Oku Turikubaasa Kuha Abandi Obuhabuzi

1. N’oha oshemereire kuha abandi obuhabuzi? Shoboorora.

NOOYEHURIRA ota aha bikwatiraine n’okuha abandi obuhabuzi? Abamwe nikiboorobera kubuha. Abandi nibeeziringa kuha obuhabuzi nari nibeehurira kubi baaba nibakikora. Kwonka nabwo, twena obumwe n’obumwe nikibaasa kutwetengyesa kuha abandi obuhabuzi. Ahabw’enki? Ahakuba Yesu akagira ngu abakuratsi be abaabuzima bakaba nibaija kumanyirwa ahari rukundo ei barikugirirana. (Yoh. 13:35) Kandi omuringo gumwe oku turikubaasa kworeka rukundo egyo n’okuha ab’eishe-emwe na banyaanyazi-itwe obuhabuzi kyayetengyesa. Baibuli neeyoreka ngu twaha abandi obuhabuzi twihire aha mutima, nitwongyera kuhamya omukago gwaitu nabo.—Enf. 27:9.

2. Abareeberezi bashemereire kukora ki kandi ahabw’enki? (Reeba n’akabokusi “Obuhabuzi obw’omu Ruteerane rw’Ahagati ya Saabiiti.”)

² Okukira munonga abareeberezi bashemereire kuba nibamanya kuha abandi obuhabuzi burungi. Yehova akaha Yesu obujunaanizibwa bw’okutoorana abashaija abo kureeberera ekibiina. (1 Pet. 5:​2, 3) Ekyo nibakikora barikutuha obuhabuzi burungi kurabira omu mbazo ezi barikuha omu nteerane barikwegamira ahari Baibuli. Kandi nabwo nibaha buri omwe ahariitwe obuhabuzi otwariiremu nabo abahabire bakaruga omu kibiina. Mbwenu shi abareeberezi n’abandi omu kibiina nitubaasa kuha tuta obuhabuzi burungi?

3. (a) Niki ekirikubaasa kutuhwera kuha abandi obuhabuzi burungi? (Isaaya 9:6; reeba n’akabokusi “Tooreza Yesu Waaba Nooha Obuhabuzi.”) (b) Nituza kushwijuma ki omu kicweka eki?

³ Nitubaasa kwegyera bingi ahari Yesu n’abandi abarikugambwaho omu Baibuli aha bikwatiraine n’okuha obuhabuzi burungi. Kimwe aha bitiinisa ebi Yesu aine, naayetwa “Omuhanuuzi Orikutangaaza.” (Shoma Isaaya 9:6.) Omu kicweka eki, nituza kushwijuma eki twine kukora omuntu yaatushaba obuhabuzi, n’oku turikubaasa kuha abandi obuhabuzi baaba batabutushabire. Kandi nituza n’okureeba ahabw’enki ni kikuru kuha obuhabuzi omu bwire obuhikire kandi omu muringo murungi.

OMUNTU YAATUSHABA OBUHABUZI

4-5. Niki eki twine kubanza kwebuuza, omuntu yaatushaba obuhabuzi? Ha eky’okureeberaho.

⁴ Twine kubanza kukora ki omuntu yaatushaba obuhabuzi? Nikibaasa kutushemeza reero twende kumuhwera ahonaaho. Kwonka twine kubanza kwebuuza tuti, ‘Buzima niinye mpikire kumuha obuhabuzi aha nshonga egi?’ Obumwe, omuringo murungi gw’okuhwera omuntu ogwo ti kumuha obuhabuzi, kureka n’okumugambira ondiijo ohikire kumuhabura gye aha nshonga egyo.

⁵ Teekateeka aha ky’okureeberaho eki. Ka tugire ngu munywani waawe yaagira endwara y’amaani. Akugira ngu atandikire kucondooza aha miringo etari emwe ey’okutungamu obujanjabi, kandi akubuuza eki orikuteekateeka aha bikwatiraine n’obujanjabi oburikukora gye. Noobaasa kuba oine obujanjabi obu orikukunda, kwonka torashomire by’obushaho kandi tihaine eki orikumanya aha ndwara egyo. Omu mbeera nk’egyo, nikiba kiri eky’obwengye kuhwera munywani waawe ogwo kutunga omuntu otendekirwe omu by’obujanjabi.

6. Ahabw’enki obumwe tutaine kurahukiiriza kuha omuntu obuhabuzi?

⁶ N’obu twakuba nitureeba ngu tuhikire kuhabura omuntu aha nshonga, nitubaasa kutegyereza kumara akaire tutakamugarukiremu. Ahabw’enki? Enfumu 15:28 nihagira ngu “omutima gw’ohikiriire guteekateeka oku araagarukyemu.” Mbwenu shi ku twakuba nituteekateeka ngu nitumanya ekihikire? Nabwo nikiba kiri kirungi kubanza kucondooza, kushaba, kandi tukateekateeka tutakamugarukiremu. Ekyo nikituhwera kwongyera kugira obwesigye ngu obuhabuzi bwaitu nibuhikaana n’emiteekateekyere ya Yehova aha nshonga egyo. Teekateeka aha ky’okureeberaho kya nabi Nasani.

