Omwijuro gw’Empungi Ahabw’abantu Nyamwingi Kuhunga Ukraine

Russia ekatandika kutaahirira Ukraine omu Kwakabiri 24, 2022, ekireeteire amagara g’abantu nyamwingi kuza omu kabi, bakahunga omuhondano ogu.a

“Tukaba nituhurira bomu n’ebirikubaruka. Bikaba nibitiinisa, kigumire n’okubishoboorora omu bigambo. Ku twamanyire ngu hariho egaari z’omwika ezirikuhunzya abantu, tukacwamu kurugayo. Buri omuntu akaba aine kupakira ebintu bye omu kashaho kamwe kakye konka. Tukaba nitubaasa kutwara ebihandiiko ebirikutumanyisa, emibazi, amaizi, n’otw’okurya tw’ahonaaho. Tukatsigaho ebindi byona twaza aha gaari y’omwika obwo bomu zirikubaruka.”—Nataliia, kuruga Kharkiv, Ukraine.

“Kuhitsya aha shaaha y’aha muheru, tukaba twine amatsiko ngu tiharikwija kubaho orutaro. Nkaba nimpurira ebirikubaruka omu bicweka ebindi eby’orurembo, kwonka amadirisa garikutengyeta. Nkacwamu kurugayo obwo nyine ebintu ebirikwetengyesa byonka. Nkarugayo shaaha ibiri z’akasheeshe, naaza omu gaari y’omwika erikuza Lviv, reero naakwata baasi erikuza Poland.”—Nadija, kuruga Kharkiv, Ukraine.

Omu kicweka eki

• Niki kyenyini ekirikureetaho omwijuro gw’empungi ogu?

• Empungi nibabaasa kwiha nkahi amatsiko?

• Baibuli shi neebaasa kuhwera empungi obunaku obu?

Niki kyenyini ekirikureetaho omwijuro gw’empungi ogu?

Omwijuro gw’empungi ezirikuruga omuri Ukraine gukatandikaho ahabw’okutaahirira kwa Russia. Kwonka, Baibuli neeyoreka ekirikukira ahari eki ekirikureetaho omwijuro gw’empungi nk’ogu:

• Gavumenti z’abantu omu nsi yoona ziremirwe kuhwera abantu. Abari omu butegyeki nibakira kukoresa obushoboorozi bwa gavumenti kutuuntuza abantu.—Omubuurizi 4:1; 8:9.

• Sitaane Omuregi, “omutegyeki w’ensi egi,” niwe arikureetera abantu kutwaza bati, ahakuba Baibuli neegira ngu, ‘ensi yoona eri omu butegyeki bw’omubi.’—Yohaana 14:30; 1 Yohaana 5:19.

• Oyihireho oburemeezi obutwire nibuteganisa abantu kumara ebyasha, hati turi omu bwire obu Baibuli erikweta, ‘ebiro by’emperu’ ebigumire kwemera. (2 Timoseo 3:1) Kandi, ebiro ebi biine kubamu entaro, ebigwererezi, eibura ry’eby’okurya, n’endwara nyamwita, kandi ebi byona nibireetera abantu kuhunga.—Luka 21:10, 11.

Empungi nibabaasa kwiha nkahi amatsiko?

Baibuli neeyoreka ngu Omuhangi waitu Yehova,b ni Ruhanga oiniire empungi n’abandi abahungire omu maka gaabo rukundo, n’esaasi. (Eky’Ebiragiro 10:18) Naaraganisa kugonjoora enshonga z’empungi arikukoresa gavumenti ye ey’omu iguru, erikwetwa Obukama bwa Ruhanga, erikwija kuza omu mwanya gwa gavumenti z’abantu. (Danieli 2:44; Matayo 6:10) Yehova naija kukoresa Obukama bwe kwihaho Sitaane Omuregi. (Abarooma 16:20) Obukama obwo nibwija kutegyeka ensi yoona, bwiheho ensharo ezirikubaganisamu amahanga. Abantu boona nibaija kweteeranira omu ka emwe ey’ensi yoona. Tihaine orikwija kugaruka kuhunga omu ka ye, ahakuba Baibuli neeraganisa eti: ‘Buri muntu naija kushutama ahansi y’omuzaabibu gwe n’ahansi y’omutiini gwe, kandi tihaine orikwija kubakangisa, ahabw’okuba akanwa ka [Yehova] niko kaakigamba.’—Miika 4:4.

Obukama bwa Ruhanga bwonka nibwo burikubaasa kugonjoora oburemeezi bw’empungi oburiho hati. Yehova naija kukoresa Obukama bwe kwihaho oburemeezi oburikugyemesereza abantu kuba empungi. Teekateeka aha by’okureeberaho ebimwe ebi:

• Entaro. ‘[Yehova] naamaraho engamba okuhika aha muheru gw’ensi.’ (Zaaburi 46:9) Kubaasa kumanya oku Ruhanga araiheho obutaikirizana, shoma ekicweka, “Obusingye omu Nsi Nibwija Kubaho Buta?”

• Okutuuntuzibwa n’Obushaarizi. ‘[Yehova] naija kucungura amagara gaabo, agaihe omu kubonabonesibwa n’omu mwaga.’ (Zaaburi 72:14) Kubaasa kwetegyereza oku abantu barikubaasa kuhindura emiteekateekyere ei bakuzire nayo, shoma ebicweka bikurataine, “Okuzibira Rwango Kugumizamu.”

• Obworo. ‘[Yehova naija kujuna] omukyene, ku araamutakire, n’omworo otaine kihwera.’ (Zaaburi 72:12) Kubaasa kureeba oku Ruhanga arikwija kwihaho ebirikureeta obworo, shoma ekicweka, “Nihabaasa Kubaho Entaatsya Eringaniire?”

• Eibura ry’eby’okurya. ‘Nihaija kubaho omweru mwingi omu nsi.’ (Zaaburi 72:16) Kubaasa kumanya oku Ruhanga araahamye ngu tihaine owaaburwa eby’okurya, shoma ekicweka, “Ensi Etarimu Njara?”

Baibuli shi neebaasa kuhwera empungi obunaku obu?

Eego. Oyihireho Baibuli okuha empungi amatsiko, neebaasa n’okubahwera kusingura embeera zigumire ezi barikurabamu hati.

Omusingye gwa Baibuli: ‘Muteemereza omutima aha kintu kyona, kureka omuri byona mumanyise Ruhanga [byona] omu kushaba n’okweshengyereza, kandi musiime. Kandi obusingye bwa Ruhanga oburengire okwetegyereza kw’omuntu weena, nibwija kuguma burinde emitima yaanyu n’obwengye bwanyu.’—Abafilipi 4:6, 7.

Amakuru: Shaba Ruhanga kukuha obusingye bw’omu biteekateeko n’omu mutima omu mbeera yoona ei oraayeshangyemu. Reeba ekicweka, “Abafilipi 4:6, 7—‘Oteerarikirira aha Kintu Kyona.’”