Ahabw’enki Tushemereire Kusherura Obuhabuzi?

1. Niki ekirikubaasa kutuhwera kucwamu gye kandi tukahikiiriza ebi turikuba tucwiremu? (Enfumu 13:10; 15:22)

TWENA nituba nitwenda ngu tucwemu gye, kandi n’ebi turikucwamu nitwenda birugemu ebirungi. Ekigambo kya Ruhanga nikyoreka ngu kubaasa kuhikiiriza ekyo, twine kusherura obuhabuzi.—Shoma Enfumu 13:10; 15:22.

2. Yehova naaraganisa kutukorera ki?

² Amazima gari ngu, Tataitwe Yehova niwe ahikire kutuha obwengye n’obuhabuzi oburikukirayo. Naaraganisa kutuhwera arikugira ati: ‘Ninyija kukuha obwengye, nkutaireho eriisho.’ (Zab. 32:8) Ebigambo ebyo nibyoreka ngu Yehova naatuha obuhabuzi oburikuhikaana n’embeera zaitu kandi atuhwera kubuta omu nkora.

3. Nituza kushwijuma ki omu kicweka eki?

³ Omu kicweka eki, nituza kukoresa Baibuli kugarukamu ebibuuzo bina ebi: (1) Nshemereire kugira mitwarize ki kubaasa kugasirwa omu buhabuzi burungi? (2) N’oha orikubaasa kumpa obuhabuzi? (3) Nimbaasa kworeka nta ngu nyeteekateekire kwikiriza obuhabuzi? (4) Ahabw’enki ntashemereire kushaba abandi kuncweramu eky’okukora?

NSHEMEREIRE KUGIRA MITWARIZE KI?

4. Tushemereire kugira mitwarize ki kubaasa kugasirwa omu buhabuzi burungi?

⁴ Kubaasa kugasirwa omu buhabuzi burungi, twine kuba abacureezi kandi tukagira emiteekateekyere eringaniire. Twine kwikiriza ngu obumwe nitwetenga obuhwezi bw’abandi kubaasa kuguma nitucwamu gye ahakuba titurikumanya buri kimwe. Twaba twine amaryo, Yehova tarikubaasa kutuhwera, kandi obuhabuzi obu turikutunga omu Kigambo kye nibubaasa kuturabaho nk’amaizi agarikuraba aha ibaare. (Mik. 6:8; 1 Pet. 5:5) Kwonka twaba abacureezi, nituza kurahuka kwikiriza obuhabuzi bwa Baibuli obuturikuhurira kandi butugatsire.

5. Niki ekyabaire nikibaasa kureetera Omugabe Daudi kwetunguura?

⁵ Teekateeka aha ki turikubaasa kwegyera aha Mugabe Daudi. Ebi yaakozire bikaba nibibaasa kumureetera kwetunguura. Obu yaabaire atakabaire omugabe, akaba naamanywa nk’oine etalanta y’okuteera enanga. Kandi akashabwa kuza kugiteerera omugabe. (1 Sam. 16:​18, 19) Yehova ku yaamushukireho amajuta kuba Omugabe, akamuha amaani g’Omwoyo Ogurikwera. (1 Sam. 16:​11-13) Akaba naamanywa munonga omuri Israeli ahabw’okwita abazigu baabo otwariiremu n’Omufilistia ekikaaka Goliasi. (1 Sam. 17:​37, 50; 18:7) Kuri noogira ngu Daudi akaba aine omwetunguuro ahabw’ebi yaabaire naabaasa kukora, akaba naija kuteekateeka ngu taine kuhurikiza obuhabuzi obu abandi baabaire nibamuha.

6. Niki ekirikworeka ngu Daudi akaba naikiriza obuhabuzi? (Reeba n’ekishushani.)

⁶ Daudi ku yaaherize kuba Omugabe, akaguma naakwatanisa n’abashaija abaamuhaire obuhabuzi. (1 Bus. 27:​32-34) Kwonka ekyo tikirikutangaaza ahabw’okuba Daudi akaba naamanywa nk’omushaija orikuhurikiriza obuhabuzi burungi kandi akabwikiriza. Akaba atarikwikiriza obuhabuzi obwamuhairwe abashaija bonka, kureka akaikiriza n’obw’omukazi owaabaire naayetwa Abigaili. Omukazi ogwo akaba ari muka Nabali omushaija owaabaire atarikuha abandi ekitiinisa, entasiima kandi omunyamaryo. Kwonka Daudi we akaba omucureezi, yaakuratira obuhabuzi obu Abigaili yaamuhaire. N’ekyarugiremu, akeetantara kukora enshobe y’amaani.—1 Sam. 25:​2, 3, 21-25, 32-34.

