Abajurizi ba Yehova shi Nibacwa Abaabaire Bari omu Diini Yaabo?

Abo abaabaire bari Abajurizi ba Yehova ababatiziibwe kwonka abatakibuurira, kuhika n’aha kurekyera aho kukwatanisa n’ab’eishe-emwe abandi, tibarikucuubwa. Nangwa, nituteeraho kubahikaho kugaruka kubakundisa amazima.

Abajurizi ba Yehova tibarikuhika nibabinga omuntu weena orikukora ekibi ky’amaani. Kwonka, Omujurizi wa Yehova obatiziibwe yaaguhindura omuze okuguma naahenda emitindo ya Baibuli ey’emicwe, kandi akanga kweteisa, naacuubwa nari naabingwa. Baibuli neegamba butunu eti: “Mwihe omuriimwe omuntu ogwo omubi.”​—1 Abakorinso 5:13.

Kandi shi omushaija ku yaakubingwa kwonka omukazi we n’abaana be bakaguma bari Abajurizi ba Yehova? Enkoragana ye nabo omu by’omwoyo neehinduka, naaguma aine nabo obuzaare bw’eby’omubiri bwonka. Enkoragana omu bushwere na rukundo ei arikuba ainiire ab’eka ye neegumaho.

Ababingirwe nibabaasa kuguma nibaija omu nteerane zaitu. Baaba nibenda, nibabaasa n’okuguma nibatunga obuhabuzi barikubushaba abareeberezi b’ekibiina. Ekigyendererwa n’okuhwera omuntu nk’ogwo kuhikiiriza ebirikwetengyesa kugaruka kuba omwe aha Bajurizi ba Yehova. Ababingirwe abarikureka emitwarize mibi, kandi bakooreka ngu buzima nibenda kugyendera aha mitindo ya Baibuli, nibaikirizibwa kugaruka kuba bamwe aha Bajurizi ba Yehova.