7. Nooyegyera ki ahari nabi Nasani?

⁷ Obu Omugabe Daudi yaabaire naagaaniira na nabi Nasani, akamugira ngu akaba naayenda kwombekyera Yehova hekalu. Nasani akamuhiga kugyenda omu maisho n’entebeekanisa egyo. Kwonka Nasani akaba aine kubanza kwehanuuza ahari Yehova. Ahabw’enki? Ahakuba Yehova akaba atarikwenda Daudi ayombeke hekalu. (1 Bus. 17:​1-4) Eki nikitwegyesa ngu, omuntu yaatushaba obuhabuzi ti ky’obwengye ‘kurahukiiriza kugamba.’—Yak. 1:19.

8. Ahabw’enki twine kwegyendesereza tutakahaire omuntu obuhabuzi?

⁸ Yetegyereze enshonga endiijo ahabw’enki twine kwegyendesereza twaba nituha omuntu obuhabuzi: Nitubaasa kujunaanwa twamuha obuhabuzi oburikumureetera kuhikwaho ebintu bibi. Buzima, twine enshonga ehikire kwegyendesereza, tutakahaire omuntu obuhabuzi.

OKUHA OBUHABUZI N’OBU BAKUBA BATABUTUSHABIRE

9. Abareeberezi baine kukora ki batakahaire omuntu obuhabuzi? (Abagalatia 6:1)

⁹ Obwire obwingi, abareeberezi baine kuteera orutambwe rw’okubanza bakaha obuhabuzi ow’eishe-emwe nari munyaanyazi-itwe ‘ogwire omu kibi.’ (Shoma Abagalatia 6:1.) Nibaha omuntu obuhabuzi baareeba ariyo naacwamu ebirikubaasa kumurugiramu okukora ekibi ky’amaani. Ekigyendererwa kyabo n’okuhwera omuntu ogwo kuguma omu muhanda ogurikuhitsya omu magara agatahwaho. (Yak. 5:​19, 20) Kwonka, obuhabuzi bwabo kubaasa kukora gye, baine kubanza kuhamya ngu omuntu ogwo acwiremu kubi. Yehova naatwikiriza kwecweramu turikwihirira aha muntu waitu w’omunda. (Rom. 14:​1-4) Kwonka shi, ow’eishe-emwe ku yaakuba acwiremu kubi kandi abareeberezi bakareeba nikyetengyesa kugira eki baakora kumuhana?

10-12. Abareeberezi baine kukora ki baaba nibaha omuntu obuhabuzi obu atabashabire? Ha eky’okureeberaho. (Reeba n’ebishushani.)

¹⁰ Butoosha tikirikworobera abareeberezi kuha omuntu obuhabuzi atakabushabire. Ahabw’enki? Entumwa Paulo akooreka ngu omuntu naabaasa kuba ariyo naatoora omuhanda ogutahikire atarikukimanya. N’ahabw’ekyo, abareeberezi kubaasa kuhabura omuntu ogwo, baine kubanza kutebeekanisa omutima gwe kwakiira obuhabuzi.

¹¹ Okuha omuntu obuhabuzi obu atashabire nikibaasa kugyeragyeranisibwa n’okuteeraho kubyara embibo omu itaka rigumire. Omuhingi aine kubanza yaaribanjura kugira ngu ribaase kworoba. Bwanyima naabyara embibo kandi aguma naazitirira amaizi kugira ngu zikure gye. Nikyo kimwe, omureeberezi atakahaire omuntu obuhabuzi obutashabirwe naaba aine kubanza yaatebeekanisa omutima gw’omuntu ogwo. Nk’eky’okureeberaho, omureeberezi naasherura obwire burungi bw’okugamba n’ow’eishe-emwe, kandi ayoreka ngu naamufaho atakamuhaire obuhabuzi. Omureeberezi yaaba naamanywa nk’orikuha obuhabuzi omu muringo gwa rukundo kandi ogw’embabazi, nikiija kworobera abandi kuhurikiza obuhabuzi obu arikubaha.

¹² Omureeberezi yaaba naagaaniira n’omuntu ou arikwenda kuha obuhabuzi naabaasa kugumizamu kworobya omutima gwe arikumwijutsya ngu obumwe twena nitukora enshobe. (Rom. 3:23) Omu iraka ry’embabazi kandi omu muringo gw’ekitiinisa naakoresa Ebyahandiikirwe kumworeka oku akozire enshobe. Ow’eishe-emwe yaaheza kwetegyereza enshobe ye, omureeberezi “naabyara embibo” arikumushoboororera eki aine kukora kutereeza enshobe ye. Bwanyima omureeberezi, “naashukyeera” embibo arikumusiima kandi akashaba nawe.—Yak. 5:15.