7. Ni mashomo ki agu turikubaasa kwegyera aha ky’okureeberaho kya Daudi? (Omubuurizi 4:13) (Reeba n’ebishushani.)

⁷ Nitubaasa kwegyera ahari Daudi amashomo mingi. Nk’eky’okureeberaho, nitubaasa kuba twine etalanta z’omutaano nari twine obushoboorozi aha bandi. Nka Daudi, titushemereire kuteekateeka ngu nitumanya buri kimwe kandi ngu titurikwetenga obuhabuzi. Kureka, tushemereire kuba tweteekateekire kuhurikiriza kandi tukaikiriza obuhabuzi kuruga aha bantu b’emiringo yoona. (Shoma Omubuurizi 4:13.) Twakora ekyo, nitwija kwetantara kukora enshobe z’amaani ezirikubaasa kuturugiramu obusaasi oburikukwata n’aha bandi.

N’OHA ORIKUBAASA KUMPA OBUHABUZI?

8. Ahabw’enki Yonasaani niwe yaabaire ahikire kuha Daudi obuhabuzi?

⁸ Teekateeka aha ishomo erindi eri turikubaasa kwegyera aha ky’okureeberaho kya Daudi. Akakuratira obuhabuzi obw’abantu abaabaire baine omukago murungi na Yehova kandi abaabaire nibeetegyereza gye oburemeezi obu yaabaire naarabamu. Nk’eky’okureeberaho, obu yaabaire naayenda kumanya yaaba naabaasa kugaruka kugira omukago n’Omugabe Saulo, akagyendera aha buhabuzi obu Yonasaani mutabani wa Saulo yaamuhaire. Ahabw’enki Yonasaani yaabaire naabaasa kuha Daudi obuhabuzi burungi? N’ahabw’okugira ngu akaba aine omukago murungi na Yehova, kandi arikumanya gye Saulo. (1 Sam. 20:​9-13) Ekyo nitubaasa kukyegyeraho ki?

9. Nitubaasa kwebuuza ahari oha twaba nitwenda obuhabuzi? Shoboorora. (Enfumu 13:20)

⁹ Twaba nitwenda obuhabuzi, tushemereire kwebuuza aha muntu oine omukago murungi na Yehova kandi orikwetegyereza gye enshonga ahabw’enki nitwenda obuhabuzi.a (Shoma Enfumu 13:20.) Nk’eky’okureeberaho, ka tugire ngu ow’eishe-emwe omuto naayenda kuronda ow’okutaaha nawe omu bushwere. N’oha orikubaasa kumuha obuhabuzi burungi? Munywani we otari mu bushwere naabaasa kumuhwera yaamuha obuhabuzi oburikwegamira aha misingye ya Baibuli. Kwonka ow’eishe-emwe omuto, naija kutunga obuhabuzi oburikuhikaana n’embeera ye, kandi oburikukora gye yaabuuza omushaija n’omukazi we abakuzire omu by’omwoyo, abarikumumanya gye, kandi abatwire omu bushwere kumara akaire bashemereirwe.

10. Nituza kushwijuma ki hati?

¹⁰ Twayetegyereza emitwarize ebiri ei twine kugira kandi twareeba n’oha orikubaasa kutuha obuhabuzi burungi. Hati ka tushwijume ahabw’enki twine kworeka ngu nitwetenga obuhabuzi, nari twaba tushemereire kushaba abandi kutucweramu.

NIMBAASA KWOREKA NTA NGU NYETEEKATEEKIRE KWIKIRIZA OBUHABUZI?

11-12. (a) Tushemereire kwetantara ki obumwe? (b) Omugabe Rehoboamu akakora ki obu yaabaire aine enshonga nkuru y’okucwamu?

