga nibwija kureetera abantu boona omu nsi kuramya Ruhanga omwe ow’amazima Yehovac, “Ruhanga ow’okukunda n’obusingye.” (2 Abakorinso 13:11) Nibaija kwega kutuura hamwe omu busingye. (Isaaya 2:​3, 4; 11:9) Abaraayorobe nibaija kujunwa kuruga omu kibi n’obutahikiirira.—Abarooma 8:​20, 21.

RUHANGA NAIJA KWIHAHO SITAANE NA BAADAIMONI

Obukama bwa Ruhanga nibwija kwihaho Sitaane na baadaimoni abaatandikireho entaro. (Okushuuruurwa 20:​1-3, 10) Ku baraacwekyerezibwe nihaija kubaho “obusingye bwingi.”—Zaaburi 72:7.

Noobaasa kugira obuhame ngu ekiraganiso kya Ruhanga eky’okumaraho entaro n’obutabanguko nikiija kuhikiirira, ahabw’okuba aine amaani n’ekihika ky’okumaraho entaro.

• Ruhanga aine obwengye n’amaani g’okumaraho entaro n’obushaarizi. (Yobu 9:4) Tihaine ekirikubaasa kumuremesa kuhikiiriza eki arikwenda.—Yobu 42:2.

• Ruhanga naayangira kimwe kureeba abantu barikubonabona. (Isaaya 63:9) Kandi ‘abakunda endwano omutima gwe nigubanga.’—Zaaburi 11:5.

• Ruhanga ku arikugamba ekintu naakihamiraho, tarikubaasa kubeiha.—Isaaya 55:​10, 11; Tito 1:2.