13. Abareeberezi nibabaasa kukora ki kuhamya ngu omuntu yaayetegyereza gye obuhabuzi?

¹³ Obumwe, omuntu naabaasa kuteetegyereza gye obuhabuzi. Abareeberezi nibabaasa kukora ki kumuhwera kwetegyereza obuhabuzi? Nibabaasa kukikora barikumubuuza ebibuuzo omu muringo gw’obwengye. (Mub. 12:11) Ekyo nikiija kubahwera kumanya yaaba omuntu yaayetegyereza obuhabuzi obwamuheebwa.

OKUHA OBUHABUZI OMU BWIRE BUHIKIRE KANDI OMU MURINGO MURUNGI

14. Ahabw’enki tutaine kuha abandi obuhabuzi twine ekiniga? Shoboorora.

¹⁴ Ahabw’okugira ngu twena tituhikiriire, eshaaha yoona nitubaasa kugamba nari tukore ekintu ekirikugwisa kubi abandi. (Kol. 3:13) Ekigambo kya Ruhanga nikyoreka ngu obumwe nitubaasa kureetera bagyenzi baitu kugira ekiniga. (Efe. 4:26) Kwonka twine kwangira omuze gw’okuha abandi obuhabuzi twaba twine ekiniga. Ahabw’enki? Ahakuba “ekiniga ky’omuntu tikikora by’okuhikiirira kwa Ruhanga.” (Yak. 1:20) Twaha obuhabuzi abandi twine ekiniga, nitubaasa kureetera embeera kwongyera kusiisikara. Ekyo tikirikumanyisa ngu tutakaayoreka omuntu otugwisize kubi oku turikwehurira. Kureka, nitubaasa kugamba nawe omu muringo murungi twategyereza tukabanza twikaikana. Yetegyereze eky’okureeberaho kirungi eki Elihu yaataireho obu yaaha Yobu obuhabuzi.

15. Elihu nitumwegyeraho ki? (Reeba n’ekishushani.)

¹⁵ Elihu akamara ebiro bingi ahurikiize Yobu arikwehozaho ahabw’ebishuba ebi banywani be ab’ebishobobo baamugambireho. Elihu akamusaasibwa, kwonka nabwo akaguubwa kubi ahakuba Yobu akajwekyera kubi Yehova arikwetaho munonga omutima. Kwonka nabwo Elihu akategyereza obwire bwe obw’okugamba kandi yaahana Yobu omu muringo gw’obucureezi kandi ogw’ekitiinisa. (Yob. 32:2; 33:​1-7) Eky’okureeberaho kye nikitwegyesa amazima makuru: Ni kirungi kuha omuntu obuhabuzi omu bwire obuhikire, omu muringo murungi ogw’ekitiinisa kandi ogwa rukundo.—Mub. 3:​1, 7.

GUMIZAMU NOOHABURA ABANDI KANDI NIWE OIKIRIZE KUHABURWA

16. Nooyega ki omuri Zaaburi 32:8?

¹⁶ Ekyahandiikirwe kikuru ky’ekicweka eki nikyoreka ngu ‘Yehova naatuhabura, atutaireho eriisho.’ (Shoma Zaaburi 32:8.) Eki nikimanyisa ngu Yehova naagumizamu naatushagika bwanyima y’okutuhabura arikutuhwera kugyendera aha buhabuzi. Ekyo buzima ka n’eky’okureeberaho kirungi ahariitwe! Twatunga omugisha gw’okuha abandi obuhabuzi, nitubaasa kutooreza Yehova turikubataho eriisho kandi tukagumizamu nitubaha obuhwezi oburikwetengyesa kubaasa kusingura.

17. Abareeberezi abarikutuha obuhabuzi obuhikire kandi oburikwegamira ha misingye ya Baibuli, nibagyeragyeranisibwa na ki? Shoboorora. (Isaaya 32:​1, 2)

¹⁷ Omu bwire obu, nikyetengyesa kuha abandi obuhabuzi burungi kandi naitwe tukabutunga. (2 Tim. 3:1) Abareeberezi abarikuha obuhabuzi oburikwegamira ahari Baibuli bari “nk’emigyera y’amaizi aha itaka ryomire.” (Shoma Isaaya 32:​1, 2.) Abanywani abatarikweziringa kutuha obuhabuzi oburikwetengyesa n’ab’omuhendo. Ebigambo byabo biri “nk’amapeera g’ezaabu agari omu kiibo ky’efeeza.” (Enf. 25:11) Twena ka tugumizemu nitwega kuha abandi obuhabuzi burungi, kandi naitwe twikirize kuhaburwa.