¹¹ Obumwe, omuntu naayeshushaniriza nk’orikusherura obuhabuzi kandi obwo yaaherize kucwamu eki arikwenda. Naayebuuza aha bandi arikwenda ngu bashagike eki yaaherize kucwamu. Omuntu nk’ogwo buzima naaba ataine emiteekateekyere mirungi. Ashemereire kwegyera aha kyahikire aha Mugabe Rehoboamu.

¹² Rehoboamu akahunguririra Omugabe Sulemaani nk’omugabe wa Israeli. Akahungurira eihanga eryabaire riri erigaiga kwonka abantu bakaba nibateekateeka ngu Sulemaani akaba atwire naabashaba ebintu bingi. Bakaija ahari Rehoboamu baamweshengereza kutuubya aha bintu ebyo. Rehoboamu akabashaba kumuha akaire ngu abaase kuteekateeka aha ki araacwemu. Akatandika gye arikwebuuza aha bagurusi abaabaire bahwera Sulemaani. (1 Bag. 12:​2-7) Kwonka akanga obuhabuzi obu baamuhaire. Ahabw’enki yaabwangire? Mbwenu shi Rehoboamu akaba yaacwiremu eki yaabaire naayenda kukora, reero yaabona kwebuuza aha bagurusi kugira ngu bamushagike? Ku kiraabe nikwo kiri, akatunga obushagiki obwo omu buhabuzi obu banywani be abato baamuhaire. (1 Bag. 12:​8-14) Akagarukamu abantu arikwihirira aha buhabuzi obu orwingano rwe baamuhaire. N’ekyarugiremu, eihanga rikeebaganisamu, kandi kuruga obwo Rehoboamu akaguma naabugana oburemeezi bwingi.—1 Bag. 12:​16-19.

13. Nitubaasa kumanya tuta yaaba tweteekateekire kwikiriza obuhabuzi?

¹³ Nitubaasa kwegyera ki aha ky’okureeberaho kya Rehoboamu? Twaba nitusherura obuhabuzi, twine kugira emiteekateekyere mirungi kandi etarikugwera rubaju. Ekyo nitubaasa kukimanya tuta? Nitubaasa kwebuuza tuti, ‘Ninshaba obuhabuzi reero nyanga kubwikiriza ahonaaho ahabw’okugira tibwo naaba niinyenda kuhurira?’ Teekateeka aha ky’okureeberaho eki.

14. Twine kuguma nitwijuka ki twaheebwa obuhabuzi? Ha eky’okureeberaho. (Reeba n’ekishushani.)

¹⁴ Ka tugire ngu ow’eishe-emwe yaatunga omurimo murungi. Kwonka atakagwikiriize, abanza ashaba omureeberezi obuhabuzi aha nshonga egyo. Agambira omureeberezi ngu omurimo ogwo nigubaasa kumwetengyesa kutsigaho eka ye kumara obwire buraingwa. Omureeberezi aijutsya ow’eishe-emwe ogwo emisingye ya Baibuli ngu obujunaanizibwa bwe obukuru n’okureeberera eka ye omu by’omwoyo. (Efe. 6:4; 1 Tim. 5:8) Mbwenu shi ow’eishe-emwe ogwo ku yaakuba atakunzire obuhabuzi obu omureeberezi yaamuha, reero akabuuza ab’eishe-emwe abandi aha nshonga niyo emwe kuhika obu araagambirwe ebi arikwenda kuhurira, buzima ow’eishe-emwe ogwo naaba naasherura obuhabuzi? Nari naaba yaaherize kucwamu, reero arikuronda ab’okwikirizana nawe? Twine kwijuka ngu omutima gwaitu n’engobya. (Yer. 17:9) Obumwe, obuhabuzi obu turikwetenga munonga nitubaasa kutabukunda.

NSHEMEREIRE KUSHABA ABANDI KUNCWERAMU EKY’OKUKORA?

15. Tushemerere kwetantara kukora ki kandi ahabw’enki?

¹⁵ Buri omwe ahariitwe aine obujunaanizibwa bw’okwecweramu. (Gal. 6:​4, 5) Nk’oku twareeba, omuntu ow’obwengye naasherura obuhabuzi omu kigambo kya Ruhanga n’omu Bakristaayo abakuzire omu by’omwoyo atakagizire eki yaacwamu. Kwonka, titwine kushaba abandi kutucweramu. Ekyo abamwe nibakikora butunu barikubuuza ou barikuha ekitiinisa bati: “Okaacwiremu ki ku waakuba ori omu mbeera nk’eyangye?” Abandi nibabaasa kutabuuza butunu kandi bacwemu kutooreza ebi abandi bacwiremu batabandize kubiteekateekaho.

16. Ni mbeera ki eyaabaireho omu kibiina kya Korinso, kandi buri omwe akaba aine bujunaanizibwa ki? (1 Abakorinso 8:7; 10:​25, 26)

¹⁶ Teekateeka aha kyabaireho omu kibiina ky’omu kyasha ky’okubanza omuri Korinso. Bakaba baine kucwamu aha nshonga erikukwata aha kurya enyama eyaabaire ehongiirwe ebishushani. Paulo akahandiikira Abakristaayo abo arikugira ati: “Nitumanya ngu ekishushani kyona omu nsi ni busha, kandi ngu tihariho Ruhanga ondiijo, kureka omwe wenka.” (1 Kor. 8:4) Ahabw’ebigambo ebyo, bamwe omu kibiina bakacwamu ngu nibabaasa kurya enyama erikugurwa omu katare n’obu yaakuba ebaire ehongiirwe ebishushani. Kwonka abandi bakacwamu kutarya enyama egyo ahabw’okuba kikaba nikiija kubareetera kweshinja. (Shoma 1 Abakorinso 8:7; 10:​25, 26.) Buri omwe akaba aine kwecweramu aha nshonga egyo. Paulo tarahigire Abakristaayo kucweramu abandi nari kumara agakuratira ebi abandi bacwiremu. Buri muntu “naayetonganira ahari Ruhanga.”—Rom. 14:​10-12.

17. Niki ekirikubaasa kubaho twamara agatooreza ebi abandi bacwiremu? Ha eky’okureeberaho. (Reeba n’ebishushani.)

¹⁷ Enshonga nk’egyo neebaasa kubaho eta obunaku obu? Teekateeka aha nshonga y’obucweka bw’eshagama. Buri Mukristaayo aine kucwamu yaaba araikirize obucweka obwo nari akabwanga.b Nikibaasa kutugumira kwetegyereza gye enshonga egi, kwonka n’emwe aha nshonga ezi buri omwe ahariitwe aine kwecweramu. (Rom. 14:4) Twacwamu kutooreza ebi omuntu ondiijo acwiremu, nitubaasa kumara amaani omuntu waitu ow’omunda. Nitutendeka omuntu waitu ow’omunda turikumukoresa kutuhwera omu kucwamu. (Heb. 5:14) Mbwenu shi ni ryari obu tushemereire kushaba obuhabuzi Omukristaayo okuzire omu by’omwoyo? Ekyo nitubaasa kukikora twakora okucondooza kwonka tukaremwa kwetegyereza oku emisingye ya Baibuli erikukwata aha mbeera yaitu.

GUMIZAMU NOOSHERURA OBUHABUZI

18. Yehova atukoreire ki?

¹⁸ Yehova ayorekire ngu atwinemu obwesigye arikutwikiriza kwecweramu. Atuhaire Ekigambo kye Baibuli, n’abanywani abarikubaasa kutuhwera kwetegyereza oku turikubaasa kuta omu nkora emisingye ya Baibuli. Ahikiriize obujunaanizibwa bwe nka Tataitwe orikutukunda. (Enf. 3:​21-23) Nitubaasa kworeka tuta ngu nitusiima obuhwezi obu atuhaire?

19. Niki eki twine kukora kubaasa kugumizamu nitushemeza Yehova?

¹⁹ Teekateeka aha mazima aga: Abazaire nibashemererwa kureeba abaana baabo barikukura kandi bakagira okubaasa kw’okuteekateeka, bakaba abaheereza ba Yehova ab’obwengye, kandi abarikuhwera abandi. Nikyo kimwe, Yehova naashemererwa yaareeba nitugumizamu kukura omu by’omwoyo, turikushaba obuhabuzi kandi tukacwamu omu miringo erikumuhaisa ekitiinisa.